ସୁୁନ୍ଦରଗଡ,୧୩।୧୧ (ଡି.ଏନ୍.ଏ.)- ଜାଲ ସାର୍ଟିଫିକେଟ ଦେଇ ଜଣେ ବ୍ୟକ୍ତି ଗତ ୩ବର୍ଷ ଧରି ସରକାରୀ ଡାକ୍ତର ଭାବେ ଚାକିରି ପାଇ ରୋଗୀସେବା କରୁଥିଲେ ା ଏ ସଂକ୍ରାନ୍ତରେ ଅଭିଯୋଗ ହେବା ପରେ ଧରିତ୍ରୀରେ ଏକ ରିପୋର୍ଟ ସେପ୍ଟେମ୍ବର ୨୭ ତାରିଖରେ ପ୍ରକାଶ ପାଇଥିଲା ା ଏବେ ସୂଚନା ଅଧିକାର ଆଇନ ବଳରେ ସେହି ଡାକ୍ତରଙ୍କ ଜାଲ ସାର୍ଟିଫିକେଟ ତଥ୍ୟ ପଦାକୁ ଆସିଛି ା ସୁନ୍ଦରଗଡ ଜିଲା ନୂଆଗାଁ ବ୍ଲକ ସ୍ବାସ୍ଥ୍ୟକେନ୍ଦ୍ରରେ ନିଯୁକ୍ତି ପାଇଥିବା ଡା.ପଦ୍ମନାଭ ମୁଖୀ ବାରୁଆ ନାମକ ଏହି ନକଲି ଡାକ୍ତରଙ୍କୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି ା
ଜାଲ ସାର୍ଟିଫିକେଟରେ ଜଣେ ଡାକ୍ତରଙ୍କୁ ନିଯୁକ୍ତି ଦିଆଯାଇଥିବା ନେଇ ନୂଆଁଗାଁ ଅଞ୍ଚଳବାସୀଙ୍କ ତରଫରୁ ସୁନ୍ଦରଗଡ ଜିଲାପାଳଙ୍କଠାରେ ଅଭିଯୋଗ ହୋଇଥିଲା। ସମ୍ପୃକ୍ତ ବ୍ୟକ୍ତିଙ୍କ ଡାକ୍ତରୀ ସାର୍ଟିଫିକେଟ ଜାଲ୍ ବୋଲି ସୂଚନା ଅଧିକାର ଆଇନ ବଳରେ ମିଳିଥିବା ତଥ୍ୟରୁ ସ୍ପଷ୍ଟ ହୋଇଛି । ୨୦୧୬ ମସିହାରେ ଏହି ଡାକ୍ତରଙ୍କୁ ନିଯୁକ୍ତି ପ୍ରଦାନ ବେଳେ ସାର୍ଟିଫିକେଟଗୁଡିକୁ ଠିକ ଭାବେ ଯାଞ୍ଚ କରା ନ ଯାଇ କିଭଳି ତାଙ୍କୁ ନିଯୁକ୍ତି ଦିଆ ଯାଇଥିଲା ସେ ନେଇ ସ୍ବାସ୍ଥ୍ୟ ବିଭାଗର ସ୍ବଚ୍ଛତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି । ଅଭିଯୋଗ ପରେ ଜିଲା ମୁଖ୍ୟ ଚିକିତ୍ସାଧିକାରୀଙ୍କ ତରଫରୁ ସମ୍ପୃକ୍ତ ଡାକ୍ତରଙ୍କ ଡାକ୍ତରୀ ଶିକ୍ଷା ସାର୍ଟିଫିକେଟର ବୈଧତା ସମ୍ପର୍କରେ ସମ୍ବଲପୁର ବିଶ୍ୱବିଦ୍ୟାଳୟ କର୍ତ୍ତୃପକ୍ଷ, ବୀର ସୁରେନ୍ଦ୍ର ସାଏ ମେଡିକାଲ କଲେଜ କର୍ତ୍ତୃପକ୍ଷଙ୍କୁ ପତ୍ର ଲେଖାଯାଇଛି । ଏଥିସହିତ ସମ୍ପୃକ୍ତ ଡାକ୍ତର ବୁର୍ଲାସ୍ଥିତ ବୀର ସୁରେନ୍ଦ୍ର ସାଏ ମେଡିକାଲ କଲେଜରୁ ଡାକ୍ତରୀ ପାସ ପରେ ଓଡ଼ିଶା ମେଡିକାଲ କାଉନସିଲରେ ନାମ ପଞ୍ଜୀକରଣ ନ କରି କିଭଳି ବିହାର ମେଡିକାଲ କାଉନସିଲରେ ନାମ ପଞ୍ଜୀକରଣ କଲେ ତାହା ସନ୍ଦେହ ଘେରରେ ରହିଛି। ଏଥିସହିତ ଅଲ ଇଣ୍ଡିଆ ମେଡିକାଲ କାଉନସିଲରେ ତାଙ୍କ ନାମ ପଞ୍ଜୀକରଣ ହୋଇଛି କି ନାହିଁ ସେ ସମ୍ପର୍କରେ ଜାଣିବା ପାଇଁ ଚିଠି ଲେଖା ଯାଇଥିବା ଜିଲା ମୁଖ୍ୟ ଚିକିତ୍ସାଧିକାରୀ ଡା ସରୋଜ କୁମାର ମିଶ୍ର ପ୍ରକାଶ କରିଛନ୍ତି। ଡା ପଦ୍ମନାଭ ମୁଖୀ ବାରୁଆ ନାମଧାରୀ କୌଣସି ଛାତ୍ର ୨୦୦୨ ମସିହା ଫାଇନାଲ କିମ୍ବା ସପ୍ଲିମେଣ୍ଟାରୀ ଏମ୍ବିବିଏସ୍ ପରୀକ୍ଷା ଦେଇ ନ ଥିବା ସୂଚନା ଅଧିକାର ଆଇନ ବଳରେ ଜଣାପଡିଛି । ଏହି ଘଟଣା ଜଣାପଡିବା ପରେ ସମ୍ପୃକ୍ତ ଡାକ୍ତର ଛୁଟିରେ ଥିବାରୁ ତାଙ୍କ ସହିତ ଯୋଗାଯୋଗ ସମ୍ଭବ ହୋଇପାରିନାହିଁ ା
