ପାରାଦୀପ,୮ା୫(ସ୍ବ.ପ୍ର.): ପାରାଦୀପ ପୌରାଞ୍ଚଳ ୧୯ ଟି ଯାକ ୱାର୍ଡରେ ଗତ ୨ ତାରିଖରୁ ପଛୁଆ ବର୍ଗ ଜାତି ସର୍ଭେ ଆରମ୍ଭ ହୋଇଛି। ଏହା ଚଳିତ ମାସ ୨୭ ତାରିଖ ପର୍ଯ୍ୟନ୍ତ ଚାଲିବ। ସରକାରୀ ନିୟମ ମୁତାବକ ପ୍ରତି ସର୍ଭେ ସେଣ୍ଟରରେ ୨୦୮ ଜାତିର ଲୋକମାନେ ସେମାନଙ୍କ ସାମାଜିକ ଓ ଶିକ୍ଷାଗତ ସ୍ଥିତି ସମ୍ପର୍କରେ ତଥ୍ୟ ପ୍ରଦାନ କରିବେ। ଏହି ସର୍ଭେ ସେଣ୍ଟର ପ୍ରତି ଅଙ୍ଗନଓ୍ବାଡି କେନ୍ଦ୍ରରେ ଖୋଲାଯାଇଛି ବୋଲି ସରକାରୀ ଭାବେ ପ୍ରଚାର ପ୍ରସାର କରାଯାଉଛି। କିନ୍ତୁ ପାରାଦୀପରେ ଏହି ସର୍ଭେ ୱାର୍ଡ ଅଫିସ ଓ ଗୋଷ୍ଠୀକେନ୍ଦ୍ରରେ ଚାଲିଛି। ସରକାରୀ ଭାବେ ପାରାଦୀପରେ ୮୪ଟି ଅଙ୍ଗନଓ୍ବାଡି କେନ୍ଦ୍ର ରହିଛି। ସେଠାରେ ଅଙ୍ଗନଓ୍ବାଡି କର୍ମୀ, ପାଚିକା, ସହାୟିକା ନିଯୁକ୍ତି ପାଇଛନ୍ତି। ପ୍ରତି କେନ୍ଦ୍ରରେ ପିଲା ପାଠ ପଢିବା ସହିତ ଖେଳୁଛନ୍ତି, ଖାଉଛନ୍ତି ବୋଲି ଅର୍ଥ ମଧ୍ୟ ଖର୍ଚ୍ଚ ହେଉଛି। ମାତ୍ର କୌଣସି ଅଙ୍ଗନଓ୍ବାଡି କେନ୍ଦ୍ରର ନିଜସ୍ବ ଗୃହ ନ ଥିବା ଜଣାପଡ଼ିଛି। ୨୦୧୧୍ରୁ ପାରାଦୀପରେ ୯୪ ଅଙ୍ଗନଓ୍ବାଡି କେନ୍ଦ୍ର ହେବ ବୋଲି ଘୋଷଣା ହୋଇଛି। ମାତ୍ର ଏପର୍ଯ୍ୟନ୍ତ କୌଣସି କେନ୍ଦ୍ରର ନିଜସ୍ବ ଗୃହ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଏଥିଯୋଗୁ ୱାର୍ଡ ଅଫିସରେ ଏହି ପଛୁଆ ବର୍ଗ ସର୍ଭେ କରାଯାଉଛି ବୋଲି ପୌରାଧ୍ୟକ୍ଷ ବସନ୍ତ ବିଶ୍ୱାଳ କହିଛନ୍ତି। ପାରାଦୀପ ବନ୍ଦରାଞ୍ଚଳରେ ଜାଗା ସମସ୍ୟା ଯୋଗୁ ଏହି କେନ୍ଦ୍ର ନିର୍ମାଣରେ ବାଧକ ହେଉଛି ବୋଲି ସେ ପ୍ରକାଶ କରିଛନ୍ତି। ଏହି ପଛୁଆ ବର୍ଗ ସର୍ଭେରେ ୨୦୮ ପ୍ରକାର ଜାତିର ଲୋକ ସେମାନଙ୍କ ତଥ୍ୟ ଦେବେ। ଏହି ଜାତିର ନାମ ସର୍ଭେ ସେଣ୍ଟରରେ ଉପଲବ୍ଧ ଅଛି। ଏଥିରେ ଅନୁସୂଚିତ ଜାତି ଓ ଜନଜାତି ଲୋକ ନାହାନ୍ତି। ଓଡ଼ିଶାରେ ସମୁଦାୟ ୧୨୫୫ ଜାତିର ଲୋକ ବସବାସ କରୁଛନ୍ତି। ସେମାନଙ୍କ ମଧ୍ୟରେ ସାଧାରଣ ବର୍ଗର ୧୩ ଜାତି, ଓବିସି ୪୦୭, ଜନଜାତି ୧୯୨,ଅନୁସୂଚିତ ଜାତି ୧୫୪,ପଛୁଆ ବର୍ଗ ୪୮୯ ଜାତି ରହିଛି ବୋଲି ସରକାରୀ ତଥ୍ୟରୁ ଜଣାପଡ଼ିଛି। ଏହି ସର୍ଭେ କେବଳ ଓଡିଶା ସରକାରଙ୍କ ପାଇଁ ଉଦ୍ଦିଷ୍ଟ ବୋଲି ଦର୍ଶାଯାଇଛି।
