ପାଲଲହଡା,୨୨।୧୨(ଡି.ଏନ.ଏ.) – ଜଙ୍ଗଲକୁ ଜାଳେଣି ସଂଗ୍ରହ ପାଇଁ ଯାଇଥିବା ଜଣେ ଯୁବକଙ୍କ ମୃତ୍ୟୁକୁ ନେଇ ବନ କର୍ମଚାରୀଙ୍କ ବିରୋଧରେ ପାଲଲହଡ଼ା ଥାନାରେ ଏତଲା ଦିଆଯାଇଛି। ସ୍ବାମୀଙ୍କୁ କର୍ମଚାରୀମାନେ ପିଟି ପିଟି ମାରିଦେଇଥିବା ମୃତ ଯୁବକଙ୍କ ସ୍ତ୍ରୀ ଅଭିଯୋଗ କରିବା ପରେ ଅକଳରେ ପଡ଼ିଛି ବନ ବିଭାଗ। ଏ ନେଇ ପୋଲିସ ଏକ ମାମଲା ରୁଜୁ କରି ତଦନ୍ତ ଚଳାଇଛି।
ଅଭିଯୋଗରୁ ପ୍ରକାଶ ଯେ, ପାଲଲହଡା ଥାନା ବାତିସୂଆଁ ପଞ୍ଚାୟତ ସୋଲଡ଼ା ଗ୍ରାମର ବୁଧୁରାମ କୁଙ୍କାଲ ଟ୍ରାକ୍ଟର ଚାଳକ ଭାବେ କାର୍ଯ୍ୟ କରନ୍ତି। ଶୁକ୍ରବାର ସାରେ ବୁଧୁରାମ ଏବଂ ସ୍ତ୍ରୀ ପ୍ରମିଳା ଜାଳେଣି ପାଇଁ ପାଖ ଜଙ୍ଗଲକୁ ଯାଇଥିଲେ। ଦୁହେଁ କାଠ ଧରି ଫେରୁଥିବା ବେଳେ ପାଲଲହଡା ଫରେଷ୍ଟର ଭାରତୀ କପରଦାର ଏବଂ କର୍ମଚାରୀମାନେ ପିଛା କରିଥିଲେ। ଭୟରେ ସମ୍ପୃକ୍ତ ଦମ୍ପତି ଦୌଡିଥିଲେ। ସ୍ତ୍ରୀ ପ୍ରମିଳା ଘରେ ପହଞ୍ଚିଥିଲେ ହେଁ ବୁଧୁରାମ ଘରକୁ ଫେରି ନ ଥିଲେ। ଶନିବାର ସକାଳେ ବୁଧୁରାମଙ୍କ ମୃତଦେହ ଉପଖଣ୍ଡ ଚିକିତ୍ସାଳୟରେ ଥିବା ପ୍ରମିଳା ଖବର ପାଇଥିଲେ। ବୁଧୁରାମଙ୍କ ମୁହଁରେ କ୍ଷତ ଚିହ୍ନ ଥିବାରୁ ବନ କର୍ମଚାରୀମାନେ ତାଙ୍କୁ ପିଟି ପିଟି ମାରିଦେଇଥିବା ପ୍ରମିଳା ପାଲଲହଡା ଥାନାରେ ଲିଖିତ ଅଭିଯୋଗ କରିଛନ୍ତି। ଏ ସମ୍ପର୍କରେ ଫରେଷ୍ଟର କପରଦାର କହିଛନ୍ତି, ପାଟ୍ରୋଲିଂ କରୁଥିବା ବନ କର୍ମଚାରୀଙ୍କୁ ଦେଖି ଜଙ୍ଗଲପଟୁ ଆସୁଥିବା ବୁଧୁରାମ ଦୌଡ଼ିଥିଲେ। କର୍ମଚାରୀମାନେ ତାଙ୍କ ପଛରେ ଯାଇଥିଲେ। କିଛି ସମୟ ପରେ ବୁଧୁରାମ ପଡିଥିବା ଦେଖି କର୍ମଚାରୀମାନେ ଗାଡିରେ ପାଲଲହଡା ଡାକ୍ତରଖାନା ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ତାଙ୍କ ସ୍ତ୍ରୀ କରିଥିବା ଅଭିଯୋଗ ଭିତ୍ତିହୀନ। କୌଣସି କର୍ମଚାରୀ ବୁଧୁରାମଙ୍କୁ ଆକ୍ରମଣ କରିନାହାନ୍ତି ବୋଲି ଫରେଷ୍ଟର ପ୍ରକାଶ କରିଛନ୍ତି। ପାଲଲହଡା ଥାନା ଅଧିକାରୀ କନକ ମାଝି କହିଛନ୍ତି, ପ୍ରମିଳାଙ୍କ ଅଭିଯୋଗ ଆଧାରରେ ନଂ. ୧୮୦/୧୯ ମାମଲା ରୁଜୁ କରାଯାଇ ତଦନ୍ତ ଚାଲୁ ରହିଛି। ବ୍ୟବଚ୍ଛେଦ ରିପୋର୍ଟ ଆସିବା ପରେ ତଦନ୍ତର ଦିଗ ନିର୍ଦ୍ଧାରଣ କରାଯିବ।
