ଚାନ୍ଦବାଲି,୪ା୫(ଅଶୋକ ପଣ୍ଡା): ଭଦ୍ରକ-ଚାନ୍ଦବାଲି ମୁଖ୍ୟ ରାସ୍ତା ନାଲଗୁଣ୍ଡା ଛକ ନିକଟରେ ଶୋଇଥିବା ୮ ଷଣ୍ଢଙ୍କ ଉପରେ ମାଡ଼ିଗଲା ହାଇଓ୍ବା। ଡ୍ରାଇଭରଙ୍କ ବେପରୁଆ ଗାଡ଼ିଚାଳନାରୁ ଏପରି ଘଟିଛି।
ସୂଚନାନୁଯାୟୀ, ଭଦ୍ରକରୁ ଏକ ମାଲ୍ ବୋଝେଇ ହାଇଓ୍ବା ଚାନ୍ଦବାଲି ଅଭିମୁଖେ ଆସୁଥିବା ବେଳେ ଚାନ୍ଦବାଲି ଥାନା ଅଧିନସ୍ଥ ନାଲଗୁଣ୍ଡା ବଜାରରେ ଘଟିଛି ଏଭଳି ଘଟଣା। ରବିବାର ବିଳମ୍ବିତ ରାତିରେ ଘଟିଛି ଏକ ଅମାନବୀୟ ଦୁର୍ଘଟଣା। ରାସ୍ତାକଡ଼ରେ ଶୋଇଥିଲେ ୮ ଷଣ୍ଢ। ହଠାତ୍ ଏକ ଦ୍ରୁତଗାମୀ ହାଇଓ୍ବା ଆସି ଶୋଇଥିବା ଷଣ୍ଢପଲଙ୍କ ଉପରେ ମାଡ଼ିଗଲା। ଡ୍ରାଇଭରଙ୍କ ବେପରୁଆ ଚାଳନା ଯୋଗୁ ଘଟଣାସ୍ଥଳରେ ହିଁ ୮ଟି ଷଣ୍ଢଙ୍କ ଉପରେ ଚଢି ଗଲା। ୫ଟି ଷଣ୍ଢର ମୃତ୍ୟୁ ହୋଇଥିବା ବେଳେ ଆଉ ୩ଟି ଷଣ୍ଢ ମରଣ ସହ ସଂଗ୍ରାମ କରୁଛନ୍ତି। ଏମିତି ରାସ୍ତା ସାରା ରକ୍ତର ଛିଟା। ଆଉ ପଡିଥିଲା ନିରୀହ ପଶୁଙ୍କ କ୍ଷତବିକ୍ଷତ ଶରୀର। ଏ ବୀଭତ୍ସ ଦୃଶ୍ୟ ଦେଖି ସ୍ଥାନୀୟ ଲୋକେ ଦୁର୍ଘଟଣାଗ୍ରସ୍ତ ହାଇଓ୍ବାରେ ନିଆଁ ଲଗାଇଦେଲେ। କିଛି ମୁହୂର୍ତ୍ତରେ ହାଇୱାଟି ଜଳି ପାଉଁଶ ହୋଇଗଲା। ଖବର ପାଇ ଅଗ୍ନିଶମ ବାହିନୀ ଓ ଚାନ୍ଦବାଲି ପୋଲିସ ପହଞ୍ଚି ନିଆଁକୁ ଆୟତ୍ତ କରିବା ସହ ପରିସ୍ଥିତିକୁ ନିୟନ୍ତ୍ରଣ କରିଛନ୍ତି। ହାଇଓ୍ବା ଡ୍ରାଇଭର ଘଟଣା ପରେ ଫେରାର୍ ହୋଇଯାଇଥିବା ଜଣାପଡ଼ିଛି।
