ଭୁବନେଶ୍ୱର,୨୨ା୬(ସତ୍ୟଜିତ୍ ରାଉତ): ଭଦ୍ରକର ପୂର୍ବତନ ଜିଲା ସାମାଜିକ ମଙ୍ଗଳ ଅଧିକାରଣୀ (ଡିଏସ୍ଡବ୍ଲୂ୍ୟଓ) ଜୟନ୍ତୀ ବେହେରା ଭିଜିଲାନ୍ସ ଜାଲରେ ପଡ଼ିଛନ୍ତି। ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଗୁରୁବାର ଜୟନ୍ତୀଙ୍କ ଘର ସମେତ ବାଲେଶ୍ୱର, ଭଦ୍ରକ ଓ ଭୁବନେଶ୍ୱରର ୧୧ଟି ସ୍ଥାନରେ ଭିଜିଲାନ୍ସ ବିଭାଗ ପକ୍ଷରୁ ଏକକାଳୀନ ଚଢ଼ାଉ କରାଯାଉଛି।
ବାଲେଶ୍ୱର ସ୍ବତନ୍ତ୍ର ଭିଜିଲାନ୍ସ ଜଜ୍ଙ୍କ ଯାଞ୍ଚ ଓ୍ବାରେଣ୍ଟ ବଳରେ ହେଉଥିବା ଏହି ଚଢ଼ାଉରେ ଜଣେ ଅତିରିକ୍ତ ଏସ୍ପି, ୪ ଡିଏ୍ପି, ୮ ଇନ୍ସପେକ୍ଟର ଓ ଅନ୍ୟାନ୍ୟ କର୍ମଚାରୀ ନିୟୋଜିତ ହୋଇଛନ୍ତି। ଜୟନ୍ତୀ ବଦଳି ହୋଇ ବର୍ତ୍ତମାନ ମହିଳା ଓ ଶିଶୁ କଲ୍ୟାଣ ବିଭାଗରେ କାର୍ଯ୍ୟ କରୁଛନ୍ତି।
ବାଲେଶ୍ୱରରେ ଜୟନ୍ତୀଙ୍କର ୩ଟି ବହୁମହଲା ବିଶିଷ୍ଟ କୋଠା, ୪ଟି ପ୍ଲଟ୍, ଭୁବନେଶ୍ୱରରେ ୨ଟି ଫ୍ଲାଟ୍, ପୋଷ୍ଟାଲ ଓ ଜୀବନବୀମା ଜମା ୫୩ ଲକ୍ଷ, ନଗଦ ୨ ଲକ୍ଷ ୭୯ ହଜାର, ଗୋଟିଏ ଚାରିଚକିଆ ଯାନ ସମେତ ଅନ୍ୟାନ୍ୟ ସାମଗ୍ରୀ ଠାବ ହୋଇସାରିଲାଣି। ଚଢ଼ାଉ ଜାରି ରହିଥିବାରୁ ମୋଟ୍ ସମ୍ପତ୍ତିର ଆକଳନ କରାଯାଇପାରିନାହିଁଁ।
ଅନ୍ୟପକ୍ଷରେ ଗଣମାଧ୍ୟମକୁ ତାଙ୍କ ପୁଅ କହିଛନ୍ତି, ଭଦ୍ରକରେ ଭଡ଼ାଘର ଆଉ ଭୁବନେଶ୍ୱରେ ଗୋଟିଏ ଘର ରହିଛି। ମିଡିଲ କ୍ଲାସ ପରିବାରରେ ଯେତିକି ଆବଶ୍ୟକତା ଆମ ପାଖରେ ତାହା ଅଛି। ଆମ ବିରୋଧରେ ଷଡ଼ଯନ୍ତ୍ର କରି ଏହି ରେଡ୍ କରାଯାଉଛି ବୋଲି ସେ କହିଛନ୍ତି।
