ଜମ୍ମୁ,୧।୪: ଜମ୍ମୁ-କଶ୍ମୀରର ସୋପୋରେ ଅଞ୍ଚଳରେ ସୁରକ୍ଷା ବଳର ବଙ୍କର ଉପରେ ପେଟ୍ରୋଲ ବୋମା ପକାଇଥିବା ବୁର୍ଖା ପିନ୍ଧା ମହିଳା ଧରା ପଡ଼ିଛନ୍ତି। ମହିଳା ଜଣଙ୍କୁ ହସିନା ଆଖତର ଭାବେ ଚିହ୍ନଟ କରାଯାଇଛି। ବାରାମୁଲା ବାସିନ୍ଦା ପ୍ରତିବନ୍ଧିତ ମହିଳାଙ୍କ ବିଚ୍ଛିନ୍ନତାବାଦୀ ଗୋଷ୍ଠୀ ଦୁଖତାରାନ-ଇ-ମିଲାତ ସହ ଜଡ଼ିତ ଥିବା ପୋଲିସ ପକ୍ଷରୁ କୁହାଯାଇଛି। ହସିନାଙ୍କ ଉପରେ ପୂର୍ବରୁ ୩ଟି ୟୁଏପିଏ(ଦେଶ ଦ୍ରୋହ) ଅଧୀନରେ ମାମଲା ଚାଲଛି। କିଛି ମାସ ତଳେ ତାଙ୍କୁ ଜାମିନରେ ଛଡ଼ା ଯାଇଥିଲା।
ମହିଳା ଜଣଙ୍କ ବୁର୍ଖାରେ ଆସି ଗତ ମଙ୍ଗଳବାର ସିଆର୍ପିଏଫ୍ କ୍ୟାମ୍ପ ଉପରେ ପେଟ୍ରୋଲ ବୋମା ପକାଇଥିଲେ। କିନ୍ତୁ ବୋମାଟି କ୍ୟାମ୍ପର ଗେଟ ଆଗରେ ଫାଟି ଯାଇଥିଲା। ସିସିଟିଭି ଫୁଟେଜରେ କଏଦ ହୋଇଥିବା ଘଟଣାର ଭିଡିଓ ସୋସିଆଲ ମିଡିଆରେ ପ୍ରବଳ ଭାଇରାଲ ହୋଇଥିଲା।
ବୋମା ଆକ୍ରମଣ ପରେ ସେ ଗିରଫ ହେବାରୁ ବର୍ତ୍ତିବା ପାଇଁ ସେ ଫେରାର ହୋଇଯାଇଥିଲେ। କିନ୍ତୁ ସିସିଟିଭି ଆଧାରରେ ମହିଳାଙ୍କୁ ଚିହ୍ନଟ କରାଯାଇଥିଲା। ସୋପୋରେ ପୋଲିସ ତାଙ୍କୁ ଗୁରୁବାର ଗିରଫ କରିଥିବା ବରିଷ୍ଠ ପୋଲିସ ଅଧିକାରୀ ବିଜୟ କୁମାର କହିଛନ୍ତି। ମହିଳାଙ୍କ ସ୍ବାମୀ ସେନା ଉପରେ ପଥର ଫୋପାଡ଼ିବା ପାଇଁ ସର୍ବସାଧାରଣଙ୍କ ସୁରକ୍ଷା ଆଇନରେ ଗିରଫ କରାଯାଇଥିଲା।
