ବାରିପଦା ଅଫିସ, ୪ା୮: ମୟୂରଭଞ୍ଜ ଜିଲା କୁଳିଅଣା ଥାନା ଅଧୀନ ବାଇଗଣବାଡ଼ିଆସ୍ଥିତ ଏକ ଘରୋଇ ବୈଷୟିକ ଶିକ୍ଷାନୁଷ୍ଠାନରେ ଆଦିବାସୀ ଛାତ୍ରମାନଙ୍କୁ ଅକଥନୀୟ ନିର୍ଯାତନା ଦେଇ ତଡ଼ି ଦିଆଯିବା ଘଟଣା ଆଲୋଡ଼ନ ସୃଷ୍ଟି କରିଛି। ମାନସିକ ଓ ଶାରୀରିକ ନିର୍ଯାତନା ସହି ନ ପାରି ଛାତ୍ରମାନେ ଆଇନର ଆଶ୍ରୟ ନେବା ପରେ ରାତିରେ ୩୦କି.ମି. ଚାଲି ଚାଲି ଜିଲାପାଳଙ୍କ କାର୍ଯ୍ୟାଳୟରେ ପହଞ୍ଚି ବୁଧବାର ଧାରଣା ଦେଇଥିଲେ। ଅତିରିକ୍ତ ଜିଲାପାଳ ରୁଦ୍ରନାରାୟଣ ମହାନ୍ତି, ଜିଲା ଜରୁରିକାଳୀନ ଅଧିକାରୀ ସୁଜୟ ପତି ଓ ଟାଉନ ଥାନା ଅଧିକାରୀ ବୀରେନ୍ଦ୍ର ସେନାପତି ପ୍ରମୁଖ ଉତ୍ତ୍ୟକ୍ତ ଛାତ୍ରମାନଙ୍କୁ ବୁଝାଶୁଝା କରିବା ପରେ ସେମାନେ ଧାରଣାରୁ ଉଠିଥିଲେ। ଏହି ଘଟଣାରେ କୁଳିଅଣା ପୋଲିସ ଶିକ୍ଷାନୁଷ୍ଠାନ ଅଧ୍ୟକ୍ଷ ଓ ଜଣେ ଶିକ୍ଷକଙ୍କୁ ଗିରଫ କରିଥିବା ସୂଚନା ମିଳିଛି।
ଅଭିଯୋଗ ଅନୁଯାୟୀ, ବାଇଗଣବାଡ଼ିଆସ୍ଥିତ ଉକ୍ତ ବୈଷୟିକ ଶିକ୍ଷାନୁଷ୍ଠାନରେ ଆଦିବାସୀ ଛାତ୍ରମାନେ ବର୍ଷେ ହେଲା ଇଲେକ୍ଟ୍ରିକାଲ ଓ ଫିଟର ଟ୍ରେଡ୍ରେ ଅଧ୍ୟୟନ କରୁଥିଲେ। ପରୀକ୍ଷା ପାଇଁ ଅଗଷ୍ଟ ୧ରେ ସେମାନେ ଆସିଥିବା ବେଳେ ଆଡ୍ମିଟ କାର୍ଡରେ ଟ୍ରେଡ୍ ବଦଳିଯାଇଥିବା ଦେଖିବାକୁ ପାଇଥିଲେ। ଫଳରେ ଛାତ୍ରମାନେ ପରୀକ୍ଷା ଦେବାରେ ଅସମର୍ଥ ହେବା ନେଇ ଅଧ୍ୟକ୍ଷଙ୍କ ନିକଟରେ ଅଭିଯୋଗ କରିଥିଲେ। ଶିକ୍ଷାନୁଷ୍ଠାନ କର୍ତ୍ତୃପକ୍ଷ ଏହାର ସମାଧାନ ନ କରି ଛାତ୍ରମାନଙ୍କୁ ପରୀକ୍ଷା ଦେବାକୁ ବାଧ୍ୟ କରିଥିଲେ। ଏଥିରେ ଛାତ୍ରମାନେ ଅରାଜି ହେବାରୁ ଅଧ୍ୟକ୍ଷଙ୍କ ଭାଇ ଦିବ୍ୟଲୋଚନ ବାରିକ ସେମାନଙ୍କୁ ମାଡ଼ ମାରିଥିଲେ। ଏହାକୁ ନେଇ ୧୨ଜଣ ଛାତ୍ର ମଙ୍ଗଳବାର ଶିକ୍ଷାନଷ୍ଠାନ ଫାଟକ ସମ୍ମୁଖରେ ଧାରଣାରେ ବସିଥିଲେ। ଶିକ୍ଷାନୁଷ୍ଠାନ ପରିଚାଳକ, ଶିକ୍ଷକ ଓ ଅଧ୍ୟକ୍ଷଙ୍କ ଭାଇ ଛାତ୍ରମାନଙ୍କ ପାଖକୁ ଆସି ଜାତିଆଣ ଆକ୍ଷେପ କରି ଗାଳିଗୁଲଜ କରିବା ସହ ମାଡ଼ ମାରିଥିଲେ। ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ପରେ ଛାତ୍ର ସଲମାନ ବେଶ୍ରାଙ୍କ ସାର୍ଟିଫିକେଟ ଦେବା ସହ ୧୨ଜଣ ଛାତ୍ରଙ୍କୁ କଲେଜରୁ ତଡ଼ି ଦିଆଯାଇଥିଲା। ମାଡ଼ ଖାଇବା ପରେ ଛାତ୍ରମାନେ ଦୀର୍ଘ ୧୨କି.ମି. ରାସ୍ତା ଚାଲି ଚାଲି ଆସି କୁଳିଅଣା ଥାନାରେ ଲିଖିତ ଅଭିଯୋଗ କରିଥିଲେ। ଛାତ୍ର ମଧୁସୂଦନ ହଁାସଦାଙ୍କ ଅଭିଯୋଗକୁ ଭିତ୍ତିକରି ପୋଲିସ ଏକ ମାମଲା (ନଂ.୧୧୩/୨୨)ରୁଜୁ କରି ଚୁପ୍ ବସିଥିଲା। ପୋଲିସ ନୀରବତାକୁ ଦୃଷ୍ଟିରେ ରଖି ନ୍ୟାୟ ପାଇବା ଆଶାରେ ମଙ୍ଗଳବାର ରାତିରୁ ଛାତ୍ରମାନେ କୁଳିଅଣା ଥାନାଠାରୁ ପ୍ରାୟ ୩୦କି.ମି. ରାସ୍ତା ଜାତୀୟ ରାଜପଥ ପାର୍ଶ୍ୱରେ ଚାଲି ଚାଲି ଆସି ବୁଧବାର ଭୋର ୪ଟା ସମୟରେ ଜିଲାପାଳଙ୍କ କାର୍ଯ୍ୟାଳୟଠାରେ ପହଞ୍ଚିଥିଲେ। ତେବେ ଛାତ୍ରମାନେ ସେଠାରେ ଧାରଣା ଦେବା ଜାଣି ପୋଲିସ ତରବରିଆ ଭାବେ ଶିକ୍ଷାନୁଷ୍ଠାନ ଅଧ୍ୟକ୍ଷ ତ୍ରିଲୋଚନ ଗିରି ଓ ଶିକ୍ଷକ ସତ୍ୟଜିତ ଗିରଙ୍କୁ ଗିରଫ କରିଥିଲା। ଛାତ୍ରମାନଙ୍କୁ ମାଡ଼ ମାରିଥିବା ଅଧ୍ୟକ୍ଷଙ୍କ ଭାଇଙ୍କୁ ତୁରନ୍ତ ଗିରଫ କରା ନ ଗଲେ ଆନ୍ଦୋଳନ ହେବ ବୋଲି ଛାତ୍ରମାନେ ଚେତାବନୀ ଦେଇଛନ୍ତି ।
