ବ୍ରହ୍ମବରଦା/ଯାଜପୁର ସଦର,୧ା୭(ଯଯାତି କେଶରୀ ବେହେରା/ସମର ବିଜୟ ଶରଣ): ଯାଜପୁର ବ୍ଲକ୍ ଅନ୍ତର୍ଗତ ଝାଲପଡ଼ା ପଞ୍ଚାୟତ ଝାଲପଡ଼ା ଗ୍ରାମରେ ରାଶନ ସାମଗ୍ରୀ ପ୍ରଦାନରେ ଅନିୟମିତତା ହୋଇଥିବା ଅଭିଯୋଗ ହୋଇଛି। ଏନେଇ ଶୁକ୍ରବାର ସକାଳେ ଝାଲପଡ଼ା ଗ୍ରାମର ଶତାଧିକ ମହିଳା ଓ ପୁରୁଷ ବରୁଅଁା-ବାଲିଚନ୍ଦ୍ରପୁର ମୁଖ୍ୟରାସ୍ତାକୁ ଝାଲପଡ଼ା ଛକଠାରେ ଟାୟାର ଜାଳି ଅବରୋଧ କରି ପ୍ରତିବାଦ ଜଣାଇଛନ୍ତି। ଫଳରେ ୨ ଘଣ୍ଟା ଧରି ଗାଡ଼ି ଚଳାଚଳ ବନ୍ଦ ରହିଥିଲା। ରାସ୍ତାର ଉଭୟ ପାର୍ଶ୍ୱରେ ଶତାଧିକ ଗାଡ଼ିମୋଟର ଅଟକି ରହିଥିଲା। ଖବର ପାଇ ବ୍ରହ୍ମବରଦା ପୋଲିସ ପହଞ୍ଚତ୍ ଆନ୍ଦୋଳନକାରୀଙ୍କୁ ବୁଝାଶୁଝା କରିଥିଲା। ହେଲେ ଉପରିସ୍ଥ ଅଧିକାରୀ ଆସି ଘଟଣାର ସମାଧାନ ନ କରିବା ପର୍ଯ୍ୟନ୍ତ ଆନ୍ଦୋଳନକାରୀ ରାସ୍ତାରୁ ହଟିବେ ନାହିଁ ବୋଲି ଜିଦ୍ ଧରିଥିଲେ। ଫଳରେ ସେମାନଙ୍କୁ ବୁଝାଇବାକୁ ପୋଲିସକୁ ନାକେଦମ ହେବାକୁ ପଡ଼ିଥିଲା। ଶେଷରେ ପୋଲିସ ସମସ୍ୟାର ସମାଧାନ କରିବାକୁ ପ୍ରତିଶ୍ରୁତି ଦେଲାପରେ ଆନ୍ଦୋଳନକାରୀ ରାସ୍ତା ଅବରୋଧରୁ ହଟିଯାଇଥିଲେ।
ଗ୍ରାମବାସୀ କହିଛନ୍ତି, ରାଜ୍ୟ ଖାଦ୍ୟ ସୁରକ୍ଷା ଯୋଜନାରେ ମିଳୁଥିବା ରାଶନ ସାମଗ୍ରୀକୁ ଝାଲପଡ଼ା ଗ୍ରାମର ଡିଲର ପର୍ଶୁରାମ ମୁଦୁଲି ବଣ୍ଟନ କରୁଛନ୍ତି। ହେଲେ ୪ ମାସ ହେବ ସେ ୭୨୬ ହିତାଧିକାରୀଙ୍କୁ ସାମଗ୍ରୀ ନ ଦେଇ ହଡ଼ପ କରିଛନ୍ତି। ଏନେଇ ପ୍ରତିବାଦ କରୁଥିବା ଗ୍ରାମର କେତେଜଣ ମୁଷ୍ଟିମେୟ ଲୋକଙ୍କୁ ରାତିଅଧିଆ ଚାଉଳ ଦେଇ ସେମାନଙ୍କ ପାଟି ଚୁପ୍ କରି ଦେଉଛନ୍ତି। ହେଲେ ଗରିବ ଶ୍ରେଣୀର ଲୋକେ ଡିଲରଙ୍କ ନିକଟକୁ ଦୌଡ଼ି ଦୌଡ଼ି ନିରାଶ ହୋଇ ଫେରୁଛନ୍ତି। ଆଜି କାଲି କହି ସେ ସାମଗ୍ରୀ ଦେଉନାହାନ୍ତି। ପୂର୍ବରୁ ବ୍ଲକ୍ ପ୍ରଶାସନର ଦୃଷ୍ଟି ଆକର୍ଷଣ କରାଯିବା ସହ ଡିଲରଙ୍କ ଘର ଆଗରେ ପ୍ରତିବାଦ କରାଯାଇଥିଲା। ହେଲେ କିଛି ସୁଫଳ ମିଳି ନ ଥିଲା। ଶେଷରେ ନିରୁପାୟ ହୋଇ ଗ୍ରାମବାସୀ ରାସ୍ତା ଅବରୋଧ କରିଥିଲେ। ଅନ୍ୟପକ୍ଷରେ ସମ୍ପୃକ୍ତ ଡିଲର ହିତାଧିକାରୀଙ୍କଠାରୁ ଆଗୁଆ ଫିଙ୍ଗରପ୍ରିଣ୍ଟ ନେଉଥିଲେ ମଧ୍ୟ ସାମଗ୍ରୀ ଦେଉ ନ ଥିବା ଗ୍ରାମବାସୀ ପ୍ରକାଶ କରିଛନ୍ତି। ଏହାର ପ୍ରଚ୍ଛଦ ପଟରେ କୌଣସି ରାଜନେତାଙ୍କ ହାତ ରହିଥିବା ଚର୍ଚ୍ଚା ହେଉଛି। ସେହିପରି ଡିଲରଶିପ୍ ପର୍ଶୁରାମଙ୍କ ନଁାରେ ଥିବାବେଳେ ତାଙ୍କ ପୁଅ ସାମଗ୍ରୀ ବିତରଣ କରୁଥିବା ସୂଚନା ମିଳିଛି। ଏ ସମ୍ପର୍କରେ ପର୍ଶୁରାମଙ୍କ ପ୍ରତିକ୍ରିୟା ମିଳିପାରି ନାହିଁ। ତାଙ୍କ ପୁଅ କହିଛନ୍ତି, ଗଁା ବହୁ ବଡ଼ ହେଉଥିବାରୁ ମୁଁ ଆଗୁଆ ଫିଙ୍ଗର ପ୍ରିଣ୍ଟ୍ ନେଇଯାଏ। ରାଶନ ସାମଗ୍ରୀ ଷ୍ଟକ୍ ନାହିିଁ। ଆସିଲେ ସମସ୍ତଙ୍କୁ ଦିଆଯିବ। ଏହାକୁ ଗ୍ରାମବାସୀ ସହଜରେ ଗ୍ରହଣ କରି ପାରିନାହାନ୍ତି। ସେମାନେ ରାଶନ ଘୋଟାଲାର ତଦନ୍ତ ଦାବି କରିଛନ୍ତି। ଦେଖିବାକୁ ଅପେକ୍ଷା ପ୍ରଶାସନ ଏ ଦିଗରେ କି ପଦକ୍ଷେପ ନେଉଛି।
