କଳିଙ୍ଗନଗର,୨ା୬(ଡି.ଏନ୍.ଏ.)- ଦାନଗଦୀ ବ୍ଲକ ଅଞ୍ଚଳରେ ସ୍ବଚ୍ଛ ଭାରତ ମିଶନ ଫେଲ ମାରିଛି। ଶୌଚାଳୟ ନିର୍ମାଣ ନାମରେ ଠିକାଦାର ଅର୍ଥ ହଡପ କରିଥିବା ଅଭିଯୋଗ ହୋଇଛି। ଅଞ୍ଚଳରେ ପ୍ରକୃତ ହିତାଧିକାରୀ ଶୌଚାଳୟ ପାଇବାରୁ ବଞ୍ଚତ୍ତ ହେଉଥିବାବେଳେ ତାଲିକାରେ ନାମ ନ ଥିବା ଲୋକଙ୍କୁ ଚଞ୍ଚକତା କରାଯାଇ ଶୌଚାଳୟ ପ୍ରଦାନ କରାଯାଉଛି। ଏପରିକି ଅଧିକାଂଶ ଗ୍ରାମରେ ଶୌଚାଳୟ ନ ଥାଇ ବିଲ୍ କରାଯାଇଛି। ବିଶେଷକରି ଉଚବାଲି, ଓସ୍ତପାଳ, କିଆଝର, ରଣାଗୁଣ୍ଡି, ଶାଳିଜଙ୍ଗା, ନଛିପୁରା, ଧୂଳିଗଡ, ରାଣୀପଡା, ଖପୁରିଆପଦା ଆଦି ବିଭିନ୍ନ ପଞ୍ଚାୟତରେ ବ୍ୟାପକ ଦୁର୍ନୀତି ହୋଇଥିବା ଅଭିଯୋଗ ହୋଇଛି। ଅଣଓଡ଼ିଆ ଠିକାଦାର ଶୌଚାଳୟ ନିର୍ମାଣ ନ କରି ଅନ୍ୟ ଏକ ପାଇଖାନା ଫଟୋ ଦେଖାଇ ଚଞ୍ଚକତା କରି ବିଲ୍ ଉଠାଇଛନ୍ତି। ଏଥିରେ ବ୍ଲକର ବିଭାଗୀୟ କର୍ମଚାରୀଙ୍କ ସମ୍ପୃକ୍ତି ରହିଥିବା ଗ୍ରାମବାସୀ କହିଛନ୍ତି। ଅପରପକ୍ଷେ ଚମ୍ପାଝର ଗ୍ରାମର ଶତ୍ରୁଘନ ମହାନ୍ତି, କାହ୍ନୁ ଚରଣ ମହାନ୍ତି, କୁନ୍ତିି ମହାନ୍ତି, ବିରଞ୍ଚତ୍ ମହାନ୍ତି, ସାଦାଇ ହେମ୍ବ୍ରମ, ଦୁର୍ଗା ମାଝି, କାପରେ ମୁର୍ମୁ ପ୍ରମୁଖ ଶତାଧିକ ହିତାଧିକାରୀଙ୍କ ପାଇଖାନା ଘର ଠିକାଦାର ଖାଲି ଇଟା ଯୋଡି ବିଲ୍ ଉଠାଇଥିବା ଅଭିଯୋଗ ହୋଇଛି। ସେହିପରି ସନ୍ତ୍ରାଗାଡ଼ିଆ ଗ୍ରାମରେ ଠିକାଦାର ନିମ୍ନମାନର କାର୍ଯ୍ୟକରି ଟଙ୍କା ଉଠାଇ ନେଇଥିବା ଅଭିଯୋଗ ହୋଇଛି। ସ୍ବୟଂ ସହାୟକ ଗୋଷ୍ଠୀ ମାଧ୍ୟରେ ନିର୍ମାଣ ପାଇଁ ଦିଆଯାଇଉଥିବା ପାଇଖାନାଗୁଡିକ ନିର୍ମାଣ ନ କରି ଟଙ୍କା ଉଠାଯାଉଥିବା ଜଣାପଡିଛି। ଏ ସମ୍ପର୍କରେ ବିଭୁତି ଜେନା, ପଦ୍ମଲୋଚନ ଜେନା, ପ୍ରମୋଦ ଜେନା, ଚକ୍ରଧର ଜେନା, ପାଣ୍ଡବ ଜେନାଙ୍କ ସମେତ ୩୦ରୁ ଊର୍ଦ୍ଧ୍ୱ ଲୋକେ କିଛି ଦିନତଳେ ତଦନ୍ତ ପାଇଁ ଦାନଗଦୀ ବିଡିଓଙ୍କ ନିକଟରେ ଅଭିଯୋଗ କରିଥିବା ଜଣାପଡିଛି। ଏଥିପ୍ରତି ବିଭାଗୀୟ ଅଧିକାରୀ ଦୃଷ୍ଟି ନ ଦେଲେ ସ୍ଥାନୀୟ ଲୋକେ ଦାବି କରିଛନ୍ତି। ଏ ନେଇ ଦରନଗଦୀ ବିଡିଓ ମଣିପ୍ରସାଦ ମିଶ୍ରଙ୍କ ମତାମତ ମିଳିପାରି ନାହଁି।
