ନୂଆଦିଲ୍ଲୀ,୩।୬:ଓଡିଶା ବାଲେଶ୍ୱର ବାହାନଗାରେ ହୋଇଥିବା ଛାତିଥରା ଟ୍ରେନ ଦୁର୍ଘଟଣା ନେଇ ଅନେକ ପ୍ରଶ୍ନ ଉଠିଛି। ଦୁର୍ଘଟଣା କିପରି ଏବଂ କେମିତି ହେଲା ଏନେଇ ଆଲୋଚନା ଏବଂ ସମାଲୋଚନା ମଧ୍ୟ ଲାଗିରହିଛି। ତେବେ ବିରୋଧୀ ଏହାକୁ ସରକାରଙ୍କ ସାଧାରଣ ଲୋକଙ୍କୁ ଅବହେଳା ଏବଂ ବିଳାସପୂର୍ଣ୍ଣ ଟ୍ରେନ୍ ଉପରେ ଗୁରୁତ୍ୱ ଦେଉଛନ୍ତି ବୋଲି କହି ଟାର୍ଗେଯ କରିଛନ୍ତି।ଏହି ଦୁର୍ଘଟଣାର ତଦନ୍ତ ପାଇଁ କେନ୍ଦ୍ର ସରକାର ଏକ ଉଚ୍ଚ ସ୍ତରୀୟ ଗଠନ କରିବାକୁ ନିର୍ଦ୍ଦେଶ ଦେଇଛନ୍ତି। ଏସବୁ ମଧ୍ୟରେ ‘କବଚ ସିଷ୍ଟମ’ ନେଇ ପ୍ରଶ୍ନ ସାମ୍ନାକୁ ଆସିଛି। ରେଳ ମୁଖପାତ୍ର ଅମିତାଭ ଶର୍ମା ଏନେଇ ସୂଚନା ଦେଇଛନ୍ତି, ଟ୍ରେନ୍ ଦୁର୍ଘଟଣା ଘଟିଥିବା ରୁଟ୍ରେ ‘କବଚ ସିଷ୍ଟମ’ ଉପଲବ୍ଧ ନ ଥିଲା। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ମଧ୍ୟ ‘କବଚ ସିଷ୍ଟମ’ ନେଇ ପ୍ରଶ୍ନ କରିଛନ୍ତି। ତେବେ ଏହି କବଚ ସିଷ୍ଟମ କ’ଣ ଆସନ୍ତୁ ଜାଣିବା
ଟ୍ରେନ୍ କଲୋସିଅନ ଆଭୋଏଡାନ୍ସ ସିଷ୍ଟମ (ଟିସିଏସି) ନାମରେ ଏକ ସ୍ବୟଂଚାଳିତ ସୁରକ୍ଷା ବ୍ୟବସ୍ଥା ଦେଶରେ ବିକଶିତ କରାଯାଇଛି। ଯାହାକୁ କବଚ ନାମିତ କରାଯାଇଛି। ସରଳ ଭାଷାରେ କହିଲେ, ଟ୍ରେନ୍ର ଇଞ୍ଜିନରେ ଏକ ଇଲୋକ୍ଟ୍ରୋନିକ ଉପକରଣ ଏବଂ ରେଡିଓ ଫ୍ରିକ୍ୱେନ୍ସି ଚିହ୍ନଟ ପାଇଁ ଏକ ଡିଭାଇସ୍ (ଟିସିଏସି) ଲଗାଯାଇଛି ଯାହା ସିଗନାଲ ଏବଂ ଟ୍ରାକ୍ରେ ଟ୍ରେନର ଗତି ନିୟନ୍ତ୍ରଣ କରିଥାଏ।
ଭାରତୀୟ ରେଳବାଇ ଚଳନ୍ତା ଟ୍ରେନ୍ର ସୁରକ୍ଷା ପାଇଁ କବଚ ନାମକ ଏକ ସ୍ବୟଂଚାଳିତ ସୁରକ୍ଷା ବ୍ୟବସ୍ଥା ପ୍ରସ୍ତୁତ କରିଛି। ଏହା ସିଷ୍ଟମକୁ ଟ୍ରେନ୍ ଡ୍ରାଇଭରଙ୍କର ବିଶ୍ୱସ୍ତ ସାଥୀ ବୋଲି କୁହାଯାଏ। ଯଦିଓ କୌଣସି ପରିସ୍ଥିତିରେ ଟ୍ରେନ୍ ଡ୍ରାଇଭର ସ୍ପିଡ୍ କଣ୍ଟୋଲ୍ କିମ୍ବା ବ୍ରେକ ଲଗାଇବାକୁ ଭୁଲିଯାଆନ୍ତି, ତେବେ ଏହି କବଚ ସିଷ୍ଟମ ବ୍ରେକ ଇଣ୍ଟରଫେସ ୟୁନିଟ ମାଧ୍ୟମରେ ଟ୍ରେନ୍କୁ ନିୟନ୍ତ୍ରଣ କରିଥାଏ।
