ନୂଆଦିଲ୍ଲୀ,୫।୧(ପି.ଟି.): ଜଳବାୟୁ ପରିବର୍ତ୍ତନର ବହୁଳ ପ୍ରଭାବ ଖାଉଟି ବଜାର ଉପରେ ପଡ଼ିବାକୁ ଯାଉଛି। ମହତ୍ତ୍ୱାକାଂକ୍ଷୀ ଜଳବାୟୁ ନୀତି ସତ୍ତ୍ୱେ ନିମ୍ନ ଆୟକାରୀ ଦେଶଗୁଡ଼ିକରେ ୨୦୫୦ ସୁଦ୍ଧା ଖାଉଟି ଖାଦ୍ୟସାମଗ୍ରୀ ମୂଲ୍ୟ ୨.୪୫ ଗୁଣ ବଢ଼ିବାକୁ ଥିବାବେଳେ ଉତ୍ପାଦନ ଖର୍ଚ୍ଚ ୩.୩ ଗୁଣା ହେବ ବୋଲି ଏକ ଅଧ୍ୟୟନରୁ ଜଣାପଡ଼ିଛି।
ନିମ୍ନ ଆୟକାରୀ ଦେଶଗୁଡ଼ିକରେ ଖାଉଟି ମୂଲ୍ୟ ବୃଦ୍ଧି ଚାଷୀମାନଙ୍କ ପାଇଁ କମ୍ ଜଣାପଡ଼ୁଥିଲେ ମଧ୍ୟ ଏହି ରାଷ୍ଟ୍ରଗୁଡ଼ିକର ଲୋକଙ୍କୁ ପର୍ଯ୍ୟାପ୍ତ ଏବଂ ସ୍ବାସ୍ଥ୍ୟକର ଖାଦ୍ୟ ଯୋଗାଇବା କଷ୍ଟକର ହୋଇପଡ଼ିବ ବୋଲି ଜର୍ମାନୀର ପଟ୍ସଡାମ୍ ଇନ୍ଷ୍ଟିଚ୍ୟୁଟ୍ ଫର୍ କ୍ଲାଇମେଟ୍ ଇମ୍ପାକ୍ଟ ରିସର୍ଚ୍ଚ (ପିଆଇକେ)ର ଗବେଷକମାନେ କହିଛନ୍ତି। ଆମେରିକା କିମ୍ବା ଜର୍ମାନୀ ଭଳି ଉଚ୍ଚ ଆୟକାରୀ ଦେଶରେ ଚାଷୀମାନେ ଖାଦ୍ୟ ପାଇଁ ଏକ-ଚତୁର୍ଥାଂଶରୁ କମ୍ ଖର୍ଚ୍ଚ କରିଥାନ୍ତି, ଯେତେବେଳେ କି ସବ୍-ସାହାରାନ୍ ଆଫ୍ରିକାରେ ଏହି ଖର୍ଚ୍ଚ ପରିମାଣ ୭୦ ପ୍ରତିଶତରୁ ଅଧିକ। ସେଠାରେ କୃଷି ଖର୍ଚ୍ଚ ଖାଦ୍ୟ ମୂଲ୍ୟର ଏକ ବଡ଼ ଭାଗ ବୋଲି ପିଆଇକେ ବୈଜ୍ଞାନିକ ଡାଭିଡ୍ ମେଙ୍ଗ-ଚୁଏନ୍ ଚେନ୍ କହିଛନ୍ତି। ଏହି ଅଧ୍ୟୟନ ନେଚର ଫୁଡ୍ ପତ୍ରିକାରେ ପ୍ରକାଶ ପାଇଛି।
ଗବେଷକମାନେ ପରିସଂଖ୍ୟାନ ଏବଂ ପ୍ରକ୍ରିୟାଭିତ୍ତିକ ମଡେଲ ବ୍ୟବହାର କରି ୧୩୬ ଦେଶ ଓ ୧୧ ଖାଦ୍ୟ ଗ୍ରୁପ୍ରୁ ଖାଦ୍ୟ ମୂଲ୍ୟ ଆକଳନ କରିଥିଲେ। ସମ୍ପୂର୍ଣ୍ଣ ଖାଦ୍ୟ ମୂଲ୍ୟ ଶୃଙ୍ଖଳକୁ ବିଶ୍ଳେଷଣ ପରେ ଉପଭୋକ୍ତାଙ୍କ ଉପରେ ସବୁଜ ଗୃହ ବାଷ୍ପ ପ୍ରଭାବ ହ୍ରାସ ଲକ୍ଷ୍ୟରେ କିଭଳି ନୀତି ଆପଣାଯିବା ଆବଶ୍ୟକ, ତାହା ଗବେଷକମାନେ ଜାଣିବାକୁ ପାଇଥିଲେ। କୃଷି ଉପରେ ଉତ୍ସର୍ଜନର ପ୍ରଭାବ କମାଇବା ଲକ୍ଷ୍ୟରେ ଜଳବାୟୁ ନୀତି ପ୍ରସ୍ତୁତ ହେଉଥିବାବେଳେ ଖାଦ୍ୟ ମୂଲ୍ୟବୃଦ୍ଧିକୁ ନେଇ ଉପଭୋକ୍ତାଙ୍କ ମଧ୍ୟରେ ଚିନ୍ତା ବଢ଼ିବାରେ ଲାଗିଛି। ଜଳବାୟୁ ନୀତି ଗରିବ ଗ୍ରାହକଙ୍କ ଉପରେ ଭିନ୍ନ ପ୍ରଭାବ ପକାଉଥିବା ଗବେଷକ କହିଛନ୍ତି। କ୍ଲାଇମେଟ୍ ପଲିସି ସହ ଧନୀ ରାଷ୍ଟ୍ରଗୁଡ଼ିକରେ ଖାଉଟି ଖାଦ୍ୟ ଦର ୨୦୫୦ ସୁଦ୍ଧା ୧.୨୫ ଗୁଣ ବଢ଼ିବାକୁ ଥିବାବେଳେ ଉତ୍ପାଦକ ମୂଲ୍ୟ ୨.୭୩ ଗୁଣ ବଢ଼ିବ ବୋଲି ଗବେଷକମାନେ କହିଛନ୍ତି।
