ନୂଆଦିଲ୍ଲୀ,୨।୩: ଭାରତର ଅର୍ଥନୀତିକୁ ସୁଦୃଢ଼ କରୁଥିବା ସାମଗ୍ରୀ ଓ ସେବା ଟିକସ (ଜିଏସ୍ଟି) ସଂଗ୍ରହର ସବିଶେଷ ସୂଚନା ମଙ୍ଗଳବାର କେନ୍ଦ୍ର ଅର୍ଥ ମନ୍ତ୍ରଣାଳୟ ପକ୍ଷରୁ ଜାରି କରାଯାଇଛି। ଉକ୍ତ ସୂଚନା ଅନୁସାରେ ଗତ ଫେବୃୟାରୀରେ ଦେଶର ଜିଏସ୍ଟି ସଂଗ୍ରହ ପ୍ରାୟ ୧.୩୩ ଲକ୍ଷ କୋଟି ଟଙ୍କା ରହିଛି। ଏହା ଫେବୃୟାରୀ ୨୦୨୧ ତୁଳନାରେ ୧୮% ଅଧିକ ବୋଲି ସୂଚନା ମିଳିଛି। ମାତ୍ର ଜାନୁୟାରୀ ୨୦୨୨ ତୁଳନାରେ ପ୍ରାୟ ୫.୬% କମ୍ ହୋଇଥିବା ମନ୍ତ୍ରଣାଳୟ ପକ୍ଷରୁ କୁହାଯାଇଛି।
ଅପରପକ୍ଷରେ ୨୦୨୨ ଜାନୁୟାରୀରେ ଦେଶର ଜିଏସ୍ଟି ରାଜସ୍ବ ୧ ଲକ୍ଷ ୪୦ ହଜାର କୋଟି ରହିଥିଲା। ସେହିଭଳି ୨୦୨୨ ଫେବୃୟାରୀରେ ସଂଗ୍ରହ ହୋଇଥିବା ୧.୩୩ ଲକ୍ଷ କୋଟିରୁ କେନ୍ଦ୍ରୀୟ ଜିଏସ୍ଟି ୨୪,୪୩୫କୋଟି ଥିବାବେଳେ ରାଜ୍ୟ ଜିଏସ୍ଟି ୩୦,୭୭୯ କୋଟି ଟଙ୍କା ରହିଛି। ସେହିପରି ଇଣ୍ଟିଗ୍ରେଟେଡ୍ ଜିଏସ୍ଟି ୬୭,୪୭୧ କୋଟି ଟଙ୍କା ଓ ସେସ୍ ୧୦,୩୪୦ କୋଟି ଟଙ୍କା ଅନ୍ତର୍ଭୁକ୍ତ ରହିଛି ବୋଲି ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। ଅର୍ଥ ମନ୍ତ୍ରଣାଳୟ ତଥ୍ୟ ଅନୁସାରେ ଫେବୃୟାରୀରେ ଓଡ଼ିଶାରେ ଜିଏସ୍ଟି ଆଦାୟ ୨୩% ଅଧିକ ହୋଇ ୪,୧୦୧ କୋଟିକୁ ବୃଦ୍ଧି ପାଇଛି। ଚଳିତ ଆର୍ଥିକ ବର୍ଷର ପ୍ରଥମ ତିନିମାସରେ କରୋନା ମହାମାରୀର ୨ୟ ଲହରର ପ୍ରକୋପ ଅଧିକ ଥିବାରୁ ବିଭିନ୍ନ ରାଜ୍ୟ ପୁଣି ଥରେ ଲକ୍ଡାଉନ ଲାଗୁ କରିଥିଲେ। ଏହା ଫଳରେ ଅର୍ଥନୀତି ପ୍ରଭାବିତ ହେବା ସହ ଜିଏସ୍ଟି ରାଜସ୍ବ ହ୍ରାସ ପାଇଥିଲା। ତେବେ କରୋନାର ପ୍ରକୋପ କମିବା ସହ ଲକ୍ଡାଉନ କଟକଣା କୋହଳ ହେବା ସହ ଅର୍ଥନୈତିକ କାର୍ଯ୍ୟକଳାପ ସ୍ବାଭାବିକ ହୋଇଥିଲା। ଏହା ଜିଏସ୍ଟି ରାଜସ୍ବ ବୃଦ୍ଧିର କାରଣ ବୋଲି କୁହାଯାଉଛି। ଚଳିତ ଆର୍ଥିକ ବର୍ଷରେ ୫ମ ଥର ପାଇଁ ମାସିକ ଜିଏସ୍ଟି ରାଜସ୍ବ ୧ ଲକ୍ଷ ୩୦ ହଜାର କୋଟି ଉପରେ ରହିଛି। ତେବେ ଫେବୃୟାରୀ ୨୮ ଦିନିଆ ହୋଇଥିବାରୁ ଜିଏସ୍ଟି ସଂଗ୍ରହ ଜାନୁୟାରୀ ତୁଳନାରେ କମିଥିବା ଅର୍ଥ ମନ୍ତ୍ରଣାଳୟ ପକ୍ଷରୁ କୁହାଯାଇଛି।
