କାଳିଆପାଣି,୨୩ା୫(ଡି.ଏନ.ଏ.): ଯାଜପୁର ଜିଲାର କାଳିଆପାଣି ଖଣି ଅଞ୍ଚଳରେ ଟ୍ରାଫିକ୍ ସମସ୍ୟା ଜଟିଳ ହେବାରେ ଲାଗିଛି। ସ୍ଥାନୀୟ ପୋଲିସର ଅପାରଗତା ଓ ଟ୍ରକ୍ ମାଲିକଙ୍କ ବେପରୁଆ ଗାଡି ପାର୍କିଂ ନେଇ ସ୍ଥାନୀୟ ଅଧିବାସୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ପୂର୍ବରୁ ଟିସ୍କୋ ପାର୍କିଂୟାର୍ଡରେ ଟ୍ରକ ପୁରେଇବାକୁ ନେଇ ଦୁଇରୁ ତିନି ଘଣ୍ଟା ରାସ୍ତା ଜାମ ହେଉଥିବାବେଳେ ସୋମବାର ଏହା ଚରମ ସୀମାରେ ପଞ୍ଚତ୍ଚିଛି।
ଅପରାହ୍ନ ଦୁଇଟାଠାରୁ ରାତି ୮ଟା ପର୍ଯ୍ୟନ୍ତ ଖଣି ଅଞ୍ଚଳର ଲାଇଫ ଲାଇନ କୁହାଯାଉଥିବା ଟମକା-ମଙ୍ଗଳପୁର ମୁଖ୍ୟ ରାସ୍ତା ଜାମ ରହିଥିଲା। କାଳିଆପାଣି ଓଏମ୍ସି ଗେଟଠାରୁ କଲରଙ୍ଗୀ ଛକ ୮ କିଲୋମିଟର ରାସ୍ତାରେ ୪ ଧାଡ଼ିରେ ଟ୍ରକ୍ ରହିଥିବାରୁ ଆମ୍ବୁଲାନ୍ସ ସହ ଛୋଟ ଗାଡି ଘଣ୍ଟାଘଣ୍ଟା ଧରି ଫସି ରହିଥିଲେ। ଖରାରେ ଯାତ୍ରୀ ସିଝୁଥିବାବେଳେ ପୋଲିସ ଟ୍ରାଫିକ ସୁଧାରିବା ପାଇଁ ନକେଦମ ହେଉଥିବା ଦେଖିବାକୁ ମିଳିଥିଲା। ସୁକିନ୍ଦା ତହସିଲଦାର ସାରେ କାଳିଆପାଣି ଗସ୍ତ କରୁଥିବାବେଳେ ଜାମରେ ଫସିରହି କଲରଙ୍ଗୀଠାରୁ ଫେରିଥିବା ଜଣାପଡିଛି। ପ୍ରଶାସନ ଏଠି ନିଦାବିଷ୍ଣୁ ସାଜିଥିବାବେଳେ କମ୍ପାନୀ ଓ ଟ୍ରକ୍ ମାଲିକଙ୍କ ସ୍ବାର୍ଥ ଆଗରେ ସାଧାରଣ ଜୀବନ ଏଠି ତୁଚ୍ଛ ହୋଇଛି। ଜିଲାପାଳ ଏଥିପ୍ରତି ଦୃଷ୍ଟିଦେବାକୁ ଦାବି ହୋଇଛି।
