ମୁମ୍ବାଇ/ନୂଆଦିଲ୍ଲୀ,୨୬।୧୧(ପି.ଟି.): ୨୦୦୮ ନଭେମ୍ବର ୨୬ରେ ମୁମ୍ବାଇରେ ହୋଇଥିବା ଆତଙ୍କବାଦୀ ଆକ୍ରମଣର ଷଡ଼ଯନ୍ତ୍ରକାରୀ ଓ ପରିଚାଳକମାନଙ୍କୁ ଦଣ୍ଡ ଦେବା ଲାଗି ଭାରତ ଉଦ୍ୟମ ଜାରି ରଖିଥିଲେ ହେଁ ଚାଇନା କ୍ରମାଗତ ଭାବେ ଏହାକୁ ରୋକୁଥିବା ଜାତିସଂଘରେ ଭାରତର ସ୍ଥାୟୀ ପ୍ରତିନିଧି ରୁଚିରା କମ୍ବୋଜ୍ କହିଛନ୍ତି। ରାଜନୈତିକ କାରଣରୁ ଅପରାଧୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେଉନାହିଁ। ଜାତିସଂଘରେ ପାକିସ୍ତାନୀ ଆତଙ୍କବାଦୀ ସଂଗଠନକୁ କଳା ତାଲିକାଭୁକ୍ତ କରିବା ଲାଗି ନୂଆଦିଲ୍ଲୀର ବାରମ୍ବାର ଉଦ୍ୟମ କରିଛି। ଅନ୍ତର୍ଜାତୀୟ ଶାନ୍ତି ଓ ସୁରକ୍ଷା ପ୍ରତି ଆତଙ୍କବାଦ ଗମ୍ଭୀର ବିପଦ ଭାବେ ଉଭା ହୋଇଛି। ଏସୀୟ, ଆଫ୍ରିକା ସମେତ ବିଭିନ୍ନ ଦେଶରେ ଆଇଏସ୍ଆଇଏସ୍ ଏବଂ ଅଲ୍କାଏଦା ସ୍ବୀକୃତିପ୍ରାପ୍ତ ଆତଙ୍କବାଦୀ ସଂଗଠନ ନିର୍ଦ୍ଦିଷ୍ଟ ବ୍ୟକ୍ତି ଏବଂ ସୁରକ୍ଷା କର୍ମୀଙ୍କୁ ଟାର୍ଗେଟ କରି ଆକ୍ରମଣ ଜାରି ରଖିଛନ୍ତି। ୨୦୦୮ ନଭେମ୍ବରରେ ପାକିସ୍ତାନରୁ ୧୦ ଆତଙ୍କବାଦୀ ସମୁଦ୍ରପଥରେ ଆସି ମୁମ୍ବାଇରେ ଆକ୍ରମଣ କରିଥିଲେ। ସେମାନଙ୍କ ଆକ୍ରମଣରେ ୨୬ ବିଦେଶୀଙ୍କ ସମେତ ୧୬୬ ଜଣଙ୍କ ମୃତ୍ୟୁ ଘଟିଥିଲା। ପାକିସ୍ତାନୀ ଆତଙ୍କବାଦୀ ହଫିଜ୍ ତଲାହ ସୟିଦ, ଲଶ୍କର ନେତା ସହିଦ ମହମ୍ମଦ, ସାଜିଦ ମୀର, ଜୈଶ-ଇ-ମହମ୍ମଦ ନେତା ଅବଦୁଲ ରୌଫ ଆଝାର ଏବଂ ଅବଦୁଲ ରେହମନ ମକ୍କିଙ୍କୁ କଳା ତାଲିକାଭୁକ୍ତ କରିବା ଲାଗି ଭାରତ ପ୍ରସ୍ତାବ ଆଣିଥିଲେ ମଧ୍ୟ ପାକିସ୍ତାନର ସବୁଦିନିଆ ବନ୍ଧୁ ଚାଇନା ଏହାକୁ ରୋକୁଛି।
