ଜମ୍ମୁ,୧।୧: ଜମ୍ମୁ-କଶ୍ମୀରରେ ବିଦାୟୀ ବର୍ଷ ୨୦୨୨ରେ ମୋଟ ୧୮୬ ଆତଙ୍କବାଦୀ ନିହତ ହୋଇଥିବାବେଳେ ସେମାନଙ୍କ ମଧ୍ୟରୁ ୫୬ ଜଣ ପାକିସ୍ତାନୀ। ଏହା ବ୍ୟତୀତ ବର୍ଷକ ମଧ୍ୟରେ ୧୫୯ ଆତଙ୍କବାଦୀଙ୍କୁ ଗିରଫ କରାଯାଇଛି। ସୁରକ୍ଷା ବଳ ପାଇଁ ୨୦୨୨ ସବୁଠୁ ସଫଳ ବର୍ଷ ଥିଲା ବୋଲି ଜମ୍ମୁ-କଶ୍ମୀର ପୋଲିସ ମହାନିର୍ଦ୍ଦେଶକ ଦିଲ୍ବାଗ ସିଂ ଶନିବାର କହିଛନ୍ତି। କେନ୍ଦ୍ରଶାସିତ ଅଞ୍ଚଳକୁ ଆତଙ୍କବାଦ ଶୂନ୍ୟ କରିବା ଦିଗରେ ପୋଲିସ ଓ ଅନ୍ୟାନ୍ୟ ସୁରକ୍ଷା ସଂସ୍ଥା ଠିକ୍ ଦିଗରେ ଅଗ୍ରସର ହୋଇଛି ବୋଲି ବର୍ଷଶେଷ ଖବରଦାତା ସମ୍ମିଳନୀରେ ଦିଲ୍ବାଗ କହିଛନ୍ତି। ବିଦାୟୀ ବର୍ଷରେ ୧୪୬ଟି ପାକିସ୍ତାନୀ ଟେରୋର ମଡ୍ୟୁଲ୍ର ପର୍ଦ୍ଦାଫାଶ୍ କରାଯାଇଛି। ପ୍ରତି ମଡ୍ୟୁଲ୍ରେ ୪ରୁ ୫ ଜଣ ସଦସ୍ୟ ଥିଲେ ଏବଂ ସେମାନଙ୍କୁ ନିର୍ଦ୍ଦିଷ୍ଟ ତଥା ଟାର୍ଗେଟ କିଲିଂ କରିବା ଏବଂ ଗ୍ରେନେଡ୍, ଆଇଇଡିରେ ଆକ୍ରମଣ କରିବାକୁ ଦାୟିତ୍ୱ ଦିଆଯାଇଥିଲା। ୨୦୨୨ରେ ଜମ୍ମୁ-କଶ୍ମୀରର ୧୦୦ ଜଣ ଯୁବକ ଆତଙ୍କବାଦରେ ସାମିଲ ହୋଇଥିଲେ। ସେମାନଙ୍କ ମଧ୍ୟରୁ ଅଧିକାଂଶ ନିହତ ହୋଇଛନ୍ତି। ସକ୍ରିୟ ଆତଙ୍କବାଦୀଙ୍କ ସଂଖ୍ୟା ହ୍ରାସ କରିବା ଦିଗରେ ସୁରକ୍ଷା ବଳ କାର୍ଯ୍ୟ କରୁଛି।
