ରଘୁନାଥପୁର,୨୬।୬(ଡି.ଏନ୍.ଏ.): ଜଗତ୍ସିଂହପୁର ଜିଲା ରଘୁନାଥପୁର ବ୍ଲକ କେରେକେରାସ୍ଥିତ ପ୍ରସିଦ୍ଧ ବିଭୂତି କ୍ଷେତ୍ର ପ୍ରଭୁ ଗୋରେଖନାଥଙ୍କ ସମ୍ମୁଖରେ ଥିବା ୨ ନଂ. ଦାନବାକ୍ସରୁ ଗତ ମଙ୍ଗଳବାର ମଧ୍ୟରାତ୍ରିରେ ଦୁର୍ବୃତ୍ତମାନେ ୧୦ ଲକ୍ଷ ଟଙ୍କା ଚୋରିକରି ଫେରାର ହୋଇଯାଇଥିଲେ। ଏହା ମଧ୍ୟରେ ୪ ଦିନ ବିତିଯାଇଥିଲେ ସୁଦ୍ଧା ତିର୍ତ୍ତୋଲ ଥାନା ପୋଲିସ ଅଭିଯୁକ୍ତଙ୍କୁ ଧରିବାରେ ସକ୍ଷମ ହୋଇପାରିନାହିଁ, ଯାହାକି ସ୍ଥାନୀୟ ଅଞ୍ଚଳବାସୀ ତଥା ଶ୍ରଦ୍ଧାଳୁଙ୍କ ଭାବାବେଗ ପ୍ରତି କୁଠାରାଘାତ କରିଛି। ପୋଲିସ ଜାଣିଶୁଣି ତଦନ୍ତରେ ବିଳମ୍ବ କରୁଛି ନା ଏହା ପଛରେ କୌଣସି ରହସ୍ୟ ଲୁଚି ରହିଛି ତାହା ଏବେ ଲୋକଙ୍କ ମନରେ ପ୍ରଶ୍ନବାଚୀ ସୃଷ୍ଟି କରିଛି। ରାତି ୧୦ଟା ପ୍ରଭୁଙ୍କ ପହୁଡ଼ ପାଇଁ ଧାର୍ଯ୍ୟ ହୋଇଥିବାବେଳେ ଉକ୍ତ ଦିନ ରାତି ୯ଟାରେ ପହୁଡ଼ ପଡିବା ନେଇ ସନ୍ଦେହ ପ୍ରକାଶ ପାଇଛି। ଚୋରି ସମୟରେ ସିସିଟିଭି ଫୁଟେଜ୍ରେ ୩ଜଣ ଦୁର୍ବୃତ୍ତ ସାମିଲ ଥିବା ଦେଖାଯାଉଥିଲା। ଏହା ପଛରେ ଏକ ର଼୍ୟାକେଟ ଥିବାର ଆଲୋଚନା ହେଉଛି। ସର୍ବପରେ ସନ୍ଧାନୀ କୁକୁର ଯେଉଁ ବ୍ୟକ୍ତିଙ୍କ ବାଡ଼ିରେ ଥିବା ଛଣଗଦା ଓ କୁଟାଗଦା ଚତୁଃପାର୍ଶ୍ୱରେ ବୁଲୁଥିଲା, ଉକ୍ତ ଦିନ ଠିକ୍ ଭାବେ ତାକୁ ଯାଞ୍ଚ କରା ନ ଯିବା ଏବଂ ଏହାର ମାଲିକଙ୍କୁ ତଦନ୍ତ ପରିସରକୁ ଆଣି ପଚରାଉଚରା କରିଥିଲେ କିଛି ବି ସୁରାକ ପୋଲିସ ପାଇଥାନ୍ତା ବୋଲି ମତ ପ୍ରକାଶ ପାଇଛି। ଅନ୍ୟପକ୍ଷେ ରାତ୍ର ଜଗୁଆଳ ଚୋରି ସମ୍ପର୍କରେ ଖବରପାଇ ସେଠାକୁ ଯାଇଥିଲେ ମଧ୍ୟ ସ୍ଥାନୀୟ ଗ୍ରାମବାସୀଙ୍କୁ ଏ ସମ୍ପର୍କରେ ଖବର ନ ଦେବା ସନ୍ଦେହଘେରକୁ ଆସିଛି। କାର୍ଯ୍ୟାନୁଷ୍ଠାନ ସ୍ବରୂପ ପୀଠ ଦାୟିତ୍ୱରେ ଥିବା ଦୁଇ ହୋମଗାର୍ଡ ଓ ଜଣେ କନଷ୍ଟେବଳଙ୍କୁ ସ୍ଥାନାନ୍ତର କରି ପୋଲିସ ଚୁପ୍ ବସିଛି ବୋଲି ଅଭିଯୋଗ ହେଉଛି। ପୀଠରେ ବାର୍ଷିକ ହୁଣ୍ଡି, ନିଲାମି ଭୋଗ, ଦୀପ ଦୋକାନ ଏବଂ ବିବାହ, ବ୍ରତ ଇତ୍ୟାଦିର ରସିଦ ବାବଦରେ କୋଟି କୋଟି ଟଙ୍କା କାରବାର ହେଉଥିବାବେଳେ ସୁରକ୍ଷା ବ୍ୟବସ୍ଥା ସମ୍ପୂର୍ଣ୍ଣ ହୁଗୁଳା ରହିଛି। ଏହାଛଡ଼ା ଉନ୍ନତମାନର ସିସି କ୍ୟାମେରା ପୀଠରେ ବ୍ୟବହୃତ ହେଉ ନ ଥିବାରୁ ଏହାର ସ୍ପଷ୍ଟ ଚିତ୍ର ଦେଖିବାରେ ଅସୁବିଧା ହେଉଛି। ପୀଠରେ ତୁରନ୍ତ ଉନ୍ନତମାନର ସୁରକ୍ଷା ବ୍ୟବସ୍ଥା ସହ ହାଇ ଟେକ୍ନୋଲୋଜିର ସିସି କ୍ୟାମେରା ଲଗାଯିବା ପାଇଁ ଦାବି ହେଉଛି। ଏହାଛଡା ପୀଠ ପରିସରରେ ବିପଦକାଳୀନ ଆଲାର୍ମ ପାଇଁ ଅଞ୍ଚଳବାସୀ ଦାବି କରିଛନ୍ତି। ଉପରୋକ୍ତ ସମସ୍ତ ବିଷୟକୁ ତର୍ଜମା କରି ଖୁବ୍ଶୀଘ୍ର ଅଭିଯୁକ୍ତମାନଙ୍କୁ ଧରିବାକୁ ଏସ୍ପି ଓ ଜିଲାପାଳଙ୍କ ନିକଟରେ ଦାବି ହେଉଛି। ଏ ସମ୍ପର୍କରେ ତଦନ୍ତକାରୀ ଏସ୍ଆଇ ଦୀନେଶ ପଟ୍ଟାଙ୍କୁ ପଚାରିବାରେ ଚିରାଚରିତ ଢଙ୍ଗରେ ହାଲୁକା ଭାବେ ତଦନ୍ତ ଜାରି ରହିଛି ବୋଲି ସେ କହିଛନ୍ତି।
