ନୂଆଦିଲ୍ଲୀ,୨୦।୭(ପି.ଟି.)- ଆଇସିସି ଜିମ୍ବାଓ୍ବେକୁ ବାସନ୍ଦ କରିବା ପରେ ଏହାର ପ୍ରଭାବ କ୍ରିକେଟ ପାଓ୍ବାର ହାଉସ୍ କୁହାଯାଉଥିବା ଭାରତରେ ମଧ୍ୟ ଦେଖିବାକୁ ମିଳିଛି। ଅଭିଜ୍ଞ ଅଫ୍ ସ୍ପିନର ରବିଚନ୍ଦ୍ରନ ଅଶ୍ୱିନ୍ ମଧ୍ୟ ଆଇସିସିର ଏହି ନିଷ୍ପତ୍ତିକୁ ହୃଦୟ ବିଦାରକ ଓ କଠୋର ବୋଲି କହିଛନ୍ତି। ଏହା ଦ୍ୱାରା ଜିମ୍ବାଓ୍ବେ କ୍ରିକେଟର ଓ କ୍ରିକେଟ ସହିତ ଜଡିତ ରହିଆସିଥିବା ବ୍ୟକ୍ତିମାନେ ସେମାନଙ୍କ ଜୀବିକା ହରାଇଛନ୍ତି। ସିକନ୍ଦର ରାଜାଙ୍କ ଟୁଇଟ୍ ପଢ଼ି ମୁଁ ନିରାଶ ହୋଇଛି। ଖୁବ୍ ଶୀଘ୍ର କ୍ରିକେଟକୁ ଭଲ ପାଉଥିବା ଏହି ଦେଶ ପୁଣି ଥରେ ଅନ୍ତର୍ଜାତୀୟ ସ୍ତରକୁ ପ୍ରତ୍ୟାବର୍ତ୍ତନ କରୁ ଅଶ୍ୱିନ ଟୁଇଟ କରି ଜଣାଇଛନ୍ତି।
ଉଲ୍ଲେଖଥାଉ କି, ଜିମ୍ବାଓ୍ବେ ବୋର୍ଡର ନବନିର୍ବାଚିତ ସଭ୍ୟାଙ୍କୁ ସରକାରଙ୍କ ଏଜେନ୍ସି ସ୍ପୋଟର୍ସ ଆଣ୍ଡ ରିକ୍ରିଏସନ କମିଟି (ଏସ୍ଆରସି) ସସ୍ପେଣ୍ଡ କରିଛି। ଏହି ଆଇସିସିର ୨.୪ (ସି) ଓ ଡି ଅନୁଚ୍ଛେଦର ଉଲ୍ଲଂଘନ କରୁଛି ଓ ଏହା ଦ୍ୱାରା କ୍ରିକେଟ ବ୍ୟାପାରରେ ସରକାର ଖୋଲାଖୋଲି ହସ୍ତକ୍ଷେପ କରିଛନ୍ତି ବୋଲି ଆଇସିସି ତରଫରୁ କୁହାଯାଇଛି। ଜିମ୍ବାଓ୍ବେ କ୍ରିକେଟକୁ ଆଇସିସି କୌଣସି ପାଣ୍ଠି ଦେବ ନାହିଁ। କେବଳ ସେତିକି ନୁହେଁ ଆଇସିସିର କୌଣସି ଇଭେଣ୍ଟରେ ଜିମ୍ବାଓ୍ବେ ଏବେ ଅଂଶଗ୍ରହଣ କରିପାରିବ ନାହିଁ। ଆଗାମୀ ୩ ମାସ ମଧ୍ୟରେ ଜିମ୍ବାଓ୍ବେ ବୋର୍ଡର ନିର୍ବାଚିତ ସଦସ୍ୟମାନଙ୍କୁ ପୁଣିଥରେ ସେମାନଙ୍କ ପଦରେ ଅବସ୍ଥାପିତ କରିବାକୁ ଆଇସିସି ନିର୍ଦ୍ଦେଶ ଦେଇଛି। ଅକ୍ଟୋବରରେ ହେବାକୁ ଥିବା ବୋର୍ଡ ବୈଠକରେ ଏ ନେଇ ହୋଇଥିବା ପ୍ରଗତି ସମ୍ପର୍କରେ ଆଲୋଚନା କରାଯିବ ବୋଲି କୁହାଯାଇଛି। ନିଷ୍ପତ୍ତି ନେବା ପୂର୍ବରୁ ଆଇସିସି ବୋର୍ଡ ଜିମ୍ବାଓ୍ବେ ସରକାରଙ୍କ ସ୍ପୋଟର୍ସ ଓ ରିକ୍ରିଏସନ କମିଟି ଓ ଜିମ୍ବାଓ୍ବେ ବୋର୍ଡର ପ୍ରତିନିଧିଙ୍କ ସହ ଆଲୋଚାନ କରିବା ପରେ ଯାଇ ଏହି ନିଷ୍ପତ୍ତି ନେଇଥିଲା।
