ନୂଆଦିଲ୍ଲୀ,୪ା୫: ପଶ୍ଚିମବଙ୍ଗ, ଆସାମ, ତାମିଲନାଡୁ, କେରଳମ୍ ଏବଂ କେନ୍ଦ୍ରଶାସିତ ଅଞ୍ଚଳ ପଣ୍ଡିଚେରୀ ବିଧାନସଭା ନିର୍ବାଚନର ଭୋଟଗଣତି ସୋମବାର ହେବ। କିନ୍ତୁ ସାରା ଦେଶର ନଜର ପଶ୍ଚିମବଙ୍ଗ ଫଳାଫଳ ଉପରେ ରହିଛି। ଏହା ଏବେ ରାଜନୈତିକ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି। ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ ପୁଣି କ୍ଷମତାକୁ ଫେରୁଛି କି ଭାଜପା ନେତୃତ୍ୱରେ ସେଠାରେ ନୂଆ ସରକାର ଗଢ଼ାହେବାକୁ ଯାଉଛି, ତାହାକୁ ନେଇ ସମସ୍ତଙ୍କର ଉତ୍କଣ୍ଠା ବଢ଼ିଛି। ଯଦି ମମତା ତାଙ୍କର ସ୍ଥିତି ରକ୍ଷା କରିପାରନ୍ତି ତେବେ ତାହା ଅଣଭାଜପା ରାଜନୀତିକୁ ପୁନର୍ବାର ଶକ୍ତିଶାଳୀ କରିବ। ଅନ୍ୟପଟେ ପଶ୍ଚିମବଙ୍ଗରେ ଭାଜପାର ଜିତାପଟ ହେଲେ ମୋଦିଙ୍କ ଭାବମୂର୍ତ୍ତିକୁ ଅଧିକ ଶକ୍ତିଶାଳୀ କରିବା ସହିତ ଭାରତର ଅନ୍ତର୍ଜାତୀୟ ସମ୍ପର୍କରେ ବିଫଳତାକୁ କିଛି ସମୟ ପାଇଁ ଘୋଡ଼ାଇ ଦେବ।
୨୯୪ ଆସନ ବିଶିଷ୍ଟ ପଶ୍ଚିମବଙ୍ଗ ବିଧାନସଭାର ୨୯୩ ଆସନ ପାଇଁ ୭୭ଟି ଗଣନା କେନ୍ଦ୍ରରେ ଭୋଟ ଗଣତି ହେବାକୁ ଯାଉଥିବାବେଳେ ସ୍ବଚ୍ଛତା ସୁନିଶ୍ଚିତ କରିବା ଲାଗି ବହୁସ୍ତରୀୟ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ପଶ୍ଚିମବଙ୍ଗରେ ଏପ୍ରିଲ ୨୩ ଓ ୨୯ ଦୁଇ ପର୍ଯ୍ୟାୟରେ ଭୋଟ ହୋଇଥିବାବେଳେ ମତଦାନ ହାର ୯୨ ପ୍ରତିଶତରୁ ଅଧିକ ରହିଥିଲା। ସେହିପରି କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ଆସାମର ସମସ୍ତ ୧୨୬ ଆସନ ଲାଗି ୩୫ ଜିଲାର ୪୦ଟି ଗଣନା କେନ୍ଦ୍ରରେ ଭୋଟଗଣତି କରାଯିବ। ୫୯ ମହିଳାଙ୍କ ସମେତ ୭୨୨ ଜଣ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତାରେ ଅବତୀର୍ଣ୍ଣ ହୋଇଥିବାବେଳେ ସୋମବାର ସେମାନଙ୍କ ଭାଗ୍ୟ ନିର୍ଣ୍ଣୟ ହେବ। ଗତ ମାସ ୯ ତାରିଖରେ ଆସାମରେ ଗୋଟିଏ ପର୍ଯ୍ୟାୟରେ ନିର୍ବାଚନ ଅନୁଷ୍ଠିତ ହୋଇଥିବାବେଳେ ମତଦାନ ହାର ୮୫.୯୬ ପ୍ରତିଶତ ଥିଲା।
୨୪୩ ଆସନ ବିଶିଷ୍ଟ ତାମିଲନାଡୁ ବିଧାନସଭା ପାଇଁ ୬୨ଟି କେନ୍ଦ୍ରରେ ଭୋଟଗଣତି ହେବ। ଏହି କାର୍ଯ୍ୟରେ ୧୦,୫୪୫ କର୍ମଚାରୀଙ୍କୁ ନିୟୋଜିତ କରାଯିବ ଓ ସେମାନଙ୍କୁ ୪,୬୧୪ ଜଣ ମାଇକ୍ରୋ ଅବ୍ଜରଭର ସହାୟତା କରିବେ। ପ୍ରତି ନିର୍ବାଚନମଣ୍ଡଳୀ ପାଇଁ ଜଣେ ଲେଖାଏ ମୋଟ ୨୩୪ ଜଣ କାଉଣ୍ଟିଂ ଅବ୍ଜରଭର ରହିବେ। ସେହିପରି କେରଳମ୍ ଏବଂ ପଣ୍ଡିଚେରୀରେ ଭୋଟଗଣତି ପାଇଁ ସମସ୍ତ ପ୍ରସ୍ତୁତି ଶେଷ ହୋଇଥିବା ମୁଖ୍ୟ ନିର୍ବାଚନ ଅଧିକାରୀ କହିଛନ୍ତି। ୧୪୦ ଆସନ ବିଶିଷ୍ଟ କେରଳମ୍ ବିଧାନସଭା ପାଇଁ ୪୩ଟି ଗଣତି କେନ୍ଦ୍ରରେ ସକାଳ ୮ଟାରୁ ଭୋଟଗଣତି ଆରମ୍ଭ ହେବ। ଏଥିପାଇଁ ୧୫,୪୬୫ ଜଣ ଗଣନାକାରୀ ଏବଂ ୩୨,୩୦୧ ପୋଲିସ କର୍ମଚାରୀଙ୍କୁ ନିୟୋଜିତ କରାଯାଇଛି। ଅନୁରୂପ ଭାବେ ପଣ୍ଡିଚେରୀର ଭୋଟ ଗ୍ରହଣ ହୋଇଥିବା ୩୦ଟି ଆସନ ପାଇଁ ଭୋଟ ଗଣତି କରାଯିବ। ନିର୍ବାଚନ କମିଶନଙ୍କ ଗାଇଡ୍ଲାଇନ ଅନୁଯାୟୀ ପ୍ରଥମେ ପୋଷ୍ଟାଲ ବାଲଟ୍ ଗଣନା କରାଯିବ। ଏହାର ୩୦ ମିନିଟ୍ ପରେ ଇଭିଏମ୍ ଭୋଟ ଗଣନା କରାଯିବ। ପ୍ରତି ପର୍ଯ୍ୟାୟର ଗଣନା ପରେ ତଥ୍ୟ ନିର୍ବାଚନ କମିଶନଙ୍କ ମୋବାଇଲ୍ ଆପ୍ଲିକେଶନ ଏବଂ ସରକାରୀ ପୋର୍ଟାଲ result.eci.gov.inରେ ଅପ୍ଲୋଡ୍ ହେବ।
