ନୂଆଦିଲ୍ଲୀ,୨୦।୧: ରେସଲିଂ ଫେଡେରେଶନ୍ ଏବଂ ରେସଲରଙ୍କ ମଧ୍ୟରେ ଚାଲିଥିବା ବିବାଦ ମଧ୍ୟରେ ଭାରତୀୟ ଅଲିମ୍ପିକ୍ ଆସୋସିଏଶନ(ଆଇଓଏ) ଏକ ବଡ଼ ନିଷ୍ପତ୍ତି ନେଇଛି। ଡବ୍ଲୁଏଫ୍ଆଇ ମୁଖ୍ୟ ବ୍ରିଜ ଭୂଷଣ ସିଂହଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗର ଯାଞ୍ଚ କରିବାକୁ ଏକ ୭ ଜଣିଆ କମିଟି ଗଠନ କରାଯାଇଛି। ଏହି କମିଟିର ସଦସ୍ୟଙ୍କ ମଧ୍ୟରେ ମ୍ୟାରି କମ୍, ଡୋଲା ବାନାର୍ଜୀ, ଅଳକାନନ୍ଦା ଅଶୋକ, ଯୋଗେଶ୍ୱର ଦତ୍ତ, ସହଦେବ ଯାଦବ ଏବଂ ୨ ଓକିଲଙ୍କ ନାମ ଅନ୍ତର୍ଭୁକ୍ତ ରହିଛି।
ତିନି ଦିନ ଧରି ରେସଲରମାନେ ଦିଲ୍ଲୀର ଜନ୍ତରମନ୍ତରରେ ଧାରଣାରେ ବସିଛନ୍ତି। ଏହାକୁ ନେଇ ରାଜନୀତି ସରଗରମ ରହିଥିବା ବେଳେ ଶୁକ୍ରବାର ଆଇଓଏ ଏକ ବୈଠକ ଡାକିଥିଲା। ଏହା ଏକ ଗମ୍ଭୀର ମାମଲା ଥିବାରୁ ଯାଞ୍ଚ କରାଯାଉଛି। ସମସ୍ତ ପକ୍ଷଙ୍କୁ ଆମେ ଡାକିବୁ। ଆଇଓଏ ସଦସ୍ୟ ସହଦେବ ମଧ୍ୟ କମିଟିରେ ଅଛନ୍ତି। ଯାଞ୍ଚକୁ ନେଇ କୌଣସି ସମୟସୀମା ନିର୍ଦ୍ଧାରିତ କରାଯାଇନାହିଁ ବୋଲି ଆଇଓଏ କହିଛି।
ପୂର୍ବରୁୁ ଖେଳ ମନ୍ତ୍ରଣାଳୟ କୁସ୍ତି ମହାସଂଘ ଏବଂ ଅଧ୍ୟକ୍ଷଙ୍କୁ ୭୨ ଘଣ୍ଟା ମଧ୍ୟରେ ସ୍ପଷ୍ଟିକରଣ ଦେବାକୁ ଆଦେଶ ଦେଇଥିଲେ। ତଦନୁଯାୟୀ ବ୍ରିଜ ଭୂଷଣଙ୍କ ପକ୍ଷରୁ ଜବାବ ଦାଖଲ କରାଯାଇଥିଲା।
