ନୂଆଦିଲ୍ଲୀ, ୧୭।୧୨:କରୋନାର ନୂଆ ଭାରିଆଣ୍ଟ ଓମିକ୍ରନ୍ ସଂକ୍ରମଣ ବଢ଼ିଚାଲିଥିବାରୁ କେନ୍ଦ୍ର ସରକାର ଚିନ୍ତିତ ହୋଇପଡ଼ିଛନ୍ତି। ବୁଧବାର ଦେଶରେ ଆଉ ୧୪ ନୂଆ ମାମଲା ଚିହ୍ନଟ ହୋଇଛି। କର୍ନାଟକରେ ୫, ତେଲଙ୍ଗାନା ଓ ଦିଲ୍ଲୀରେ ୪ ଲେଖାଏଁ ଏବଂ ଗୁଜରାଟରେ ଜଣେ ସଂକ୍ରମିତ ହେବା ପରେ ମୋଟ ମାମଲା ୮୭କୁ ବୃଦ୍ଧି ପାଇଛି। ଏହାକୁ ଦୃଷ୍ଟିରେ ରଖି କେନ୍ଦ୍ର ସରକାର ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକ ସହ ଅକ୍ସିଜେନ୍ ଯୋଗାଣ, ଚିକିତ୍ସା ଉପକରଣ, ଭେଣ୍ଟିଲେଟର, କନ୍ସେଣ୍ଟ୍ରେଟର ସ୍ଥିତି ସମ୍ପର୍କରେ ସମୀକ୍ଷା କରିଛନ୍ତି। ଅକ୍ସିଜେନ୍ ଓ ଚିକିତ୍ସା ଉପକରଣ ପ୍ରସ୍ତୁତ ରଖିବାକୁ ରାଜ୍ୟଗୁଡ଼ିକୁ କେନ୍ଦ୍ର ପକ୍ଷରୁ ପରାମର୍ଶ ଦିଆଯାଇଛି। ସଂକ୍ରମଣ ବୃଦ୍ଧି ଘଟିଲେ ଏହାର ମୁକାବିଲା ପାଇଁ ପର୍ଯ୍ୟାପ୍ତ ପ୍ରସ୍ତୁତି ଆବଶ୍ୟକ। କୋଭିଡ୍-୧୯ ମହାମାରୀର ମୁକାବିଲା ଲାଗି ପର୍ଯ୍ୟାପ୍ତ ପରିମାଣର ଅବାଧ ମେଡିକାଲ ଅକ୍ସିଜେନ୍ ଯୋଗାଣ ସବୁଠୁ ଗୁରୁତ୍ୱପୂର୍ଣ୍ଣ। ତେଣୁ ଦୈନିକ ଭିତ୍ତିରେ ଉପରୋକ୍ତ ସାମଗ୍ରୀ କେତେ ଉପଲବ୍ଧ ରହିଛି ତାହା ସୁନିଶ୍ଚିତ କରିବା ଲାଗି କେନ୍ଦ୍ର ସ୍ବାସ୍ଥ୍ୟ ସଚିବ ରାଜେଶ ଭୂଷଣ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ ପରାମର୍ଶ ଦେଇଛନ୍ତି।
ନୂଆ ସ୍ଥାପନ ହୋଇଥିବା ଅକ୍ସିଜେନ୍ ପ୍ଲାଣ୍ଟଗୁଡ଼ିକ କେତେ ପରିମାଣରେ ଅକ୍ସିଜେନ୍ ଯୋଗାଇପାରିବ, ଏହାର ଚାପ ଓ ବିଶୁଦ୍ଧତା ଆଦି ଉପରେ ସୁନିଶ୍ଚିତ ହେବା ଲାଗି ଡିସେମ୍ବର ସୁଦ୍ଧା ମକ୍ ଡ୍ରିଲ୍ ସମ୍ପୂର୍ଣ୍ଣ କରିବାକୁ ରାଜ୍ୟଗୁଡ଼ିକୁ କୁହାଯାଇଛି। ବର୍ତ୍ତମାନ ସୁଦ୍ଧା ଦେଶରେ ୩,୨୩୬ ପିଏସ୍ଏ ପ୍ଲାଣ୍ଟ ପ୍ରତିଷ୍ଠା ହୋଇଛି ଯାହାର ମୋଟ ଅକ୍ସିଜେନ୍ ଉତ୍ପାଦନ କ୍ଷମତା ୩,୭୮୩ ମେଟ୍ରିକ୍ ଟନ୍। ଏହା ବ୍ୟତୀତ ପିଏମ୍ କେୟାର୍ସ ଏବଂ ଜରୁରୀ କୋଭିଡ୍ ରିଲିଫ୍ ପ୍ୟାକେଜ୍ରେ ରାଜ୍ୟଗୁଡ଼ିକୁ ୧,୧୪,୦୦୦ ଅକ୍ସିଜେନ୍ କନ୍ସେଣ୍ଟ୍ରେଟର ଯୋଗାଇ ଦିଆଯାଇଛି।
