ବୌଦ୍ଧ,୧୪ା୧(ସ୍ବ.ପ୍ର.): ବୌଦ୍ଧ ଜିଲା ଦୌରାଜଜ୍ ବିକ୍ରମ କୁମାର ପ୍ରଧାନ ଏକ ଯୌତୁକ ଜନିତ ହତ୍ୟା ମାମଲାର ବିଚାର କରି ଅଭିଯୁକ୍ତ ସ୍ବାମୀଙ୍କୁ ୧୦ ବର୍ଷ କାରାଦଣ୍ଡାଦେଶ ଦେବା ସହ ଶଶୁର ଓ ଶାଶୁଙ୍କୁ ନିଦ୍ଦୋର୍ଷରେ ଖଲାସ କରିଛନ୍ତି ।
ମାମଲାରୁ ପ୍ରକାଶ ଯେ, କଣ୍ଟାମାଳ ଥାନା ମାଣିକପୁର ଗ୍ରାମର ରାଜପତି ରଣାଙ୍କ ଝିଅ ଲକ୍ଷ୍ମୀବତୀଙ୍କ ସହ ଉକ୍ତ ଥାନା ଅଧୀନ ଆମ୍ବଗାଁର ସାଇବ ରଣାଙ୍କ ପୁଅ ଶରତ (୨୨)ଙ୍କର ୨୦୧୭ରେ ବିିବାହ ହୋଇଥିଲା। ବିବାହର ୪ ମାସ ପରେ ସ୍ବାମୀ ଶରତ , ଶଶୁର ସାଇବ (୬୦) ଓ ଶାଶୁ ବିଜଳା(୫୫) ଅଧିକ ଯୌତୁକ ଦାବି କରି ଲକ୍ଷ୍ମୀବତୀଙ୍କୁ ନିର୍ଯାତନା ଦେବାରୁ ସେ ବାପ ଘରକୁ ପଲାଇ ଯାଇଥିଲେ । କିଛି ଦିନ ବାପ ଘରେ ରହିବା ପରେ ଗାଁ ଲୋକଙ୍କ ହସ୍ତକ୍ଷେପ ପରେ ଝିଅକୁ ଶଶୁର ଘରକୁ ପଠାଯାଇଥିଲା ।
ହେଲେ ୨୦୧୭ ସେପ୍ଟେମ୍ବର ୧୦ ତାରିଖରେ ଲକ୍ଷ୍ମୀବତୀ ଅସୁସ୍ଥ ଥିବା ନେଇ କକା ଶଶୁର ଦିଲୀପ ରଣା ବାପଘର ଲୋକଙ୍କୁ ଖବର ଦେଇଥିଲେ। ଖବର ପାଇ ବାପା ରାଜପତି ଝିଅ ଘରେ ପହଞ୍ଚିଥିଲେ। ସେତିକିବେଳକୁ ଝିଅ ଲକ୍ଷ୍ମୀବତୀଙ୍କ ମୃତ୍ୟୁ ଘଟିଥିବା ଜାଣିବାକୁ ପାଇଥିଲେ। ତେବେ ଯୌତୁକ ପାଇଁ ତାଙ୍କୁ ହତ୍ୟା କରାଯାଇଥିବା ନେଇ ବାପଘର ଲୋକେ ୧୧ ତାରିଖରେ କଣ୍ଟାମାଳ ଥାନାରେ ଲିଖିତ ଅଭିଯୋଗ କରିଥିଲେ ।
ଅଭିଯୋଗ ପରେ ପୋଲିସ ଏକ ମାମଲା (ନଂ.୧୦୪/୧୭) ରୁଜୁ କରି ତଦନ୍ତ ଆରମ୍ଭ କରିଥିଲା। ପୋଲିସ ଉକ୍ତ ଘଟଣାରେ ସ୍ବାମୀ ଶରତ, ଶଶୁର ସାଇବ, ଶାଶୁ ବିଜଳା ଓ ଶରତଙ୍କ ଭିଣୋଇ ଜପ ରଣା ଓ ମାମୁଁ ତୀର୍ଥ ରଣାଙ୍କ ନାମରେ ମାମଲା ରୁଜୁ କରିଥିଲା ା ଉକ୍ତ ଘଟଣାରେ ଏବେ ବି ଜପ ଓ ତୀର୍ଥ ଫେରାର ଥିବା ବେଳେ ମାମଲାଟି ଏସଟି କେସ ନଂ ୧/୧୮ ହୋଇ ଅଭିଯୁକ୍ତ ଶରତ, ସାଇବ ଓ ବିଜଳାଙ୍କ ବିଚାର ହୋଇଥିଲା। ମାମଲାରେ ସରକାରଙ୍କ ପକ୍ଷରୁ ୧୪ଜଣ ସାକ୍ଷୀଙ୍କ ବୟାନକୁ ଭିତ୍ତି କରି ଜିଲା ଦୌରାଜଜ୍ ପ୍ରଧାନ ଅଭିଯୁକ୍ତ ସ୍ବାମୀ ଶରତଙ୍କୁ ୧୦ ବର୍ଷ କାରାଦଣ୍ଡାଦେଶ ଦେବା ସହ ପ୍ରମାଣ ଅଭାବରୁ ଶଶୁର ସାଇବ ଓ ଶାଶୁ ବିଜଳାଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି। ମାମଲାକୁ ସରକାରଙ୍କ ପକ୍ଷରୁ ପିପି ସବିତା କୁମାରୀ ପଣ୍ଡା ପରିଚାଳନା କରୁଥିଲେ।
