ନୂଆଦିଲ୍ଲୀ, ୧୩।୧୧: ଲେହକୁ ଲଦାଖ ପରିବର୍ତ୍ତେ ଜମ୍ମୁ-କଶ୍ମୀରର ଏକ ଅଂଶ ଦେଖାଇବାକୁ ନେଇ କେନ୍ଦ୍ର ସରକାର ଟୁଇଟରକୁ ନୋଟିସ ଜାରି କରିଛନ୍ତି ଏବଂ ଆଇନଗତ କାର୍ଯ୍ୟାନୁଷ୍ଠାନ ପାଇଁ ଚେତାବନୀ ଦେଇଛନ୍ତି। କେନ୍ଦ୍ର ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟର ନଭେମ୍ବର ୯ରେ ଟୁଇଟରର ବିଶ୍ୱ ଉପାଧ୍ୟକ୍ଷଙ୍କୁ ପଠାଯାଇଥିବା ବିଜ୍ଞପ୍ତିରେ କହିଛି ଯେ ଭାରତୀୟ ସଂସଦର ସାର୍ବଭୌମତ୍ୱ ପାଇଁ ଇଚ୍ଛାଶକ୍ତିକୁ କ୍ଷୁର୍ଣ୍ଣ କରିବାକୁ ଏହା ଏକ ପ୍ରୟାସ। ସୂଚନାଯୋଗ୍ୟ, ଲଦାଖକୁ କେନ୍ଦ୍ର ଶାସିତ ରାଜ୍ୟ ଭାବରେ ଘୋଷଣା କରାଯାଇଛି ଏବଂ ଲେହ ଏହାର ମୁଖ୍ୟାଳୟ ଅଟେ। କିନ୍ତୁ ଟୁଇଟର ଲେହକୁ ଜମ୍ମୁ କଶ୍ମୀରର ଏକ ଅଂଶ ବୋଲି ବର୍ଣ୍ଣନା କରିଛି। ଭୁଲ ମାନଚିତ୍ର ଦେଖାଇ ଭାରତର ଅଖଣ୍ଡତା ସହିତ ଖେଳିବା ପାଇଁ କାହିଁକି ଚେଷ୍ଟା କରାଯାଉଛି ଏବଂ ଏହାର କର୍ମଚାରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ ନୁହେଁ ବୋଲି ୫ ଦିନ ମଧ୍ୟରେ ମନ୍ତ୍ରଣାଳୟ ଟୁଇଟରକୁ କହିଥିଲା। ଟୁଇଟରର ଏଭଳି ଭୁଲ ପାଇଁ ଆଇଟି ଆକ୍ଟର ଧାରା ୬୯ଏ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏହି ନିୟମ ଅନୁଯାୟୀ ସମ୍ପୃକ୍ତ କର୍ମଚାରୀଙ୍କୁ ୬ ମାସ ଜେଲ ହୋଇପାରିବ। ଉଲ୍ଲେଖନୀୟ କଥା ହେଉଛି, ପୂର୍ବରୁ ଏକ ଲାଇଭ ପ୍ରସାରଣରେ ଟୁଇଟର ଲେହକୁ ଚାଇନର ଅଂଶ ଦେଖାଇଥିଲା। ଏହା ପରେ ଆଇଟି ମନ୍ତ୍ରଣାଳୟ ଟୁଇଟର ସିଇଓ ଜ୍ୟାକ ଡୋର୍ସିଙ୍କୁ ଚିଠି ଲେଖି ଏହାର ଦୃଢ ଆପତ୍ତି ପ୍ରକାଶ କରିଥିଲା। ପରେ ଯୁଗ୍ମ ସଂସଦୀୟ କମିଟି ଆଗରେ ଟୁଇଟର ମଧ୍ୟ କ୍ଷମା ପ୍ରାର୍ଥନା କରିଥିଲା।
