ଭୁବନେଶ୍ୱର,୨୧।୮(ବ୍ୟୁରୋ): ସ୍ମାର୍ଟସିଟି ଭୁବନେଶ୍ୱରରେ ଆଉ ହେବନି ପାର୍କିଂ ସମସ୍ୟା। ବେଆଇନ ପାର୍କିଂ ଓ ଫି ବାଟମାରଣା ରୋକିବା ପାଇଁ ଭୁବନେଶ୍ୱର ସ୍ମାର୍ଟ ସିଟି ଲିମିଟେଡ୍ (ବିଏସ୍ସିଏଲ୍) ପକ୍ଷରୁ ପ୍ରସ୍ତୁତ ହେଉଛି ସ୍ମାର୍ଟ ଆପ୍ ‘ମୋ ପାର୍କିଂ’। ଲୋକମାନେ ଘରୁ ବାହାରିବା ପୂର୍ବରୁ ନିର୍ଦ୍ଦିଷ୍ଟ ସ୍ଥାନରେ ଗାଡ଼ି ପାର୍କିଂ ପାଇଁ ଆପ୍ ଦ୍ୱାରା ବୁକିଂ କରିପାରିବେ। ଫଳରେ ଗନ୍ତବ୍ୟସ୍ଥଳରେ ପହଞ୍ଚତ୍ବା ବେଳକୁ ପାର୍କିଂ ପାଇଁ ସ୍ଥାନ ସୁରକ୍ଷିତ ରହିଥିବ। ଆସନ୍ତା ସେପ୍ଟେମ୍ବର ପହିଲାରୁ ଏହି ‘ପାର୍କିଂ ସେନ୍ସର’ ବ୍ୟବସ୍ଥା କାର୍ଯ୍ୟକାରୀ ହେବ। ଶିଶୁଭବନ ଛକରୁ ବାଣୀବିହାର ଛକ ପର୍ଯ୍ୟନ୍ତ ଏହି ବ୍ୟବସ୍ଥାରେ ୧ହଜାର ସେନ୍ସର ଲାଗିବାକୁ ଥିବାବେଳେ ପ୍ରାରମ୍ଭିକ ପର୍ଯ୍ୟାୟରେ ଶିଶୁ ଭବନ ଛକରୁ ରାଜମହଲ ଛକ ପର୍ଯ୍ୟନ୍ତ ୧୬୦ଟି ସେନ୍ସର ଲଗାଯାଇଛି। ପ୍ରତି ଗାଡି ପାଇଁ ଗୋଟିଏ ସେନ୍ସର କାମ କରିବ। ଅନ୍ଲାଇନ୍ରେ ବୁକିଂ ଓ ପେମେଣ୍ଟ ହେବ। ପାର୍କିଂସ୍ଥଳରେ କେତେ ଗାଡି କେତେ ସମୟ ଧରି ରହୁଛି ଓ ବାହାରୁଛି ସେସବୁର ତଥ୍ୟ ଅନ୍ଲାଇନ୍ରେ ରହିବ। ଫଳରେ ପୂର୍ବରୁ ହେଉଥିବା ବାଟମାରଣା ଆଉ ହୋଇପାରିବ ନାହିଁ। ଭୁବନେଶ୍ୱର ଡଟ୍ ମି ସହିତ ସମନ୍ବିତ ହୋଇ ଏହି ଆପ୍ କାମ କରିବ। ପାର୍କିଂ ସ୍ଥଳରେ ଗାଡି ଆସି ରହିବା କ୍ଷଣି ଏକ ବିପ୍ ସାଉଣ୍ଡ ହେବ, ଯାହାକି ବିଏମ୍ସି, ସ୍ମାର୍ଟସିଟି ଅଫିସ୍ ଏବଂ ଏଜେଣ୍ଟ ପାଖରେ ଥିବା ଟିକେଟ୍ ମେଶିନ୍କୁ ଆସିବ। ସେହିପରି ପାର୍କିଂରୁ ଗାଡି ବାହାରିବା ସମୟରେ ମଧ୍ୟ ସମାନ ଧରଣର ବିପ୍ ହେବ। ଘଣ୍ଟାଏ ପାଇଁ ପାର୍କିଂ ରହିବ। ବେଆଇନ୍ ପାର୍କିଂ ହେଲେ ସେନ୍ସର ଜରିଆରେ ପାର୍କିଂ ଫି’ ଆଦାୟ କରୁଥିବା କର୍ମଚାରୀଙ୍କ ପାଖକୁ ସୂଚନା ଯିବ। ସୂଚନାଯୋଗ୍ୟ, ବିଏସ୍ସିଏଲ୍ର ସିଇଓ ସଞ୍ଜୟ କୁମାର ସିଂହ ଦାୟିତ୍ୱ ନେବା ପରେ ପ୍ରଥମ ପରୀକ୍ଷାମୂଳକ ଭାବେ ଏହା ଲାଗୁ କରିବା ପାଇଁ ୬୦ ଦିନ ଅର୍ଥାତ୍ ଅଗଷ୍ଟ ୩୧ ପର୍ଯ୍ୟନ୍ତ ସମୟ ରଖିଥିଲେ। ଭୁବନେଶ୍ୱର ଅପରେଶନ ସେଣ୍ଟର (ବିଓସି) ସହିତ ସ୍ମାର୍ଟ ସିଟି ମିଳିତ ଭାବେ ଏହି ବ୍ୟବସ୍ଥା ଆରମ୍ଭ କରିଛି।
