ନୂଆଦିଲ୍ଲୀ,୨୫।୧୧: ଟିମ୍ ଇଣ୍ଡିଆର ଷ୍ଟାର ବ୍ୟାଟ୍ସମ୍ୟାନ୍ ବିରାଟ କୋହଲିଙ୍କର ଦେଶବିଦେଶରେ କୋଟି କୋଟି ପ୍ରଶଂସକ ରହିଛନ୍ତି। ଏହି ଲୋକପ୍ରିୟତାର ଲାଭ ଉଠାଇବାକୁ ତାଙ୍କ ପରି ଦେଖାଯାଉଥିବା ଜଣେ ବ୍ୟକ୍ତି ବମ୍ବେର ରାସ୍ତାରେ ଜୋତା ବିକ୍ରି କରିବା ଆରମ୍ଭ କରିଛନ୍ତି। ଭାରତୀୟ ଟିମ୍ ଭଳି ଜର୍ସି ପିନ୍ଧି ସେ ବିରାଟଙ୍କ ଭଳି ଲୁକ୍ ଆପଣାଇଥିବାରୁ ଲୋକେ ତାଙ୍କ ସହ ସେଲଫି ନେଉଥିବା ଦେଖାଯାଉଛି। କୋହଲି ନିଜେ ଉକ୍ତ ବ୍ୟକ୍ତିଙ୍କ ଭିଡିଓକୁ ନିଜର ସୋସିଆଲ ଆକାଉଣ୍ଟରେ ଶେୟାର କରିଛନ୍ତି।
ଇନ୍ଷ୍ଟାଗ୍ରାମ ଷ୍ଟୋରୀରେ କୋହଲି ଭିଡିଓ ପୋଷ୍ଟ କରି କହିଛନ୍ତି, କେହିଜଣେ ମୋର ନକଲ କରୁଛି। ମୁମ୍ବାଇର ରାସ୍ତାରେ ପ୍ୟୁମାର ପୋଷାକ, ଚପଲ ବିକ୍ରି କରୁଛି। ଏହାକୁ ତୁମେ(କମ୍ପାନୀ) ନୋଟିସ୍କୁ ନେବ କି ବୋଲି ସେ କହିଛନ୍ତି।
କହିରଖୁଛୁ, ଭାରତୀୟ ଟିମ୍ ଏବେ ନ୍ୟୁଜିଲାଣ୍ଡ ଗସ୍ତରେ ଥିବା ବେଳେ କୋହଲି ଏହି ସିରିଜରୁ ବ୍ରେକ୍ ନେଇଛନ୍ତି। ନିକଟରେ ସେ ସ୍ତ୍ରୀ ଅନୁଷ୍କା ଶର୍ମାଙ୍କ ସହ ଉତ୍ତରାଖଣ୍ଡ ଗସ୍ତ କରିଥିଲେ।
