ବେଙ୍ଗାଲୁରୁ,୧୯।୨: କର୍ନାଟକର ଶିକ୍ଷାନୁଷ୍ଠାନଗୁଡ଼ିକରେ ହିଜାବକୁ ନେଇ କିଛିଦିନ ହେଲା ବିବାଦ ଲାଗି ରହିଥିବାବେଳେ ଏହାର ପ୍ରତିବାଦରେ ତୁମ୍କୁରୁସ୍ଥିତ ଜୈନ୍ ପିୟୁ କଲେଜର ଜଣେ ଅଧ୍ୟାପିକା ଚାକିରିରୁ ଇସ୍ତଫା ଦେଇଛନ୍ତି। ଗତ ସପ୍ତାହରେ କର୍ନାଟକ ହାଇକୋର୍ଟଙ୍କ ନିର୍ଦ୍ଦେଶକ୍ରମେ ଶିକ୍ଷାନୁଷ୍ଠାନ ପରିସରରେ ଛାତ୍ରୀଛାତ୍ର ଓ ଶିକ୍ଷକ କେହି ଧର୍ମୀୟ ପ୍ରତୀକ ନ ପିନ୍ଧିବାକୁ ସରକାରଙ୍କ ପକ୍ଷରୁ ନିର୍ଦ୍ଦେଶ ଦିଆଯାଇଛି। ଜୈନ ପିୟୁ କଲେଜର ଇଂଲିଶ ଅଧ୍ୟାପିକା ଥିବା ଚାନ୍ଦିନୀ ନାଜ୍ କହିଛନ୍ତି, ସେ ୩ ବର୍ଷ ହେଲା ଏଠାରେ ଅତିଥି ଅଧ୍ୟାପିକା ଭାବେ କାର୍ଯ୍ୟ କରିଆସୁଛନ୍ତି। କେବେ ସେ କୌଣସି ଅସୁବିଧା ଅନୁଭବ କରି ନ ଥିଲେ। ଗୁରୁବାର ସକାଳେ ପ୍ରିନ୍ସିପାଲ ସମସ୍ତ ଶିକ୍ଷକଙ୍କୁ ଡାକି ହିଜାବ କିମ୍ବା କୌଣସି ଧର୍ମୀୟ ପ୍ରତୀକ ବସ୍ତ୍ର ନ ପିନ୍ଧିବା ପାଇଁ ନିର୍ଦ୍ଦେଶ ଆସିଥିବା କହିଥିଲେ। ଏଭଳି କଟକଣା ତାଙ୍କ ଆତ୍ମସମ୍ମାନ ବିରୋଧରେ ଯାଉଥିବାରୁ ସେ ଇସ୍ତଫା ଦେଇଥିବା କହିଛନ୍ତି। ହିଜାବ ବିନା ସେ କଲେଜରେ କାମ କରିପାରିବେ ନାହିଁ ବୋଲି କହିଥିବାର ଭିଡିଓ ବାର୍ତ୍ତା ସୋସିଆଲ ମିଡିଆରେ ଭାଇରାଲ ହୋଇଛି।
