ମାଲେ, ୧।୭ : ସମଲିଙ୍ଗୀ ସମ୍ପର୍କକୁ ନେଇ ଲିକ ହୋଇଥିବା ଏକ ଭିଡିଓ ଏବଂ ଫଟୋ ଇସଲାମିକ ଦେଶମାଳଦ୍ୱୀପରେ ଉତ୍ତେଜନା ସୃଷ୍ଟି କରିଛି। ଦେଶରେ ସମଲିଙ୍ଗୀ ସମ୍ପର୍କ ଉପରେ ନିଷେଧାଦେଶ ସତ୍ତ୍ୱେ ବହୁ ନେତା ସେମାନଙ୍କର ପୁରୁଷ ବନ୍ଧୁ ଏବଂ ସମ୍ପର୍କୀୟଙ୍କ ସହ ଅନ୍ତରଙ୍ଗ ସମୟରେ ଭିଡ଼ିଓରେ ଥିବାର ଦେଖିବାକୁ ମିଳୁଛି। ସୋସିଆଲ ମିଡିଆରେ ଭାଇରାଲ ହୋଇଥିବା ଏହି ଭିଡିଓରେ ବହୁ ମାଳଦ୍ୱୀପ ରାଜନେତା ଏବଂ ସାଂସଦ ସମଲିଙ୍ଗୀ ସମ୍ପର୍କ ସାମିଲ ରହିଥିବାର ଦେଖିବାକୁ ମିଳୁଛି।
ଅପରପକ୍ଷରେ, ଏହି ଫଟୋ ଏବଂ ଭିଡିଓ ଲିକ କରିଥିବା ବ୍ୟକ୍ତିଙ୍କୁ ସେମାନେ ଚିହ୍ନଟ କରିଛନ୍ତି ବୋଲି ମାଳଦ୍ୱୀପ ପୋଲିସ କହିଛି। ସହକାରୀ କମିଶନର ମହମ୍ମଦ ରିଆଜ କହିଛନ୍ତି ଯେ ଏହି ଭିଡିଓ ଲିକରେ ଥିବା ସନ୍ଦିଗ୍ଧ ବ୍ୟକ୍ତିଙ୍କୁ ଚିହ୍ନଟ କରାଯାଇଛି। ସନ୍ଦିଗ୍ଧଙ୍କ ସହ ଜଡିତ ଅଧିକ ତଥ୍ୟ ଅନୁସନ୍ଧାନ ପରେ ବାହାରକୁ ଆସିବ।
ସାଂସଦ ତଥା ରାଜନେତାଙ୍କ ସମ୍ପର୍କୀୟଙ୍କ ସମଲିଙ୍ଗୀ ସମ୍ପର୍କ ଭିଡିଓରେ ପ୍ରକାଶ ପାଇଛି। ଏକ ଭିଡିଓରେ ମାଲଦ୍ୱୀପ ସଂସଦର ବାଚସ୍ପତି ମହମ୍ମଦ ନାସିଦଙ୍କ ଭାଇ ଓକିଲ ନଜିମ ସତ୍ତାର ଜଣେ ପ୍ରବାସୀଙ୍କ ସହ ସମଲିଙ୍ଗୀ ସମ୍ପର୍କରେ ଥିବା ଦେଖାଯାଇଛି। ଗୋଟିଏ ଫଟୋରେ ଜଣେ ସାଂସଦ ଜଣେ ମହିଳା ଏବଂ ପୁରୁଷଙ୍କ ମଧ୍ୟରେ ଆପତ୍ତିଜନକ ଅବସ୍ଥାରେ ଶୋଇଥିବାର ନଜର ଆସିଛନ୍ତି। ଭିଡିଓରେ ଦେଖାଯାଇଥିବା ସମଲିଙ୍ଗୀମାନେ ମଧ୍ୟ ବ୍ଲାକମେଲ କରୁଥିବାର ରିପୋର୍ଟ ପୋଲିସ ଦାଖଲ କରିଛି। ଭିଡିଓରେ ସମଲିଙ୍ଗୀ ସମ୍ପର୍କ ରଖିଥିବା ଲୋକଙ୍କୁ ମଧ୍ୟ ଅନୁସନ୍ଧାନ କରାଯାଉଥିବା ପୋଲିସ ଅଧିକାରୀ କହିଛନ୍ତି। ମାଳଦ୍ୱୀପରେ ଏପରି ସମ୍ପର୍କ ରହିବା ଅପରାଧ । ଦୋଷୀମାନଙ୍କୁ କଠୋର ଦଣ୍ଡ ଦିଆଯିବ।
ଦେଶରେ ଇସଲାମିକ ନିୟମ ଅନୁଯାୟୀ ଏହି ଅପରାଧରେ ଜଡିତ ବ୍ୟକ୍ତିଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୋଲିସ କହିଛି॥ ଆପତ୍ତିଜନକ ଅବସ୍ଥାରେ ଭିଡିଓ ଏବଂ ସମଲିଙ୍ଗୀ ସମ୍ପର୍କର ଫଟୋ ମାର୍ଚ୍ଚରୁ ମାଳଦ୍ୱୀପରେ ଭାଇରାଲ ହେବାରେ ଲାଗିଲା। ସେବେଠାରୁ ସମ୍ପୃକ୍ତ ଅପରାଧର ତଦନ୍ତ ଚାଲିଛି। ଏହି ଘଟଣାରେ ସହକାରୀ ପୋଲିସ କମିଶନର ରିୟାଜ ମଧ୍ୟ ଗଣମାଧ୍ୟମକୁ ସହଯୋଗ କରିବାକୁ ନିବେଦନ କରିଛନ୍ତି। ସମ୍ବେଦନଶୀଳ ସୂଚନା ପ୍ରକାଶ ନକରିବାକୁ ସେ ଅନୁରୋଧ କରିଛନ୍ତି।
