ନୂଆଦିଲ୍ଲୀ: ଆସନ୍ତା ସାଧାରଣ ବଜେଟ ସମୟରେ ସରକାର ବିଭିନ୍ନ ସୌଖୀନ (ଲକ୍ଜ୍ୟୁରି) କାରଗୁଡିକ ନିମନ୍ତେ କର ହ୍ରାସ କରିବେ ବୋଲି ମର୍ସିଡିଜ୍ ବେଞ୍ଜ, ଅଡି ଓ ଲମ୍ବର୍ଗିନୀ ଆଦି କମ୍ପାନୀମାନେ ସରକାରଙ୍କ ନିକଟରେ ଦାବି ଜଣାଇବା ସହ କର ହ୍ରାସ ପାଇଁ ଆଶାବ୍ୟକ୍ତ କରିଛନ୍ତି। କମ୍ପାନୀଗୁଡିକଙ୍କ କହିବା ଅନୁସାରେ ଉଚ୍ଚ ଶୁଳ୍କ ହାର ଯୋଗୁ ଦେଶରେ ପ୍ରିମିୟମ କାର ବଜାର ଆଗକୁ ବଢି ପାରୁନାହିଁ। ଫଳରେ ଏହି ସବୁ କମ୍ପାନୀଗୁଡିକ ବିଶେଷ ଭାବରେ କ୍ଷତିଗ୍ରସ୍ତ ହୋଇଥିବା ଜଣାପଡିଛି। ଗତ ବର୍ଷ କରୋନା ମହମାରୀ ଯୋଗୁ ବଜାର ପରିସ୍ଥିତି ଏକପ୍ରକାର ମାନ୍ଦାବସ୍ଥା ସହ ଜଟିଳ ହୋଇପହିଛି। ଆଗାମୀ ବଜେଟ ସେସନରେ ସରକାର ଯଦି ବିଭିନ୍ନ ଲକ୍ଜ୍ୟୁରି କାର ଉପରେ ଅଧିକ ଟିକସ ଲାଗୁ କରିବେ ତା’ ହେଲେ ଚଳିତ ବର୍ଷ ମଧ୍ୟ ବଚାର ଚାହିଦା ପ୍ରଭାବିତ ହେବା ନିଶ୍ଚିତ ବୋଲି କମ୍ପାନୀଗୁଡିକ ମତ ଦେଇଛନ୍ତି। ଏ ସମ୍ପର୍କରେ ମର୍ସିଡିଜ ବେଞ୍ଜ ଇଣ୍ଡିଆର ସିଇଓ ମାର୍ଟିନ ଶ୍ୱେଙ୍କ୍ କହିଛନ୍ତି ଯେ ସରକାର ଏପରି କୌଣସି ପଦକ୍ଷେପ ନେବା ଉଚିତ ନୁହେଁ ଯାହାଫଳରେ ଏହାର ଚାହିଦା ହ୍ରାସ କରିବ, ନଚେତ ପରେ ସମସ୍ୟା ଜଟିଳ ହେବ ବୋଲି ସେ ଆଶାବ୍ୟକ୍ତ କରିଛନ୍ତି। ବିଳାସମୟ କାର କ୍ଷେତ୍ରରେ ପ୍ରଥମରୁ ଦେଶରେ ଶୁଳ୍କ ହାର ଉଚ୍ଚ ରହିଛି। ଆମଦାନୀ ଶୁଳ୍କରୁ ଆରମ୍ଭ କରି ମାଲ ଓ ସେବା କର (ଜିଏସଟି) ଆଦି କର ଓ ଉପକର ମିଶାଇ ୨୨% ଆଦାୟ ହେଉଛି ବୋଲି ସେ ମତ ଦେଇଛନ୍ତି। ସେହିପରି ଅଡି ଇଣ୍ଡିଆ ମୁଖ୍ୟ ବଲବୀର ସିଂ ଧିଲନ ମଧ୍ୟ ଉଚ୍ଚ କର ହାର ହ୍ରାସ ହେବା ଦରକାର ବୋଲି ମତ ଦେଇଛନ୍ତି।
