ଧର୍ମଶାଳା,୭।୩: ଭାରତର କିମ୍ବଦନ୍ତୀ ସ୍ପିନର ରବିଚନ୍ଦ୍ରନ ଅଶ୍ୱିନ ଧର୍ମଶାଳା ଟେଷ୍ଟରେ ମଇଦାନକୁ ଓହ୍ଲାଇବା ମାତ୍ରେ ଇତିହାସ ସୃଷ୍ଟି କରିଛନ୍ତି। ସେ ନିଜର ୧୦୦ ତମ ଟେଷ୍ଟ ଖେଳିବାରେ ଭାରତର ୧୪ ତମ ଖେଳାଳି ହୋଇଛନ୍ତି। ତାଙ୍କ ପୂର୍ବରୁ ସଚିନ ତେନ୍ଦୁଲକର, ରାହୁଲ ଦ୍ରାବିଡ, ଭିଭିଏସ ଲକ୍ଷ୍ମଣ, ଅନିଲ କୁମ୍ବଲେ, କପିଲ ଦେବ, ସୁନୀଲ ଗାଭାସ୍କର, ଦିଲୀପ ଭେଙ୍ଗସକର, ସୌରଭ ଗାଙ୍ଗୁଲି, ବିରାଟ କୋହଲି, ଇଶାନ୍ତ ଶର୍ମା, ହରଭଜନ ସିଂ, ଚେତେଶ୍ୱର ପୂଜାରା ଏବଂ ବିରେନ୍ଦର ସେହୱାଗ ଏହା କରିଛନ୍ତି। ଏହି ମୌକାକୁ ସ୍ବତନ୍ତ୍ର କରିବା ପାଇଁ ତାଙ୍କୁ ଧର୍ମଶାଳାର ଏଚପିସିଏ ଷ୍ଟାଡିୟମରେ ଏକ ସ୍ବତନ୍ତ୍ର ଢଙ୍ଗରେ ଟେଷ୍ଟ କ୍ୟାପ୍ ପ୍ରଦାନ କରାଯାଇଛି।
ଏହି ବିଶେଷ ଅବସରରେ ପାଇଁ ଅଶ୍ୱିନଙ୍କ ପତ୍ନୀ ପ୍ରୀତି ଏବଂ ତାଙ୍କର ଦୁଇ ଝିଅ ମଧ୍ୟ ଷ୍ଟାଡିୟମରେ ଉପସ୍ଥିତ ଥିଲେ। ଷ୍ଟାଡିୟମରେ ଭାରତୀୟ ଖେଳାଳିମାନେ ଏକ ଲାଇନରେ ଛିଡା ହୋଇଥିଲେ। ଏହି ସମୟରେ ମୁଖ୍ୟ ପ୍ରଶିକ୍ଷକ ରାହୁଲ ଦ୍ରାବିଡ ଅଶ୍ୱିନଙ୍କ ବିଷୟରେ କିଛି କହିଥିଲେ। ତା’ପରେ ସେ ଟେଷ୍ଟ କ୍ୟାପ୍ ଅଶ୍ୱିନଙ୍କୁ ଦେଇଥିଲେ। ଏହି ସମୟରେ ଭାରତୀୟ ଖେଳାଳିମାନେ କରତାଳି ଦେଇଥିଲେ। ପ୍ରୀତି ଭାବପ୍ରବଣ ଦେଖାଯାଉଥିଲେ । ସମସ୍ତ ଖେଳାଳି ଅଶ୍ୱିନଙ୍କୁ ଆଲିଙ୍ଗନ କରି ଅଭିନନ୍ଦନ ଜଣାଇଛନ୍ତି। ଭାରତୀୟ ଖେଳାଳିମାନେ ତାଙ୍କୁ ଗାର୍ଡ ଅଫ ଅନର ମଧ୍ୟ ଦେଇଥିଲେ। ବିସିସିଆଇ ଅନେକ ଫଟୋ ମଧ୍ୟ ଶେୟାର କରିଛି ।
