ପାରାଦୀପ,୯।୧୨(ସ୍ବ.ପ୍ର.): ପାରାଦୀପର ଏଏମ୍ଏନ୍ଏସ୍ (ଆର୍ସେଲର ମିତ୍ତଲ ନିପ୍ପନ ଷ୍ଟିଲ) କମ୍ପାନୀର ମୁଖ୍ୟ ଫାଟକ ଆଗରେ ବୁଧବାର ୪ ଜଣ ଠିକା ଶ୍ରମିକଙ୍କ ପରିବାର ଧାରଣା ଦେଇଥିଲେ। ୮ ମାସର ବକେୟା ଦରମା, ସ୍ଥାୟୀ ନିଯୁକ୍ତି ଦାବିରେ ଉକ୍ତ ଶ୍ରମିକ ପରିବାର ସହର ପରିଥିଲେ। ସାରେ କମ୍ପାନୀ ଅଧିକାରୀ ସେମାନଙ୍କ ସହ ଆଲୋଚନା କରି ଚଳିତମାସ ଶେଷ ସୁଦ୍ଧା ସେମାନଙ୍କ ଦାବି ପୂରଣ କରାଯିବ ବୋଲି ପ୍ରତିଶ୍ରୁତି ଦେବା ପରେ ଧାରଣା ଟଳିଛି। ଧାରଣାକାରୀ ପରିବାର ଲୋକେ ହେଲେ ଉକ୍ତ କମ୍ପାନୀ ସଂଲଗ୍ନ ନୂଆଗଡର ଆଲୋକ ରଞ୍ଜନ ସାମଲ, ଅଶିତ ଶେଖର ସ୍ବାଇଁ, ସୁଧାଂଶୁ ସେନାପତି ଓ ରୁଦ୍ରନାରାୟଣ ସେଠୀ। ଏମାନେ ଦେଇଥିବା ଦାବିପତ୍ରରେ ଦର୍ଶାଯାଇଛି ଯେ, ଉକ୍ତ କମ୍ପାନୀ ପୂର୍ବରୁ ଏସାର ଷ୍ଟିଲ ଥିଲା। କମ୍ପାନୀ ପାଇଁ ଜମି ଯାଇଛି। ଜମିହରା ପରିବାର ଲୋକଙ୍କ ପାଇଁ ସ୍ଥାୟୀ ନିଯୁକ୍ତି ଦେବା ବଦଳରେ ସେମାନେ ଠିକା ସଂସ୍ଥା ଜରିଆରେ କାମ କରୁଛନ୍ତି। ଠିକା ସଂସ୍ଥା ଆମକୁ ୮ ମାସ ହେଲା ଦରମା ଦେଇନାହାନ୍ତି। ସେଥିପାଇଁ ଆମେ ଧାରଣା ଦେବାକୁ ବାଧ୍ୟ ହେଲୁ ବୋଲି ଆଲୋକ କହିଛନ୍ତି। ଏ ସମ୍ପର୍କରେ କମ୍ପାନୀର ମାନବ ସମ୍ବଳ ଅଧିକାରୀ ପ୍ରଫୁଲ୍ଲ ମହାନ୍ତିଙ୍କୁ ଯୋଗାଯୋଗ କରାଯାଇଥିଲା ସେ କୌଣସି ପ୍ରତିକ୍ରିୟା ଦେଇ ନ ଥିଲେ।
