ରାଜଧାନୀ ପୃଷ୍ଠାରେ ଘଟିଯାଉଛି କେତେ ଘଟଣା, ଲିପିବଦ୍ଧ ହେଉଛି କେତେ କାହାଣୀ। ମୁଁ, ତୁମେ ଭଳି ଲକ୍ଷ ଲକ୍ଷ ଲୋକଙ୍କ ସହ ଏହି ଐତିହ୍ୟ ସହର ଭୁବନେଶ୍ୱରର ସମ୍ପର୍କ। କାହାକୁ ଅସୁମାରୀ ସ୍ବପ୍ନ ଦେଖାଇ ନିଜର କରିଛି ତ କାହାକୁ ପ୍ରେମ, ଜୀବନଜୀବିକା, ସାଙ୍ଗ, ସାଥୀ ଭେଟି ଦେଇଛି। ଆଉ କେବେ ନିଃସଙ୍ଗ କରି ରାଜରାସ୍ତାରେ ଏକାକୀ ଲଢ଼ି ସଂଘର୍ଷ କରିବାକୁ ଶିଖାଇଛି। ଅତୀତକୁ ଭାବିଲେ ଏବେ କେତେ ନୂଆ ଲାଗେ ଏହି ସହର। ଇତିମଧ୍ୟରେ ଭୁବନେଶ୍ୱର ତା’ର ୭୫ବର୍ଷରେ ଉନ୍ନତିର ପାହାଚ ଚଢ଼ି ୭୬ରେ ପଦାର୍ପଣ କରିଛି। ନୂଆ ରୂପ, ନୂଆ ବିକାଶ, ନୂଆ ସ୍ବପ୍ନ ଭିତରେ ହଜିଯାଇଛି ଅନେକ ଐତିହ୍ୟର ବାସ୍ତବ ଅସ୍ଥିତ୍ୱ। ବିକଶିତ ରାଜଧାନୀ ପରିଚୟ ମଧ୍ୟରେ କଳା, ସଂସ୍କୃତି ଓ ଐତିହ୍ୟର ଗାଥା ଗାଉଥିବା ମନ୍ଦିରମାଳିନୀ ଭୁବନେଶ୍ୱରର ଐତିହ୍ୟ ଓ ଇତିହାସ ଆଜି ସୁରକ୍ଷା ଖୋଜୁଛି।
ରିପୋର୍ଟ: ଶର୍ମିଷ୍ଠା ପାଣିଗ୍ରାହୀ
ଚିଙ୍ଗୁଡ଼ିଆ ଦଳରେ ଭର୍ତ୍ତି ବିନ୍ଦୁସାଗର
ଏକାମ୍ର କ୍ଷେତ୍ରର ଶୋଭାବର୍ଦ୍ଧନ ପାଇଁ ଶ୍ରୀଲିଙ୍ଗରାଜ ମନ୍ଦିର ନିକଟରେ ଥିବା ପବିତ୍ର ବିନ୍ଦୁ ସାଗର ପୁଷ୍କରିଣୀରେ ଲେଜର ଲାଇଟ୍ ଶୋ’ର ବ୍ୟବସ୍ଥା ରହିଛି। ଏଥିସହ ବହୁ କୋଟି ଟଙ୍କା ଖର୍ଚ୍ଚରେ ଚତୁଃର୍ପାଶ୍ୱରେ ସୌନ୍ଦର୍ଯ୍ୟକରଣ କରାଯାଇଛି। ଏପରିକି ଏହାର ପାଣିର ମାନ ବଜାୟ ରଖିବା ପାଇଁ ମୋଟର ସହାୟତାରେ ପାଣି ଚଳାଚଳ କରାଯାଉଛି। ହେଲେ ବିନ୍ଦୁସାଗରକୁ ଚିଙ୍ଗୁଡିଆ ଦଳମୁକ୍ତ କରାଯାଇପାରୁ ନାହିଁ। ଚନ୍ଦନଯାତ୍ରା ଓ କାର୍ତ୍ତିକ ପୂର୍ଣ୍ଣିମା ଆସିଲେ ନାମକୁ ମାତ୍ର ଦଳ ସଫା କରାଯାଉଛି। ଏକକାଳୀନ ୪ଟି ମୋଟର ବଦଳରେ ଗୋଟିଏ ଦୁଇଟି ମୋଟରରେ ଦଳ ସଫା ହେଉଛି। ଅନ୍ୟପକ୍ଷେ ଲେଜର ଲାଇଟ୍ ଶୋ ମଧ୍ୟ ନିୟମିତ ହେଉନାହିଁ। ଠିକ୍ ସମୟରେ ବିଦ୍ୟୁତ୍ ବିଲ୍ ପୈଠ ହେଉ ନ ଥିବାରୁ ସଂଯୋଗ ବିଚ୍ଛିନ୍ନ କରାଯାଉଛି। ଯେଉଁଥିପାଇଁ ପର୍ଯ୍ୟଟକମାନେ ନିରାଶ ହୋଇ ଫେରୁଛନ୍ତି।
ଖଣ୍ଡିଗିରି, ଉଦୟଗିରିକୁ କାଳ ସାଜୁଛି ପ୍ରଦୂଷଣ
ଯାନବାହନର କର୍କଶ ଶବ୍ଦରେ ପ୍ରଭାବିତ ହେଉଛି ଖଣ୍ଡିଗିରି ଆଉ ଉଦୟଗିରି। ପ୍ରଶାସନ ପକ୍ଷରୁ ଉଭୟ ପାହାଡ଼କୁ ସୁରକ୍ଷା ଦେବା ପାଇଁ ମଝିରେ ବ୍ୟାରିକେଡ ପକାଇ ବନ୍ଦ କରିବା ସହ ଏହାର ସୌନ୍ଦର୍ଯ୍ୟକରଣ କରିବାକୁ ରୂପରେଖ ପ୍ରସ୍ତୁତ କରାଯାଇଥିଲା। ହକି ବିଶ୍ୱକପ ସମୟରେ ଏହାକୁ କିଛି ମାତ୍ରାରେ ଧ୍ୟାନ ମଧ୍ୟ ଦିଆଗଲା। କିନ୍ତୁ ବର୍ତ୍ତମାନ ଯାହାକୁ ତାହା। ନିକଟରେ ଖଣ୍ଡଗିରି ମେଳା ପାଇଁ ଐତିହ୍ୟ ପାହାଡ଼କୁ ସୁରକ୍ଷା ଦେବା ଲାଗି ବ୍ୟାରିକେଡ ପକାଇ ଭାରି ଯାନ ଚଳାଚଳ ବନ୍ଦ କରାଯାଇଥିଲା। କିନ୍ତୁ ଏବେ ସବୁ ଖୋଲା। ଯାନବାହନ ଚଳାଚଳ ଦ୍ୱାରା ପର୍ଯ୍ୟଟକମାନେ ମଧ୍ୟ ଠିକ୍ ଭାବରେ ବୁଲାବୁଲି କରି ପାରୁନାହାନ୍ତି।
ମନ୍ଦିରଗୁଡ଼ିକର ରକ୍ଷଣାବେକ୍ଷଣ ନାହିଁ
ମନ୍ଦିରମାଳିନୀ ଭୁବନେଶ୍ୱରରେ ମାଳ ମାଳ ମନ୍ଦିର। କିନ୍ତୁ ରକ୍ଷଣାବେକ୍ଷଣର ଘୋର ଅଭାବ। ଏଥିସହ ଉପଯୁକ୍ତ ସୁରକ୍ଷା ବ୍ୟବସ୍ଥା ମଧ୍ୟ ନାହିଁ। ସ୍ଥାନେ ସ୍ଥାନେ ଗଛ ଉଠିଲାଣି ତ ଆଉ କେଉଁଠି ମନ୍ଦିରରେ ଫାଟ ଦେଖିବାକୁ ମିଳିଲାଣି। ପର୍ଯ୍ୟଟକଙ୍କୁ ଶୋଷଣ କରାଯାଉଥିବାରୁ ସେମାନେ ମୁହିଁ ଫେରାଇଲେଣି। ଏସବୁକୁ ନେଇ ବହୁ ସମୟରେ ପର୍ଯ୍ୟଟକମାନେ କ୍ଷୋଭ ପ୍ରକାଶ କରୁଥିବା ନଜିର ରହିଛି। ଓଡ଼ିଶାର କଳା, ସଂସ୍କୃତିକୁ ବଞ୍ଚାଇ ରଖିଥିବା ଓ ରାଜଧାନୀର ପରିଚୟ ସାଜିଥିବା ଏସବୁ ମନ୍ଦିରଗୁଡ଼ିକର ଉପଯୁକ୍ତ ରକ୍ଷଣାବେକ୍ଷଣାର ଆବଶ୍ୟକତା ରହିଛି।
