ବଲାଙ୍ଗୀର ଅଫିସ,୧୫ା୧: ବଲାଙ୍ଗୀର ସଦର ଥାନା ଅଧୀନ ସଦାଇପାଲିଠାରେ ଜମି ମାପଚୁପ ବେଳେ ଦୁଇଗୋଷ୍ଠୀ ମଧ୍ୟରେ ସଂଘର୍ଷ ଘଟି ଗୁଳି ଫୁଟିଛି। ଏଥିରେ ଦିଲୀପ ପଟ୍ଟନାୟକ ନାମକ ଜଣେ ଯୁବକ ଆହତ ହୋଇଛନ୍ତି। ତାଙ୍କ କାନ୍ଧରେ ଗୁଳି ବାଜିଛି। ରବିବାର ସଦାଇପାଲିଠାରେ ଦିଲୀପ ଏବଂ ଅନ୍ୟ କେତେଜଣ ଯୁବକ ଏକ ଜମି ମାପଚୁପ କରୁଥିଲେ। ସେତିକିବେଳେ ଲମ୍ବୋଦର ସାଏ ଏବଂ ଅନ୍ୟ କେତେକ ଲୋକ ଘଟଣାସ୍ଥଳକୁ ଆସି ତାଙ୍କ ଜମିକୁ କାହିଁକି ମାପ କରାଯାଉଛି ବୋଲି ପ୍ରଶ୍ନ କରିଥିଲେ।
ଉଭୟ ପକ୍ଷ ଉକ୍ତ ଜମିକୁ ନିଜର ଦର୍ଶାଇବା ପରେ ଯୁକ୍ତିତର୍କ ଓ ପରେ ମାରପିଟ୍ ହୋଇଥିଲା। ସେତିକିବେଳେ କେହି ଜଣେ ବନ୍ଧୁକରୁ ଗୁଳି ଚାଳନା କରିଥିଲେ। ଗୁଳିଟି ଦିଲୀପଙ୍କ କାନ୍ଧରେ ବାଜିଥିଲା। ଖବର ପାଇ ସଦର ଥାନା ପୋଲିସ ଘଟଣାସ୍ଥଳରେ ପହଞ୍ଚି ଥିଲା। ଆହତ ଦିଲୀପଙ୍କୁ ଭୀମ ଭୋଇ ମେଡିକାଲ କଲେଜ ହସ୍ପିଟାଲକୁ ନିଆଯାଇଥିଲା। ଏହି ଘଟଣାରେ ପୋଲିସ ଦୁଇଟି ମାମଲା ରୁଜୁ କରି ୭ ଜଣଙ୍କୁ ଗିରଫ କରିଛି। ପ୍ରଥମ ମାମଲା (୨୬/୨୩) ଅନୁଯାୟୀ ତାଲପାଲିପଡାର ଅଭିଯୁକ୍ତ ସୁରଜ ସାଇସୁଧା ପ୍ରଧାନ (୩୪), ରାମେଶ୍ୱର ନଗରର ସନ୍ତୋଷ କୁମାର ସାହୁ (୩୫), ସିଲୁ ପ୍ରଧାନ (୨୩)ଙ୍କୁ ଗିରଫ କରାଯାଇଛି। ଅନ୍ୟ ମାମଲା(୨୭/୨୩) ଅନୁଯାୟୀ ଅଭିଯୁକ୍ତ ଲମ୍ବୋଦର ସାଏ(୫୫), ଟିଶୁ ଓରଫ ଟିସୁରାଜ୍ (୨୬), ଉପେନ୍ଦ୍ର ସାଏ (୬୨), ଦାମୋଦର ସାଏ (୫୬)ଙ୍କୁ ଗିରଫ କରାଯାଇଛି। ତଦନ୍ତ ଜାରି ରଖିଛି ବୋଲି ଏସ୍ଡିପିଓ ତୋଫାନ ବାଗ ସୂଚନା ଦେଇଛନ୍ତି।
