ଭଞ୍ଜନଗର,୨୦ା୪(ବାବୁଲା ପ୍ରଧାନ): ରବିବାର ଅପରାହ୍ନ ୫ ଟା ରୁ ସୋମବାର ଭୋର୍ ମଧ୍ୟରେ
ଗଞ୍ଜାମ ଜିଲା ଭଞ୍ଜନଗର କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟର ୩ ଛାତ୍ରୀଛାତ୍ରଙ୍କ ଅକାଳ ବିଯୋଗ ଘଟିଛି। ଯାହାକି କଲେଜ ପାଇଁ ଅପୂରଣୀୟ କ୍ଷତି। ୧୦ ଘଣ୍ଟା ମଧ୍ୟରେ ୩ ଜଣ ମୃତ୍ୟୁବରଣ କରିବା ଏକ ଦୁଃଖଦ ଘଟଣା। ଦୁଇଜଣ ଛାତ୍ର ଭଞ୍ଜନଗର ଜଳଭଣ୍ଡାରକୁ ଗାଧୋଇବାକୁ ଯାଇଥିବା ବେଳେ ପାଣିରେ ବୁଡ଼ି ମୃତ୍ୟୁବରଣ କରିଥିଲେ। ସେମାନେ ହେଲେ ଯୁକ୍ତ ୨ ପ୍ରଥମ ବର୍ଷ ବିଜ୍ଞାନ ଛାତ୍ର କାହ୍ନୁ ପ୍ରଧାନ ଓ ଆଶୁତୋଷ ଭୂୟାଁ। ସେହିଭଳି ଯୁକ୍ତ ୩ ଦ୍ୱିତୀୟ ବର୍ଷ ପ୍ରାଣୀ ବିଜ୍ଞାନ ଛାତ୍ରୀ ସାଲିନା ସ୍ବାଇଁ ଚିକିତ୍ସା ଅବହେଳା ଏବଂ ତ୍ରୁଟିପୂର୍ଣ୍ଣ ଚିକିତ୍ସାରୁ ଭଞ୍ଜନଗର ମେଡିକାଲରେ ମୃତ୍ୟୁବରଣ କରିଥିବା ଅଭିଯୋଗ ହୋଇଛି। ଏହି ଘଟଣାକୁ ନେଇ ମେଡିକାଲରେ ଦୀର୍ଘ ସମୟ ପର୍ଯ୍ୟନ୍ତ ଉତ୍ତେଜନା ପ୍ରକାଶ ପାଇଥିଲା। ଏହାପରେ ପୋଲିସ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିବା ପରେ ପରିସ୍ଥିତି ଶାନ୍ତ ପଡ଼ିଥିଲା। ଏହାପରେ ପରିବାର ଲୋକ ସୋମବାର ସକାଳେ ମୃତଦେହକୁ ଗ୍ରାମକୁ ନେଇଥିଲେ।
ଅପରପକ୍ଷେ ସୋମବାର କଲେଜରେ ଉକ୍ତ ୩ ଛାତ୍ରୀଛାତ୍ରଙ୍କ ପାଇଁ ଏକ ଶୋକସଭା ହୋଇଥିଲା। ଏଥିରେ ଅଧ୍ୟକ୍ଷ ବିଭାସ ଦାସ ଅଧ୍ୟକ୍ଷତା କରି ମୃତ ଛାତ୍ରୀଛାତ୍ରଙ୍କୁ ଶ୍ରଦ୍ଧାଞ୍ଜଳି ଜଣାଇବା ସହ କଲେଜ ଛାତ୍ରୀଛାତ୍ର ପ୍ରତ୍ୟେକ କ୍ଷେତ୍ରରେ ସତର୍କତା ଅବଲମ୍ବନ କରିବାକୁ ପରାମର୍ଶ ଦେଇଥିଲେ।
ଏହି ଅବସରରେ ଅନ୍ୟମାନଙ୍କ ମଧ୍ୟରେ ପ୍ରଶାସନିକ ଅଧିକାରୀ ହର ପ୍ରସାଦ ଶତପଥୀ, ପ୍ରାଧ୍ୟାପକ ପ୍ରଶାନ୍ତ କୁମାର ରଥ ପ୍ରମୁଖ ଆଲୋଚନାରେ ଅଂଶଗ୍ରହଣ ଶୋକସନ୍ତପ୍ତ ପରିବାରକୁ ସମବେଦନା ଜଣାଇଥିଲେ।
