ପାପଡ଼ାହାଣ୍ଡି୬।୪(ଡି.ଏନ୍.ଏ.): ନବରଙ୍ଗପୁର ଜିଲା ପାପଡାହାଣ୍ଡି ବ୍ଲକ ଶିରିଶି ପଞ୍ଚାୟରେ ସ୍ବଚ୍ଛ ଭାରତ ଯୋଜନା ନାମରେ ଟଙ୍କା ଆଦାୟ କରୁଥିବା ବ୍ୟକ୍ତିଙ୍କୁ ବୁଧବାର ଘେରିଛନ୍ତି ଗ୍ରାମବାସୀ। ବ୍ୟକ୍ତିଙ୍କ କାର୍ଯ୍ୟାକଳାପରେ ବିଶ୍ୱାସ ନ କରି ତାଙ୍କୁ ଅଟକ ରଖି ଗ୍ରାମବାସୀ ପୋଲିସ ଓ ସରପଞ୍ଚଙ୍କୁ ଡକାଇଥିଲେ। ପୋଲିସ ଓ ସରପଞ୍ଚଙ୍କ ହସ୍ତକ୍ଷେପ ପରେ ବ୍ୟକ୍ତିଙ୍କୁ ଛଡା ଯାଇଛି। ଏହାର ତଦନ୍ତ କରି ଲୋକଙ୍କ ଟଙ୍କା ଫେରାଇବାକୁ ଗ୍ରାମବାସୀ ଦାବି କରିଛନ୍ତି।
ଶିରିଶି ପଂଚାୟତ ବାନୁଆଗୁଡା, ଦାଡ଼ିଆ ଗୁଡା ଓ ଏକରୀ ଅଞ୍ଚଳରେ ସଞ୍ଜୟ ସାହା ନାମକ ଜଣେ ବ୍ୟକ୍ତି କିଛି ଦିନ ହେଲା ଘର ଘର ବୁଲି ଲୋକଙ୍କୁ ଆଧାର କାର୍ଡ, ଭୋଟ କାର୍ଡ ମାଗି ୩୦ ଟଙ୍କା ଲେଖାଏ ଆଦାୟ କରି ସ୍ବଚ୍ଛ ଭାରତ ଅଭିଯାନର ଏକ ଟିଣ ପ୍ଲେଟ ଦେଉଥିଲେ। ଯେଉଁମାନେ ନାମ ପଞ୍ଜିକରଣ ନ କରିବେ ସେମାନଙ୍କ ଚାଉଳ କାର୍ଡ, ଆଧାର କାର୍ଡ କଟିଯିବା ସହ ଘର ମିଳିବ ନାହ ବୋଲି କହିଥିଲେ। ଲୋକେ ଡରି ସଞ୍ଜୟଙ୍କୁ ୩୦ ଟଙ୍କା ଲେଖାଏ ଦେଇଥିଲେ। ସଞ୍ଜୟ ସେମାନଙ୍କୁ ଏକ ରସିଦ ସହ ଘର ନମ୍ବର, ବ୍ୟକ୍ତିଙ୍କ ନାମ ଓ ୱାର୍ଡ ନମ୍ବର ଉଲ୍ଲେଖ ଥିବା ଏକ ଟିଣର ପ୍ଲେଟ ଦେଉଥିଲେ। ବୁଧବାର ବାନୁଆଗୁଡାରେ ଟଙ୍କା ଆଦାୟ ସମୟରେ କେତେଜଣ ଲୋକ ଏହାକୁ ସନ୍ଦେହକରିଥିଲେ। ସମ୍ପୃକ୍ତ ବ୍ୟକ୍ତିଙ୍କର ପରିଚୟ ପତ୍ର ଓ କେଉଁ ସଂସ୍ଥାରୁ ସେ ଆସିଛନ୍ତି ବୋଲି କୈଫିୟତ ମାଗିଥିଲେ। ସଞ୍ଜୟ କେବଳ ନିଜର ଆଧାର କାର୍ଡ ଦେଇଥିଲେ। ସଂସ୍ଥା ପକ୍ଷରୁ ତାଙ୍କର କୌଣସି ପରିଚୟ ପତ୍ର ଦେଇ ପାରି ନ ଥିଲେ। ଏ ନେଇ ସ୍ଥାନୀୟ ଲୋକେ ପାପଡ଼ାହାଣ୍ଡି ପୋଲିସକୁ ଖବର ଦେବାପରେ ପୋଲିସ ସଞ୍ଜୟଙ୍କୁ ଥାନାକୁ ଆଣି ତଦନ୍ତ ଆରମ୍ଭ କରିଥିଲା। ସଞ୍ଜୟ ପାପଡ଼ାହାଣ୍ଡି ଶିଶୁ ବିକାଶ ଅଧିକାରୀଙ୍କଠାରୁ ପାଇଥିବା ସଚେତନତା ପତ୍ର ଦେଖାଇଥିଲେ। ପରେ ପୋଲିସ ଶିଶୁ ବିକାଶ ଅଧିକାରୀ ସହ କଥା ହୋଇଥିଲେ। ଏଥିସହ ସ୍ଥାନୀୟ ସରପଞ୍ଚଙ୍କ ପ୍ରତିନଧି ତୁଲାରାମ ଭତରାଙ୍କୁ ଡକାଇ ଆଲୋଚନା କରି ସଞ୍ଜୟକୁ ଛାଡିଥିଲେ। ଜୋର ଜବରଦସ୍ତ ଟଙ୍କା ଆଦାୟ ନ କରି ଯେଉଁମାନଙ୍କ ଇଚ୍ଛା ନାହିଁ ସେମାନଙ୍କ ଟଙ୍କା ଫେରସ୍ତ ଦେବା ଲାଗି ଆଲୋଚନା ହୋଇଥିଲା। ଏ ନେଇ ସିଡିପିଓ ଏସ୍. ଗୀତାଙ୍କୁ ପଚାରିବାରୁ ସ୍ବଚ୍ଛ ଭାରତ ଅଭିଯାନରେ ଲୋକଙ୍କୁ ସଚେତନ କରିବା ଲାଗି ବ୍ୟକ୍ତି ଜଣକ ଆସିବା ପରେ ତାଙ୍କୁ ଅନୁମତି ପତ୍ର ଦିଆଯାଇଥିଲ। ତେବେ ଟଙ୍କା ଆଦାୟ ନେଇ ସେ କିଛି କହି ନ ଥିବା ସିଡିପିଓ କହିଛନ୍ତି। ଗୁରୁବାର ସଞ୍ଜୟଙ୍କୁ ଡକାଇ ଏବିଷୟରେ ପଚାରିବେ ବୋଲି ସେ କହିଛନ୍ତି। ସଞ୍ଜୟ ପତ୍ର ଦେଖାଇ ଲୋକଙ୍କଠାରୁ ଟଙ୍କା ଆଦାୟ କରିଥିବା ଗଞ୍ଛା ନାୟକ, ଜିମେଇ ଭତରା, ଡୋମାନି ଭତରା,ଧନେଇ ଲୋହରା, ତିଳୋତ୍ତମା ଲୋହାରା, କୁନ୍ତଳା ନାୟକ, ସାବିତ୍ରୀ ନାୟକ, ଦେବକୀ ଭତରା, ସେନା ଲୋହରା, ହୀରାଧର ଲୋହରା, ଅସ୍ତି ଭତରା, ସାହାରା ମାଝି, ଗଙ୍ଗେଇ ଭତରା,ସନେଇ ନାୟକ, ଭଗବତୀ ଭତରା ପ୍ରମୁଖ ଅଭିଯୋଗ କରିଛନ୍ତି। ପୂର୍ବରୁ ଏପରି ଜଣେ ଯୁବକ ଆସି ଗ୍ୟାସ ମିଳିବ କହି ୫୦୦ ଟଙ୍କା ଲେଖାଏ ଆଦାୟ କରି ଟଙ୍କା ନେଇ ଚାଲି ଯାଇଥିବା ଗ୍ରାମବାସୀ କହିଛନ୍ତି।
