ନୂଆଦିଲ୍ଲୀ, ୩୦ା୬ : ଏସିଆନ ଗେମ୍ସ ଓ ବିଶ୍ୱ ଚାମ୍ପିୟନଶିପ୍ ଟ୍ରାଏଲ୍ସ ପାଇଁ ପ୍ରସ୍ତୁତି ସକାଶେ ଅଗଷ୍ଟ ୧୦ ପର୍ଯ୍ୟନ୍ତ ସମୟ ମାଗିଥିବା କୁସ୍ତିଯୋଦ୍ଧା ବଜରଙ୍ଗ ପୁନିଆ ଓ ଭିନେଶ ଫୋଗଟ ଟ୍ରେନିଂ ଲାଗି ଯଥାକ୍ରମେ କିର୍ଗିଜ୍ସ୍ତାନ ଓ ହଙ୍ଗେରୀ ଯିବେ। ଉଭୟ କୁସ୍ତିଯୋଦ୍ଧା ଏ ସମ୍ପର୍କରେ ଦେଇଥିବା ପ୍ରସ୍ତାବ କ୍ରୀଡ଼ାମନ୍ତ୍ରଣାଳୟ ଦ୍ୱାରା ଗୃହୀତ ହୋଇଯାଇଛି। ଭାରତୀୟ କୁସ୍ତି ମହାସଂଘ (ଡବ୍ଲ୍ୟୁଏଫ୍ଆଇ) ସଭାପତି ବ୍ରିଜ ଭୂଷଣ ଶରଣ ସିଂଙ୍କ ବିରୋଧରେ ହୋଇଥିବା ଆନ୍ଦୋଳନର ନେତୃତ୍ୱ ନେଇଥିବା ଏହି ଦୁଇଜଣ କୁସ୍ତି ଯୋଦ୍ଧା କିଛି ଦିନ ପୂର୍ବେ କ୍ରୀଡ଼ା ମନ୍ତ୍ରଣାଳୟକୁ ସେମାନଙ୍କ ପ୍ରସ୍ତାବ ଦେଇଥିଲେ। ଜୁଲାଇ ପ୍ରଥମ ସପ୍ତାହରେ ସେମାନେ ବିଦେଶ ଗସ୍ତରେ ଯିବେ। ସେମାନେ ଆଉ ଧାରଣାରେ ବସିବେ ନାହିଁ ବୋଲି ନିକଟରେ ସୋସିଆଲ ମିଡିଆରେ ଘୋଷଣା କରିଛନ୍ତି। ପୁନିଆ ୩୬ ଦିନ ପାଇଁ କିର୍ଗିଜସ୍ତାନର ଇସିକ୍-କୁଲ୍ ଅଭିମୁଖେ ଗସ୍ତ କରିବାକୁ ଥିବା ବେଳେ ଭିନେଶ ତାଙ୍କ ପ୍ରଥମ ଗସ୍ତରେ ବିଶ୍କେକ୍ଠାରେ ଏକ ସପ୍ତାହ ପାଇଁ ଏବଂ ହଙ୍ଗେରୀର ଟାଟାଠାରେ ୧୮ ଦିନ ଟ୍ରେନିଂ ନେବେ। ଭିନେଶଙ୍କ ସହିତ ଫିଜିଓଥେରାପିଷ୍ଟ ଅଶ୍ୱିନୀ ଜୀବନ ପାଟିଲ, କୋଚ୍ ସୁଦେଶ ଏବଂ ତାଙ୍କ ସ୍ପେୟାରିଂ ପାର୍ଟନର ସଙ୍ଗୀତା ଫୋଗଟ ମଧ୍ୟ ଯିବେ। ସେହିପରି ପୁନିଆଙ୍କ ସହ କୋଚ୍ ସୁଜିତ ମାନ୍, ଫିଜିଓଥେରାପିଷ୍ଟ ଅନୁଜ ଗୁପ୍ତା, ସ୍ପେୟାରିଂ ପାର୍ଟନର ଜିତେନ୍ଦର ଖାନ୍ହା ଏବଂ ଷ୍ଟ୍ରେନ୍ଥ୍ ଏବଂ କଣ୍ଡିଶନିଂ ଏକ୍ସପର୍ଟ କାଜି ହସନ ମଧ୍ୟ ଯିବେ। ଅଲିମ୍ପିକ ଗୋଲ୍ଡ କ୍ୱେଷ୍ଟ (ଓଜିକ୍ୟୁ) ହେଉଛି ଏକ ନନ୍ ପ୍ରଫିଟ୍ ପ୍ରମୋଶନ ଫାଉଣ୍ଡେଶନ। ଏହି ସଂସ୍ଥା ପାଟିଲ, ଗୁପ୍ତା ଓ ହସନଙ୍କ ଖର୍ଚ୍ଚ ବହନ କରିବ।
