ରାଜକନିକା, ୧୫।୪ (ଡି.ଏନ୍.ଏ.): ରାଜକନିକା ବ୍ଲକ ପେଗରପଡ଼ା ପଞ୍ଚାୟତ ବଳିଭଣ୍ଡା ଗଁା ପାଖ ଚାଷ ଜମିକୁ ଲାଗି ଥିବା ବୈତରଣୀ ନଦୀର ଶାଖା ଚଢେଇଖିଆ ନାଳ। ଗ୍ରାମବାସୀ ଏହି ନାଳ ପାରି ହୋଇ ଚାଷ କରିବାକୁ କ୍ଷେତକୁ ଯାଇଥାନ୍ତି। ନାଳ ଉପରେ ପ୍ରଶାସନ ପକ୍ଷରୁ କଲଭର୍ଟ କି ପୋଲଟିଏ କରାଯାଇନାହିଁ। ଗ୍ରାମବାସୀଙ୍କ ସହାୟତାରେ ଏକ ବାଉଁଶ ଚାର ନିର୍ମାଣ କରି ଚାଷ ପାଇଁ ଯାତାୟାତ କରିଥାନ୍ତି। ଏ ବାବଦରେ ଅନେକ ଥର ପ୍ରଶାସନକୁ ଗୁହାରି କରାଯାଇଥିଲେ ମଧ୍ୟ ପ୍ରଶାସନ କର୍ଣ୍ଣପାତ କରୁ ନ ଥିବା ଅଭିଯୋଗ ହୋଇଛି। ବଳିଭଣ୍ଡା ଗଁା ଲୋକଙ୍କ କହିବା ଅନୁସାରେ, ଜମିରେ ଚାଷ କରି ଜୀବିକା ନିର୍ବାହ କରୁଛୁ। ଏହି ଚାଷରୁ ପିଲାଙ୍କ ପାଠପଢ଼ା, ଘର ଖର୍ଚ୍ଚ, ଔଷଧ, ଜାନିଯାତ୍ରା, ଭଲମନ୍ଦଠାରୁ ଆରମ୍ଭ କରି ସମସ୍ତ ଖର୍ଚ୍ଚ କରିଥାଉ। ହେଲେ ବିଲକୁ ଚାଷ କାର୍ଯ୍ୟ ପାଇଁ ଯିବାକୁ ହେଲେ ସବୁଦିନ ବାଉଁଶ ଚାରକୁ ହିଁ ଭରସା କରିବାକୁ ପଡ଼ିଥାଏ।
ଗ୍ରାମର ଚାଷୀ ପଞ୍ଚାନନ ମଲିକ, ଜ୍ଞାନେନ୍ଦ୍ର ମଲିକ, ଅଭୟ ବେହେରା, ଅଭିରାମ ମଳିକ, ବୁଦ୍ଧିରାମ ମଲିକ, ବୈଷ୍ଣବ ମଲିକ, ସନାତନ ଶତପଥୀ, ବ୍ରଜକିଶୋର ଦାଶ, ଅକ୍ଷୟ ଦାସ, ମଦନ ମୋହନ ଦାସ, ଭାଗବତ ଦାସ, ପ୍ରେମାନନ୍ଦ ଦାସ, ଚନ୍ଦ୍ରମଣି ନାୟକ, ନିରନ ଦାସଙ୍କ ଅଭିଯୋଗକ୍ରମେ ୧୦ବର୍ଷରୁ ଊର୍ଦ୍ଧ୍ୱ ହେବ ଆମେ ପ୍ରଶାସନକୁ ଗୁହାରି କରି ଥକି ପଡ଼ିଲୁଣି। ହେଲେ ଏଇ ଛୋଟିଆ ଗୁହାରି ପ୍ରଶାସନ ହେଉ ଅବା ସରକାର କି ନିର୍ବାଚିତ ପ୍ରତିନିଧି କେହି ଶୁଣୁନାହାନ୍ତି। କେବଳ ଭୋଟ ସମୟରେ ସବୁ କରିଦେବୁ କହି ଭୋଟ ହାତଉଛନ୍ତି। ଏମିତିକି ଏହି ବାଉଁଶ ଚାର ଉପରୁ ଖସିପଡ଼ି ୨ ଜଣଙ୍କ ଜୀବନ ଯାଇଛି। ତଥାପି ସରକାର ନିଦାବିଷ୍ଣୁ ସାଜିଛନ୍ତି। ଯେହେତୁ ଏହି ନାଳ ବୈତରଣୀ ନଦୀକୁ ସଂଯୋଗ କରୁଛି କୁମ୍ଭୀର ଭୟ ସବୁବେଳେ ଲାଗିରହୁଛି। ଏହି ନାଳ ଉପରେ ପୋଲଟିଏ ହେଲେ ବଳିଭଣ୍ଡା, ପାତୁଳି, ଦେଉଳସାହି, ଓଳାଭର, ବସ୍ତି, ନରସିଂହପୁର ଆଦି ଗ୍ରାମର ଚାଷୀ ଉପକୃତ ହୋଇପାରନ୍ତେ ବୋଲି ସେମାନେ କହିଛନ୍ତି। କାରଣ ନାଳ ଅପରପାର୍ଶ୍ୱ ରହିଛି ଏହି ଗ୍ରାମବାସୀଙ୍କ ହଜାରରୁ ଊର୍ଦ୍ଧ୍ୱ ହେକ୍ଟର ଚାଷଜମି। ଜୁଆର ସମୟରେ କୁମ୍ଭୀର ଭୟରେ ଅପେକ୍ଷା କରିବାକୁ ପଡ଼େ। ଜୁଆର ଛାଡ଼ିବା ପରେ ଯାତାୟାତ ସ୍ବଭାବିକ ହୋଇଥାଏ। ଆଜିକା ଦୁନିଆରେ ଯୁବପିଢି ଚାଷ କାର୍ଯ୍ୟରୁ ମୁହଁ ଫେରାଉଥିବା ବେଳେ, ଏଠାରେ ଅଧିକ ମହିଳା ଚାଷ କରୁଥିବାରୁ ଚାଷକୁ ଚାଷୀ ଭରସା କରିଥାନ୍ତି। ମହିଳାମାନଙ୍କ ଇଚ୍ଛା ଶକ୍ତିକୁ ଦେଖି ସରକାରଙ୍କ ପକ୍ଷରୁ ପ୍ରୋତ୍ସାହନ ସ୍ବରୂପ ଚାଷ କାର୍ଯ୍ୟ ପାଇଁ ସମସ୍ତ ସରାଞ୍ଜମ ଯୋଗାଇ ଦିଆଯାଉଛି। ହେଲେ ପୋଲ ନ ଥିବାରୁ ଯନ୍ତ୍ରାଂଶଗୁଡ଼ିକ ଚାଷଜମି ପର୍ଯ୍ୟନ୍ତ ପହଞ୍ଚତ୍ ପାରୁ ନାହିଁ ବୋଲି ମହିଳା ଚାଷୀ ଅଭିଯୋଗ କରିଛନ୍ତି। ଏମିତିକି ଆଗାମୀ ନିର୍ବାଚନ ମଧ୍ୟରେ ଯଦି ଆମ ଦୁଃଖ ଶୁଣି ସରକାର ପୋଲଟିଏ ନିର୍ମାଣ ନ କରନ୍ତି, ତେବେ ଆମେ କୌଣସି ନେତାଙ୍କୁ ଗଁାକୁ ପୂରାଇ ଦେବୁ ନାହିଁ। ଏଥିସହ ଭୋଟ ବର୍ଜନ କରିବୁ ବୋଲି ମହିଳା ଚାଷୀ ମିନତି ମଲିକ, ସନ୍ତୋଷୀ ମଲିକ, ରମଣୀ ମଲିକ, ଟୁନି ମଲିକ, କମଳିନୀ ମଲିକ, ଅନିତା ବେହେରା, ସାବିତ୍ରୀ ମଲିକ, ଅନସୂୟା ମଲିକ, ସତ୍ୟଭାମା ମଲିକ, ଜାନକୀ ମଲିକ, ପ୍ରମିଳା ମଲିକ ପ୍ରମୁଖ କହିଛନ୍ତି। ଏ ବାବଦରେ ପେଗରପଡ଼ା ସମିତି ସଭ୍ୟ ପ୍ରବେଶନ ମଲିକଙ୍କୁ ପଚାରିବାରୁ, ସେଠାରେ ପ୍ରକୃତରେ କୃଷି ପାଇଁ ଚାଷୀ ହଇରାଣ ହେଉଛନ୍ତି। ସେଠାରେ ପୋଲ ନିର୍ମାଣ ହେବା ନିହାତି ଆବଶ୍ୟକତା ଥିବା ଦୃଷ୍ଟିରୁ ଆମେ ପଞ୍ଚାୟତର ଜନ ପ୍ରତିନିଧି ଦୃଷ୍ଟିରୁ ବିଭାଗୀୟ ଅଧିକାରୀଙ୍କୁ ଭେଟି ଚାଷୀଙ୍କ ଦୁଃଖ ବାରମ୍ବାର ଜଣାଇଥିଲେ ମଧ୍ୟ ରାଜନୈତିକ ଫାଇଦା ଦୃଷ୍ଟିରୁ ଏହି ପୋଲ ନିର୍ମାଣ ହୋଇପାରୁନାହିଁ। ତେବେ ଚାଷୀଙ୍କ ହିତ ଦୃଷ୍ଟରୁ ଆସନ୍ତା ବର୍ଷାଦିନ ପୂର୍ବରୁ ଏହି ପୋଲ ନ ହେଲେ, ଆଗାମୀ ସାଧାରଣ ନିର୍ବାଚନରେ ଭୋଟ ବର୍ଜ୍ଜନ କରି ତା’ର ଦୃଢ ଜବାବ ଦେବୁ ବୋଲି କହିଛନ୍ତି। ଏ ସମ୍ପର୍କରେ ଜଳ ସମ୍ପଦ ବିଭାଗ କନିଷ୍ଠ ଯନ୍ତ୍ରୀ ଧୀରେନ ସାହୁଙ୍କୁ ପଚାରିବାରେ ଡିଜାଇନ୍ ଦିଆଯାଇଛି ଓସିସି ଖୁବ୍ଶୀଘ୍ର କାର୍ଯ୍ୟ ଆରମ୍ଭ କରିବ।
