ପୁରୁଣା ଭୁବନେଶ୍ୱର,୩ା୧(ଡି.ଏନ୍.ଏ.):ନବବର୍ଷ ୨୦୨୩ ତଥା ରବିବାରଠାରୁ ଶ୍ରୀଲିଙ୍ଗରାଜ ମନ୍ଦିରରେ ନୀତିକାନ୍ତି ଚାଲିଥିବାବେଳେ ଜଣେ ଭକ୍ତ ଭୋଗ ମଣ୍ଡପରେ ପଶିଯିବାରୁ ଭୋଗ ମାରା ହୋଇଥିଲା। ଫଳରେ ସେବାୟତମାନେ ନୀତିକାନ୍ତି ବନ୍ଦ କରିଦେଇଥିବା ବେଳେ ସେଦିନର ସମସ୍ତ କୋଠ ଭୋଗ ଏବଂ ଜଜମାନ ଭୋଗ ଅମୁଣିଆ କୂଅରେ ପକାଇବା ବିଧିଥିବାବେଳେ ଏଥିରେ ବ୍ୟତିକ୍ରମ ହୋଇଥିବା ନେଇ ବଡ଼ୁ ନିଯୋଗ ଏବଂ ବ୍ରାହ୍ମଣ ନିଯୋଗ ମଧ୍ୟରେ ତିକ୍ତତା ଦେଖାଦେଇଥିଲା। ତେବେ ରାତି ସୁଦ୍ଧା କୌଣସି ନିଷ୍କର୍ଷ ନ ହେବାରୁ ଶ୍ରୀଲିଙ୍ଗରାଜ ଉପବାସ ରହିଥିଲେ। ହେଲେ ସୋମବାର ରାତି ୯ଟା ସୁଦ୍ଧା ମଧ୍ୟ ସମସ୍ୟାରେ କୌଣସି ସୁଧାର ଆସି ନ ଥିଲା। ଫଳରେ ଶ୍ରୀଲିଙ୍ଗରାଜ ଦ୍ୱିତୀୟ ଦିନ ମଧ୍ୟ ଉପବାସରେ ରହିଛନ୍ତି। ଶ୍ରୀଜୀଉଙ୍କ ପ୍ରତି ସେବାୟତ ଓ ନିଯୋଗଙ୍କ ଏଭଳି ଅବହେଳା ଯୋଗୁ ଭକ୍ତଙ୍କ ମହଲରେ ଅସନ୍ତୋଷ ପ୍ରକାଶ ପାଇଛି। ଅନ୍ୟପଟେ ପ୍ରାତଃରୁ ଠାକୁରଙ୍କ ମଙ୍ଗଳ ଆଳତି କରା ନ ଯାଇ ଦିନତମାମ ଉପବାସରେ ଥିବାବେଳେ ଶ୍ରୀଜୀଉଙ୍କୁ ଶ୍ରଦ୍ଧାଳୁମାନେ ଦର୍ଶନ କରୁଥିବା ଦେଖିବାକୁ ମିଳିଥିଲା। ତେବେ ଠାକୁରଙ୍କର ସ୍ନାନ, ବେଶ, ବିଭିନ୍ନ କର୍ମ, ଷୋଡ଼ଶ ଉପଚାର ପୂଜା, ପଞ୍ଚ ଉପଚାର ପୂଜା ଭଳି ନୀତି ସବୁ ବନ୍ଦ ଥିବାବେଳେ କିଏ ଏବଂ କିଭଳି ଶ୍ରଦ୍ଧାଳୁଙ୍କୁ ଦିଅଁ ଦର୍ଶନ କରାଇଥିଲେ ତାହା ପ୍ରଶ୍ନବାଚୀ ସୃଷ୍ଟି କରୁଛି। ଏ ନେଇ ପୂର୍ବାହ୍ନରେ ଶ୍ରୀଲିଙ୍ଗରାଜ ମନ୍ଦିର ଟ୍ରଷ୍ଟବୋର୍ଡର ପୂର୍ବତନ କାର୍ଯ୍ୟନିର୍ବାହୀ ଅଧିକାରୀ ଅବନିକାନ୍ତ ପଟ୍ଟନାୟକ ସମସ୍ୟାର ସମାଧାନ ନିମନ୍ତେ ମନ୍ଦିର କାର୍ଯ୍ୟାଳୟରେ ପହଞ୍ଚତ୍ ୩ ନିଯୋଗକୁ ମନାଇ ନୀତିକାନ୍ତି କରିବାର ଆଶା ରଖିଥିଲେ। କିନ୍ତୁ କେତେଜଣ ସେବାୟତଙ୍କୁ ଛାଡ଼ିଦେଲେ ପ୍ରମୁଖ ନିଯୋଗ ଗଣ ନ ଆସିବାରୁ ବୈଠକ ହୋଇପାରି ନ ଥିଲା। ଏ ନେଇ ମନ୍ଦିର ପ୍ରଶାସନର କାର୍ଯ୍ୟନିର୍ବାହୀ ଅଧିକାରୀ ଭବାନୀ ମିଶ୍ରଙ୍କ ମୋବାଇଲ ନମ୍ବର ୯୪୩୭୨୫୮୬୧୧ରେ ଯୋଗାଯୋଗ କରିଥିଲେ ମଧ୍ୟ ସେ ଉଠାଇ ନ ଥିଲେ।
