ନୂଆଦିଲ୍ଲୀ ,୧୦।୩:ପାର୍ଲାମେଣ୍ଟର ବଜେଟ ଅଧିବେଶନ ଦ୍ୱିତୀୟ ପର୍ଯ୍ୟାୟ ସୋମବାରଠାରୁ ଆରମ୍ଭ ହେଉଛି। ବିରୋଧୀ ଦଳ ଭୋଟର ତାଲିକାରେ ଜାଲିଆତି, ଡୁପ୍ଲିକେଟ୍ ଭୋଟର ଫଟୋ ପରିଚୟ ପତ୍ର (ଇପିଆଇସି) ନମ୍ବର, ମଣିପୁରରେ ସାନି ହିଂସା ଏବଂ ଟ୍ରମ୍ପ୍ ପ୍ରଶାସନର ପାରସ୍ପରିକ ଟିକସର ମୁକାବିଲା ଦିଗରେ ଭାରତର ବିଫଳତା ଆଦି ପ୍ରସଙ୍ଗ ଉଠାଇ ସରକାରଙ୍କୁ ଘେରିବା ଯୋଜନା ରଖିଛି। ତେଣୁ ଆରମ୍ଭ ଦିନରୁ ସଂସଦର ଉଭୟ ଗୃହରେ ପ୍ରବଳ ହଟ୍ଟଗୋଳ ହୋଇପାରେ ବୋଲି କୁହାଯାଉଛି। ଅନ୍ୟପକ୍ଷରେ ଅନୁଦାନ ଦାବିକୁ ମଞ୍ଜୁର କରାଇବା, ବଜେଟ ପ୍ରକ୍ରିୟାକୁ ସମ୍ପୂର୍ଣ୍ଣ କରାଇବା, ମଣିପୁର ବଜେଟ ପାଇଁ ଅନୁମୋଦନ ଏବଂ ଓ୍ବକ୍ଫ ସଂଶୋଧନ ବିଲ୍ ଗୃହୀତ କରାଇବା ଉପରେ ସରକାର ଗୁରୁତ୍ୱ ଦେବେ। ମଣିପୁରରେ ରାଷ୍ଟ୍ରପତି ଶାସନ ଲାଗୁ ହୋଇଥିବାବେଳେ ଏହାକୁ ସଂସଦର ଅନୁମୋଦନ ପାଇଁ ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହା ଏକ ବୈଧାନିକ ପ୍ରସ୍ତାବ ଆଣିବା ଆଶା କରାଯାଉଛି। ସୋମବାର ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ମଣିପୁର ପାଇଁ ବଜେଟ ଉପସ୍ଥାପନ କରିବେ। ମଣିପୁର ମୁଖ୍ୟମନ୍ତ୍ରୀ ଏନ୍. ବୀରେନ୍ ସିଂଙ୍କ ଇସ୍ତଫା ପରେ ଫେବୃଆରୀ ୧୩ରୁ ସେଠାରେ ରାଷ୍ଟ୍ରପତି ଶାସନ ଲାଗୁ ହୋଇଛି। ପଶ୍ଚିମବଙ୍ଗରେ ଅନ୍ୟ ରାଜ୍ୟର ଭୋଟରମାନଙ୍କୁ ମତଦାନ ଅନୁମତିି ଦେବା ଲାଗି ସମାନ ନମ୍ବରରେ ଭୋଟ ପରିଚୟପତ୍ର ଜାରି କରାଯାଇଥିବା ମୁଖ୍ୟମନ୍ତ୍ରୀ ମମତା ବାନାର୍ଜୀ ଅଭିଯୋଗ ଆଣିଥିବାବେଳେ ନିର୍ବାଚନ କମିଶନ ଏହାକୁ ଖଣ୍ଡନ କରିଥିଲେ। ଭୋଟର ପରିଚୟ ପତ୍ରରେ ସମାନ ନମ୍ବର ଥିଲେ ମଧ୍ୟ ନିର୍ବାଚନ ମଣ୍ଡଳୀ ଏବଂ ବୁଥ୍ ଠିକଣା ଅଲଗା ଥିବାରୁ ଜଣେ ବ୍ୟକ୍ତି ଏକାଧିକ ସ୍ଥାନରେ ଭୋଟ ଦେବା ସମ୍ଭବ ନୁହେଁ ବୋଲି କମିଶନ କହିଥିଲେ। ତୃଣମୂଳ କଂଗ୍ରେସ ସହ କଂଗ୍ରେସ, ଡିଏମ୍କେ, ଶିବସେନା-ୟୁବିଟି ଏହି ପ୍ରସଙ୍ଗ ପାର୍ଲାମେଣ୍ଟର ଉଭୟ ସଦନରେ ଉଠାଇବାକୁ ନିଷ୍ପତ୍ତି ନେଇଛନ୍ତି।
