ହାଇଦ୍ରାବାଦ, ୧୩।୪: ଅଧିନାୟକ ଇଶାନ କିଶନଙ୍କ ବିସ୍ଫୋରକ ବ୍ୟାଟିଂ ପରେ ପ୍ରଫୁଲ୍ଲ ହିଙ୍ଗେ ଓ ସାକିବ ହୁସେନଙ୍କ ଡ୍ରିମ୍ ଡେବ୍ୟୁ ବଳରେ ସନ୍ରାଇଜର୍ସ ହାଇଦ୍ରାବାଦ ସୋମବାର ଅନୁଷ୍ଠିତ ଆଇପିଏଲ୍ ମ୍ୟାଚରେ ୫୭ ରନରେ ରାଜସ୍ଥାନ ରୟାଲ୍ସକୁ ପରାସ୍ତ କରିଛି।
ହାଇଦ୍ରାବାଦ ୨୦ ଓଭରରେ ୬ ଉଇକେଟ ହରାଇ ୨୧୬ ରନ କରିଥିଲା। ଜବାବରେ ଏକଦା ୯ ରନରେ ୫ ଉଇକେଟ ହରାଇ ବ୍ୟାଟିଂ ବିପର୍ଯ୍ୟୟରେ ପଡ଼ିଥିବା ରାଜସ୍ଥାନ ଡୋନୋଭାନ ଫେରିରାଙ୍କ ଲଢ଼ୁଆ ଅର୍ଦ୍ଧଶତକ ବଳରେ ୧୯ ଓଭରରେ ୧୫୯ ରନ କରିବାକୁ ସକ୍ଷମ ହୋଇଥିଲା। ୫ ମ୍ୟାଚରୁ ରାଜସ୍ଥାନର ଏହା ପ୍ରଥମ ପରାଜୟ ହୋଇଥିବାବେଳେ ସନ୍ରାଇଜର୍ସର ଦ୍ୱିତୀୟ ବିଜୟ।
ଟସ୍ ଜିତି ଫିଲ୍ଡିଂ ନିଷ୍ପତ୍ତି ନେଇଥିଲେ ରାଜସ୍ଥାନ ଅଧିନାୟକ ରିୟାନ ପରାଗ। ଜୋଫ୍ରା ଆର୍ଚରଙ୍କ ପ୍ରଥମ ବଲ୍ରେ ଅଭିଷେକ ଶର୍ମା ଆଉଟ ହେବାରୁ ରାଜୀବ ଗାନ୍ଧୀ ଅନ୍ତର୍ଜାତୀୟ ଷ୍ଟାଡିୟମରେ ନିରବତା ଛାଇ ଯାଇଥିଲା। ଟ୍ରାଭିସ ହେଡ୍ ଓ ଅଧିନାୟକ ଇଶାନ କିଶନ ଦ୍ୱିତୀୟ ଉଇକେଟରେ ୫୫ ରନ ଯୋଡ଼ି ଇନିଂସ ସମ୍ଭାଳିଥିଲେ। ହେଡ୍ ୧୮ ରନକରି ଆଉଟ ହୋଇଥିବାବେଳେ ବିସ୍ଫୋରକ ବ୍ୟାଟିଂ କରିଥିଲେ କିଶନ। କିଶନ ଓ ହେନରିଚ୍ କ୍ଲାସେନଙ୍କ ତୃତୀୟ ଉଇକେଟ ଯୋଡ଼ିରେ ମାତ୍ର ୩୯ ବଲ୍ରୁ ୮୮ ରନ ସଂଗୃହୀତ ହୋଇଥିଲା। କିଶନ ଶତକର ନିକଟତର ହୋଇଥିଲେ ହେଁ ୪୪ ବଲ୍ରୁ ୮ ଚୌକା ଓ ୬ ଛକା ସହାୟତାରେ ୯୧ ରନ ସଂଗ୍ରହ କରିଥିବା ବେଳେ ସନ୍ଦିପ ଶର୍ମାଙ୍କ ବୋଲିଂରେ କଟ୍ ଆଣ୍ଡ ବୋଲ୍ଡ ହୋଇ ଯାଇଥିଲେ। କ୍ଲାସେନ ବ୍ୟକ୍ତିଗତ ୪୦ (୨୬ ବଲ, ୧ ଚୌକା, ୩ ଛକା) ରନ କରିଥିଲେ। ଶେଷ ଭାଗରେ ନୀତୀଶ କୁମାର ରେଡ୍ଡୀ ଓ ସଲିଲ ଆରୋରା କେତେକ ଦର୍ଶନୀୟ ଶଟ୍ ଖେଳିବାରୁ ହାଇଦ୍ରାବାଦ ସ୍କୋର ୨୦୦ ଅତିକ୍ରମ କରିଥିଲା। ନୀତୀଶ ୨୮ ରନ କରି ଆଉଟ ହୋଇଥିବା ବେଳେ ଆରୋରା ୨୪ ରନରେ ଅପରାଜିତ ରହିଥିଲେ।
