ନନ୍ଦାହାଣ୍ଡି,୧୪।୧୦(ଡି.ଏନ୍.ଏ.): ନବରଙ୍ଗପୁର ଜିଲା ନନ୍ଦାହାଣ୍ଡି ବ୍ଲକ ବି.ମାଳିଗୁଡ଼ାରେ ବ୍ୟାପିଥିବା ଝାଡ଼ାବାନ୍ତି ଏବେ ନିୟନ୍ତ୍ରଣାଧୀନ। ସପ୍ତାହକ ମଧ୍ୟରେ ୨୪ ଜଣ ଆକ୍ରାନ୍ତ ହୋଇ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିଲେ। ସେମାନଙ୍କ ମଧ୍ୟରୁ ୨୨ ଜଣ ସୁସ୍ଥ ହୋଇ ଫେରିଛନ୍ତି। ଡାକ୍ତରୀ ଦଳ ଏକ କ୍ୟାମ୍ପ କରି ସ୍ଥିତି ଅନୁଧ୍ୟାନ କରିବା ସହ ଝାଡ଼ାବାନ୍ତି ନ ବ୍ୟାପିବା ପାଇଁ ଆବଶ୍ୟକ ପଦକ୍ଷେପ ନେଉଥିବାରୁ ଆକ୍ରାନ୍ତଙ୍କ ସଂଖ୍ୟା କମିବାରେ ଲାଗିଛି। ବୁଧବାର ମାତ୍ର ଜଣେ ଆକ୍ରାନ୍ତ ହୋଇଥିଲେ। ଗୁରୁବାର ଜଣେ ବି ନୂତନ ଆକ୍ରାନ୍ତ ଚିହ୍ନଟ ହୋଇ ନ ଥିବା ସୂଚନା ଦେଇଛନ୍ତି ନନ୍ଦାହାଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଡାକ୍ତର ବିକାଶ ବାରିକ। ଆଗାମୀ କିଛିଦିନ ଡାକ୍ତରୀ ଦଳ ସେହି ଗ୍ରାମରେ ରହି ସ୍ଥିତି ଅନୁଧ୍ୟାନ କରିବା ସହ ଲୋକଙ୍କୁ ସଚେତନ କରିବେ ବୋଲି ସେ ସୂଚନା ଦେଇଛନ୍ତି। ପୂର୍ବରୁ ସଂଗ୍ରହ କରାଯାଇଥିବା ରେକ୍ଟଲ ସ୍ବାବ୍ ଏବଂ ଗାଁରୁ ନିଆଯାଇଥିବା ପାଣିର ନମୁନା ରିପୋର୍ଟରେ ଏହା ଇସେରେସିଆ କୋଲାଇ ବ୍ୟାକ୍ଟେରିଆ ଦ୍ୱାରା ସଂକ୍ରମଣ ହୋଇଥିବା ଜଣାପଡ଼ିଛି। ଦୂଷିତ ଜଳ ବ୍ୟବହାର ଯୋଗୁ ଏପରି ଝାଡ଼ାବାନ୍ତି ବ୍ୟାପିଛି ବୋଲି ସିଡିଏମ୍ଓ କାଳିପ୍ରସାଦ ବେହେରା ସୂଚନା ଦେଇଛନ୍ତି। ଗ୍ରାମବାସୀ ସଚେତନ ହୋଇ ଦୂଷିତ ଜଳ ବ୍ୟବହାର ନ କରିବା ସହ ଡାକ୍ତରଙ୍କ ଦ୍ୱାରା ଦିଆଯାଇଥିବା ଔଷଧ ଠିକ୍ ଭାବେ ଖାଇଲେ ଅତିଶୀଘ୍ର ଝାଡ଼ାବାନ୍ତି ମୁକ୍ତ ଗ୍ରାମ ହୋଇପାରିବ ବୋଲି ଡାକ୍ତରୀ ଦଳ କହିଛନ୍ତି।
