ନୂଆଦିଲ୍ଲୀ, ୭।୯ : ମଙ୍ଗଳବାର ବିଳମ୍ବିତ ରାତିରେ ବିହାର ଉପମୁଖ୍ୟମନ୍ତ୍ରୀ ତଥା ସ୍ବାସ୍ଥ୍ୟମନ୍ତ୍ରୀ ତେଜସ୍ବୀ ଯାଦବ ଡାକ୍ତରଖାନା ପରିଦର୍ଶନ କରିଛନ୍ତି। ଏହି ସମୟରେ ୱାର୍ଡରେ ଖରାପ ବ୍ୟବସ୍ଥା ଦେଖିବା ପରେ ସେ ବହୁତ ରାଗି ଯାଇଥିଲେ। ସେ ଡାକ୍ତରମାନଙ୍କୁ ତୀବ୍ର ନିନ୍ଦା କରିଥିଲେ। ଯାଞ୍ଚ ପରେ ଉପମୁଖ୍ୟମନ୍ତ୍ରୀ କହିଛନ୍ତି ଯେ ଅବହେଳା କରୁଥିବା ବ୍ୟକ୍ତିଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ତେଜସ୍ବୀ ପାଟନା ମେଡିକାଲ କଲେଜ ହସ୍ପିଟାଲ (ପିଏମସି)ରେ ପହଞ୍ଚିଥିଲେ। ତାଙ୍କର ହଠାତ୍ ଗସ୍ତ ବିଷୟରେ କେହି ଜାଣି ନ ଥିଲେ। ଏଭଳି ପରିସ୍ଥିତିରେ ତେଜସ୍ବୀଙ୍କୁ ସେମାନଙ୍କ ସାମ୍ନାରେ ପାଇବା ପରେ ଡାକ୍ତରଖାନା ପ୍ରଶାସନର ହୋସ୍ ଉଡ଼ି ଯାଇଥିଲା। ଉପମୁଖ୍ୟମନ୍ତ୍ରୀଙ୍କ ଆଶ୍ଚର୍ଯ୍ୟଜନକ ଗସ୍ତର ଭିଡିଓ ମଧ୍ୟ ସାମ୍ନାକୁ ଆସିଛି।
ଭିଡିଓରେ ଉପମୁଖ୍ୟମନ୍ତ୍ରୀ ଡାକ୍ତରଙ୍କଠାରୁ ଔଷଧ ତାଲିକା ମାଗୁଥିବା ଦେଖିବାକୁ ମିଳିଛି, କିନ୍ତୁ ଏହା ଘଟଣାସ୍ଥଳରେ ଉପଲବ୍ଧ ନଥିଲା। ଏହା ବ୍ୟତୀତ କେତେକ ଡାକ୍ତର ମଧ୍ୟ ଅନୁପସ୍ଥିତ ଥିଲେ। ତେଜସ୍ବୀ କହିଛନ୍ତି, ପାଟନା ମେଡିକାଲ କଲେଜରେ ଟାଟା ୱାର୍ଡର ଅବସ୍ଥା ଅତ୍ୟନ୍ତ ଖରାପ ରହିଛି। ସେଠାରେ ଔଷଧ କିମ୍ବା ପରିଷ୍କାର ପରିଚ୍ଛନ୍ନତା ନଥିଲା। ରୋଗୀଙ୍କୁ ପର୍ଯ୍ୟାପ୍ତ ସୁବିଧା ଯୋଗାଇ ଦିଆଯାଉ ନଥିଲା ଏବଂ ଘଟଣାସ୍ଥଳରେ ବହୁ ଆନୁସଙ୍ଗିକ ଅଭାବ ଦେଖାଦେଇଥିଲା। ଡାକ୍ତର କିମ୍ବା ଜୁନିଅର ଡାକ୍ତର ମଧ୍ୟ ଡ୍ୟୁଟିରେ ନଥିଲେ।
ଘଟଣାସ୍ଥଳରେ ଉପସ୍ଥିତ ଥିବା ହସ୍ପିଟାଲର କର୍ମଚାରୀମାନେ ମିଛ କହୁଥିବା ବେଳେ ଧରାପଡ଼ିଥିଲେ। ତେଣୁ ସମସ୍ତଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏହା ବ୍ୟତୀତ ଉପମୁଖ୍ୟମନ୍ତ୍ରୀ ନୂତନ ଗାର୍ଡିନର ରୋଡ ହସ୍ପିଟାଲ ଏବଂ ଗରଦାନିବାଗ ଡାକ୍ତରଖାନା ମଧ୍ୟ ଗସ୍ତ କରିଥିଲେ।ତେଦେ ସେସବୁ ଡାକ୍ତରଖାନାରେ ଡାକ୍ତରମାନେ ଉପସ୍ଥିତ ଥିଲେ। ପର୍ଯ୍ୟାପ୍ତ ଔଷଧ ଏବଂ କର୍ମଚାରୀ ମଧ୍ୟ ଡ୍ୟୁଟିରେ ଥିଲେ ବୋଲି ତେଜସ୍ବୀ ସୂଚନା ପ୍ରଦାନ କରିଛନ୍ତି।
