ବାଉଁଶୁଣୀ,୧୨ା୯(ଡି.ଏନ.ଏ.): ବୟସରୁ ୩୦ ବର୍ଷର ସାନ ଜଣେ ଯୁବତୀଙ୍କୁ ବିବାହ ପାଇଁ ଜିଦ୍ ଧରିଛନ୍ତି ଶୈବପୀଠର ଜଣେ ୫୦ ବର୍ଷର ପୂଜକ l ଏହି ଘଟଣା ଅଞ୍ଚଳରେ ଆଲୋଚନାର ବିଷୟ ହୋଇଛି।
ବୌଦ୍ଧ ଜିଲା ମନମୁଣ୍ଡା ଥାନା ଶୁଣ୍ଢିପଦର ପଞ୍ଚାୟତ ଅଞ୍ଚଳର ୨୦ ବର୍ଷୀୟା ଯୁବତୀ ଗତ ୭ ତାରିଖ ସନ୍ଧ୍ୟାରେ ଘରୁ ନିଖୋଜ ହୋଇଯାଇଥିଲେ। ଏନେଇ ଯୁବତୀଙ୍କ ବାପା ୯ ତାରିଖରେ ଥାନାରେ ଅଭିଯୋଗ କରିଥିଲେ । ପରିବାର ଲୋକେ ଖୋଜାଖୋଜି କରିବା ପରେ ସୁବର୍ଣ୍ଣପୁର ଜିଲା ବୀରମହାରାଜପୁର ଥାନା ଅଞ୍ଚଳର ଜଣେ ଶିବ ମନ୍ଦିର ପୂଜକ ଝିଅଙ୍କୁ ଅପହଣର କରି ନେଇଥିବା ଜାଣିବାକୁ ପାଇଥିଲେ।
ପରେ ଯୁବତୀଙ୍କ ପରିବାର ଲୋକେ ସମ୍ପୃକ୍ତ ପୂଜକ ଓ ଝିଅଙ୍କୁ ମନମୁଣ୍ଡା ଥାନାକୁ ଆଣିଥିଲେ। ପୂଜକ ଦ୍ୱିତୀୟ ସ୍ତ୍ରୀ ଭାବେ ଯୁବତୀଙ୍କୁ ବିବାହ କରିବାକୁ ଅଡି ବସିଥିଲେ। ପୂଜକ ବିବାହିତ ଥିବା ବେଳେ ତାଙ୍କର ସ୍ତ୍ରୀ ଓ ୩ ପୁଅ ଅଛନ୍ତି। ତାଙ୍କର ବଡ଼ ପୁଅ ମଧ୍ୟ ବିବାହିତ। ଏହାସତ୍ତ୍ୱେ ସେ ଦ୍ୱିତୀୟ ବିବାହ କରିବାକୁ ଜିଦ୍ ଧରିବାରୁ ଯୁବତୀଙ୍କ ପରିବାର ଲୋକେ ତାଙ୍କୁ ବୁଝାଇ ଥିଲେ। ହେଲେ ସେ ମାନି ନ ଥିଲେ। ପୂଜକ ଜଣକ ଆସନ୍ତା ୧୦ ଦିନ ମଧ୍ୟରେ ଯୁବତୀଙ୍କୁ କୋର୍ଟରେ ବିବାହ କରିବେ ବୋଲି ପୋଲିସକୁ ଲିଖିତ ଭାବେ ଜଣାଇଛନ୍ତି।
ଅନ୍ୟପକ୍ଷେ ମନ୍ଦିର ପୂଜକ ଗୁଣିଗାରେଡି କରି ଝିଅଙ୍କୁ ଫସାଇ ଦେଇଥିବା ପରିବାର ଲୋକେ ଅଭିଯୋଗ କରିଛନ୍ତି। ତେବେ ଏହାକୁ ପୂଜକ ଅସ୍ବୀକାର କରିଛନ୍ତି। ଶିବ ମନ୍ଦିରକୁ ଠାକୁର ଦର୍ଶନ କରିବାକୁ ଆସୁଥିବା ଜଣେ ଯୁବତୀଙ୍କୁ ପ୍ରେମ ଜାଲରେ ଫସାଇବା ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।
