ଭୁବନେଶ୍ୱର, ୨୩।୧୧(ବନ୍ଦନା ସେଠୀ)-ଧରିତ୍ରୀ ପକ୍ଷରୁ ଶନିବାର ପ୍ରେସ୍କ୍ଲବ୍ଠାରେ ‘ୟୁଥ୍ କନ୍କ୍ଲେଭ’ ବା ‘ଯୁବ ସମ୍ମିଳନୀ’ର ଚତୁର୍ଥ ସଂସ୍କରଣର ପ୍ରଥମ ଦିନ ସମାପ୍ତ ହୋଇଛି। ଜଳବାୟୁ ପରିବର୍ତ୍ତନ ଏବେ ସମଗ୍ର ଦେଶ ପାଇଁ ଏକ ଆହ୍ବାନରେ ପରିଣତ ହୋଇଛି। ପରିବେଶର ସୁରକ୍ଷା ପାଇଁ ଅନେକ କ୍ଷେତ୍ରରେ ପଦକ୍ଷେପ ନିଆଯାଉଥିବା ବେଳେ, ‘ଧରିତ୍ରୀ’ ପକ୍ଷରୁ ସଚେତନତା ସୃଷ୍ଟି କରାଯାଉଛି। ଏ ଦିଗରେ ‘ୟୁଥ୍ କନ୍କ୍ଲେଭ’ ଭଳି ଅଭିନବ ପ୍ରୟାସ ମାଧ୍ୟମରେ ତୃଣମୂଳସ୍ତରରେ କାର୍ଯ୍ୟ କରୁଥିବା ପରିବେଶକର୍ମୀମାନେ ଗୋଟିଏ ଛାତତଳେ ଏକାଠି ଦେଖିବାକୁ ମିଳିଥିବା ମତ ପ୍ରକାଶ ପାଇଛି।
ଏହି ଅବସରରେ ୨୦୨୩ରେ ‘ଧରିତ୍ରୀ କ୍ଲାଇମେଟ୍ ଗ୍ରାଣ୍ଟ୍’ ବିଜୟୀ ତଥା ଚଳିତବର୍ଷର ଜୁରୀ ସଦସ୍ୟ ଓଡ଼ିଶା ପର୍ଯ୍ୟାବରଣ ସଂରକ୍ଷଣ ଅଭିଯାନ (ଓପ୍ସା)ର ମୁଖ୍ୟ ସୌମ୍ୟରଞ୍ଜନ ବିଶ୍ୱାଳ ଯୋଗଦେଇ ନିଜର ଯାତ୍ରା ସମ୍ପର୍କରେ ମତ ରଖିଥିଲେ। କାର୍ଯ୍ୟକ୍ରମରେ ରାଜ୍ୟର ବିଭିନ୍ନ ଅଞ୍ଚଳରେ ତୃଣମୂଳସ୍ତରରେ କାର୍ଯ୍ୟ କରୁଥିବା ବିଭିନ୍ନ ଅନୁଷ୍ଠାନ ଏବଂ ବ୍ୟକ୍ତିଗତ ଭାବେ ୮୪ଜଣ ପରିବେଶକର୍ମୀ ଉଦ୍ବୋଧନ ଦେଇ ସେମାନଙ୍କ ପରିବେଶ ଯାତ୍ରା ଓ ଅନୁଭୂତି ବଖାଣି ଥିଲେ।ଶେଷରେ ଧରିତ୍ରୀ ଓ ଓଡ଼ିଶା ପୋଷ୍ଟର ସମ୍ପାଦକ ତଥାଗତ ସତପଥୀ ଧନ୍ୟବାଦ ଅର୍ପଣ କରି ପରିବେଶ ସୁରକ୍ଷା ପାଇଁ ଆଗେଇ ଆସିଥିବା ପିଲାମାନେ ନିଷ୍କାମ ଭାବେ କାମ କରୁଛନ୍ତି ବୋଲି କହିଥିଲେ।
ଏହି ଅବସରରେ ପରିବେଶ ସଚେତନତାକୁ ନେଇ ବିରାହ ବ୍ୟାଣ୍ଡ୍ ପକ୍ଷରୁ ସଙ୍ଗୀତଭିତ୍ତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ବ୍ୟାଣ୍ଡ୍ର ମୁଖ୍ୟ ଗାୟକ ରୁମିତ୍ ଓ୍ବାଲିଆ, ପ୍ରଚ୍ଛଦ ଭୋକାଲିଷ୍ଟ ତଥା ଗିଟାର ବାଦକ ଉତ୍ସବ ଭରଦ୍ୱାଜ ଓ ଯନ୍ତ୍ର ବାଦକ ତରୁଣ କୁମାର ବନ୍ଦେ ଉତ୍କଳ ଜନନୀ ସଙ୍ଗୀତରୁ ପରିବେଷଣ ଆରମ୍ଭ କରିଥିଲେ। ‘ମେରେ ଅପ୍ନେ କରମ୍ ସେ’,‘ଓ ରେ ଖୁଦା’, ‘ଥୋଡା ସା’, ‘ବଦ୍ଲେ ରାସ୍ତା’ ଭଳି ଗୋଟିଏ ପରେ ଗୋଟିଏ ସୁନ୍ଦର ଗୀତରେ ଦର୍ଶକ ଝୁମିଥିଲେ। ପ୍ରତିଟି ଗୀତରେ ଜଳବାୟୁ ପରିବର୍ତ୍ତନର କାରଣ, ନିରାକରଣ, ପରିଣାମ ସମ୍ପର୍କରେ ଶୁଣିବାକୁ ମିଳିଥିଲା।
