ପାଟଣାଗଡ଼, ୨୬ା୭(ଡି.ଏନ.ଏ.) ବଲାଙ୍ଗୀର ଜିଲା ପାଟଣାଗଡ଼ ଉପଖଣ୍ଡ ପ୍ରଶାସନ ବେଆଇନ ମୋରମ ଚୋରା ଚାଲାଣ ବେଳେ ୪ ଟ୍ରାକ୍ଟର, ଗୋଟିଏ ଜେସିବିକୁ ଜବତ କରିଛି। ସୋମବାର ତହସିଲ ଅଫିସ ଖୋଲିଲା ପରେ ଜବତ ଗାଡି ମାଲିକଙ୍କଠାରୁ ଜରିମାନା ଆଦାୟ କରାଯିବ ବୋଲି ବିଭାଗୀୟ ଅଧିକାରୀ କହିଛନ୍ତି। ଏହାକୁ ନେଇ ବନ ବିଭାଗ ଓ ଜିଲା ପ୍ରଶାସନ ମଧ୍ୟରେ ବିବାଦ ସୃଷ୍ଟି ହୋଇଛି।
ସୂଚନା ଅନୁଯାୟୀ, ପାଟଣାଗଡ଼ ବନବିଭାଗ ତରଫରୁ ପିପଲଡାବର ଗ୍ରାମଠାରୁ ଗୟଲମରା ପର୍ଯ୍ୟନ୍ତ ୬ କିଲୋମିଟର ରାସ୍ତା କାମ ଏମ୍ଜିଏନ୍ଆର୍ଇଜିଏ ଯୋଜନାରେ କରାଯାଉଛି। ଏହି ରାସ୍ତାକାମ ପାଇଁ ୪,୪୪,୨୮୨ ଟଙ୍କା ବ୍ୟୟ ଅଟକଳ ରହିଛି। ହେଲେ ଶ୍ରମିକ ଲଗା ନ ଯାଇ ପାଟଣାଗଡ଼ ବନବିଭାଗ ଦ୍ୱାରା ଜେସିବି ଦ୍ୱାରା କାମ କରାଯାଉଥିଲା। ସେହି କାମ ପାଇଁ ପିପଲଡାବରଠାରେ ଥିବା ଗୋଚର ଜମିରୁ ଜେସିବି ଲଗାଇ ଟ୍ରାକ୍ଟରରେ ମୋରମ ଚାଲାଣ କରାଯାଉଥିଲା। ଖବର ପାଇ ମାଜିଷ୍ଟ୍ରେଟ ଦାୟିତ୍ୱରେ ଥିବା ପାଟଣାଗଡ ସହକାରୀ ଜିଲାପାଳ କ୍ଷୀରୋଦ ଚନ୍ଦ୍ର ସାହୁ ଚଢାଉ କରି ଜେସିବି ଏବଂ ଟ୍ରାକ୍ଟରଗୁଡିକୁ ଜବତ କରିଥିଲେ। ଏବେ ସେହି ଗାଡ଼ିଗୁଡିକ ପାଟଣାଗଡ ଥାନା ହେପାଜତରେ ରହିଛି।
ଏ ନେଇ ପାଟଣାଗଡ ରେଞ୍ଜର ବାସୁଦେବ ନାଥଙ୍କୁ ପଚାରିବାରୁ ଫରେଷ୍ଟର ଏହି କାମର ଦାୟିତ୍ୱରେ ଥିଲେ। ଏହା ସରକାରୀ କାମ ହୋଇଥିବାରୁ ମୋରମ ଉଠାଇବାକୁ ପ୍ରଶାସନର କୌଣସି ସ୍ବୀକୃତି ଦରକାର ନାହିଁ। ବର୍ତ୍ତମାନ ଲକ୍ଡାଉନରେ ଶ୍ରମିକ ମିଳୁ ନ ନାହାନ୍ତି। ଶୀଘ୍ର କାମ ସାରିବା ପାଇଁ ମେଶିନ ଲଗାଇ କାମ କରାଯାଉଥିଲା ବୋଲି ସେ କହିଛନ୍ତି। ଏ ନେଇ ମାଜିଷ୍ଟ୍ରେଟ ଦାୟିତ୍ୱରେ ଥିବା ସାହୁଙ୍କୁ ପଚାରିବାରୁ କେଉଁ କାମ କିପରି ଭାବେ ହେଉଥିଲା ତାହା ଅନୁସନ୍ଧାନ ପରେ ଜଣାପଡିବ। ସେହି ଅନୁସାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।
