ଆନନ୍ଦପୁର,୧୨।୫(ସ୍ବ.ପ୍ର.): ବାତ୍ୟା ପ୍ରଭାବରେ ବୁଧବାର ସକାଳେ ସାମାନ୍ୟ ବର୍ଷାରେ ଆନନ୍ଦପୁର ଉପଖଣ୍ଡ ଚିକିତ୍ସାଳୟ ଭିତରେ ପାଦବୁଡ଼ା ପାଣି ଦେଖିବାକୁ ମିଳିଥିଲା। ରୋଗୀ ଏବଂ ରୋଗୀ ସହାୟକମାନେ ଯିବାଆସିବା ସମୟରେ ପଡ଼ି ଆହତ ହେବା ଭଳି ଘଟଣା ଘଟିଥିଲା। ଉପଖଣ୍ଡ ମୁଖ୍ୟ ଚିକିତ୍ସାଳୟର ୫୦ ଶଯ୍ୟା ବିଶିଷ୍ଟ ମାତୃ ଓ ନବଜାତ ସ୍ବାସ୍ଥ୍ୟକେନ୍ଦ୍ରର ବହୁତଳ ପ୍ରାସାଦରେ ଏଭଳି ସମସ୍ୟା ଦେଖାଯାଇଛି। ସ୍ବାସ୍ଥ୍ୟକେନ୍ଦ୍ର କୋଠାର ଛାତରୁ ପାଣି ଗଳି ବିଭିନ୍ନ ଓ୍ବାର୍ଡ ସମେତ ଟିକାକରଣ କେନ୍ଦ୍ର ଏବଂ ଅଭ୍ୟର୍ଥନା ପ୍ରକୋଷ୍ଠ ଜଳାର୍ଣ୍ଣବ ହୋଇଥିଲା। ସ୍ବାସ୍ଥ୍ୟସେବା ପାଇଁ ଆସିଥିବା ଗର୍ଭବତୀ ମହିଳା ଅସୁବିଧାର ସମ୍ମୁଖୀନ ହୋଇଥିଲେ। ସେହିପରି ନବଜାତ ଶିଶୁମାନଙ୍କୁ ଟିକାକରଣ କ୍ଷେତ୍ରରେ ସମସ୍ୟା ସୃଷ୍ଟି ହୋଇଥିଲା। ରୋଗୀଙ୍କ ସହାୟକ ଏବଂ କେତେଜଣ ଶିଶୁ ରୋଗୀ ପାଣି ଯୋଗୁ ସ୍ବାସ୍ଥ୍ୟକେନ୍ଦ୍ର ଟାଇଲ ଉପରେ ପଡ଼ି ଆହତ ହୋଇଥିବା ଅଭିଯୋଗ ହେଉଛି। ଏହାକୁ ନେଇ ଅସନ୍ତୋଷ ପ୍ରକାଶ ପାଇଥିଲା।
ଆନନ୍ଦପୁର ଉପଖଣ୍ଡ ମୁଖ୍ୟ ଚିକିତ୍ସାଳୟର ନବନିର୍ମିତ ଏହି କୋଠା ମାତ୍ର ତିନିବର୍ଷ ହେବ କାର୍ଯ୍ୟକ୍ଷମ ହୋଇଛି। ଛାତରୁ ପାଣି ଗଳିବା ଘଟଣାରୁ କୋଟି କୋଟି ଟଙ୍କା ବ୍ୟୟରେ ନିର୍ମାଣ ଶୈଳୀକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ନିମ୍ନମାନର କାର୍ଯ୍ୟ କରାଯାଇଥିବା ସାମାଜିକ କର୍ମୀ ବୁଲୁ ପଟ୍ଟନାୟକ, ରୋଗୀଙ୍କ ସମ୍ପର୍କୀୟ ମୁନା ନାୟକ, ମନୋଜ କୁମାର ସ୍ବାଇଁ ପ୍ରମୁଖ ଅଭିଯୋଗ କରିଛନ୍ତି। ସୂଚନାଥାଉକି, ଏହି ଚିକିତ୍ସାଳୟ କେତେବେଳେ ଚିକିତ୍ସାକୁ ନେଇ ବିବାଦରେ ତ ଆଉ କେତେବେଳେ ଅନ୍ଧାରରେ ସ୍ବାସ୍ଥ୍ୟସେବା, ମଝିରେ ମଝିରେ ଛାତର ସିଲିଂ ଖସି ରୋଗୀ ଆହତ ହେବା ନେଇ ବିବାଦ ଘେରକୁ ଆସିଛି।
