ମଣିଷଙ୍କ ପାଇଁ ବ୍ଲଡ ବ୍ୟାଙ୍କ ଥିବା କଥା ସମସ୍ତେ ଜାଣିଥିବେ । ହେଲେ କୁକୁର-ବିଲେଇଙ୍କ ପାଇଁ ବି ରହିଛି ବ୍ଲଡ ବ୍ୟାଙ୍କ । କଥାଟା ଟିକେ ଭ୍ରୁକୁଞ୍ଚନ ସୃଷ୍ଟି କରୁଥିଲେ ବି ସତ । ବିଶ୍ୱର କିଛି ଦେଶରେ ଏମିତି ବ୍ଲଡ ବ୍ୟାଙ୍କ ରହିଛି ଯେଉଁଠି କୁକୁର-ବିଲେଇ ରକ୍ତଦାନ କରିଥାଆନ୍ତି । କାରଣ ଅଧିକାଂଶ ଲୋକେ କୁକର ଓ ବିଲେଇଙ୍କୁ ପାଳିତ ପଶୁଭାବେ ରଖିଥାଆନ୍ତି । କୁକୁର ଓ ବିଲେଇଙ୍କର ବି ରହିଛି ଅଲଗା ଅଲଗା ବ୍ଲଡ ଗ୍ରୁପ । ତେବେ କୁକୁରଙ୍କର ୧୨ ପ୍ରକାର ବ୍ଲଡ ଗ୍ରୁପ ଥିବା ବେଳେ ବିଲେଇଙ୍କର ରହିଛି ୩ ପ୍ରକାର ବ୍ଲଡ ଗ୍ରୁପ । ଉତ୍ତର ଆମେରିକାରେ ଥିବା ‘ପଶୁ ଚିକିତ୍ସା ବ୍ଲଡ ବ୍ୟାଙ୍କ’ର ପ୍ରଭାରୀ ଡା. କେସି ମିଲ୍ସ କୁହନ୍ତି କାଲିଫର୍ନିଆର ଡିକ୍ସନ ଓ ଗାର୍ଡନ ଗ୍ରୋବ ସହର ବ୍ୟତୀତ ମିଶିଗନର ଷ୍ଟକବ୍ରିଜ, ଭର୍ଜିନିଆ, ବ୍ରିଷ୍ଟୋ ଓ ମେରିଲ୍ୟାଣ୍ଡର ଉନ୍ନାପୋଲିସ ସହର ସମେତ ଉତ୍ତର ଆମେରିକାର କେତେକ ସହରରେ ପଶୁବ୍ଲଡ ବ୍ୟାଙ୍କ ରହିଛି । ଏଠାକୁ ଲୋକେ ନିଜର ଗୃହପାଳିତ କୁକୁର ବିଲେଇଙ୍କୁ ଆଣି ରକ୍ତଦାନ କରିଥାଆନ୍ତି । ଡାକ୍ତର ମିଲ୍ସ କହିଛନ୍ତି ପଶୁଙ୍କ ରକ୍ତଦାନ ପାଇଁ ପାଖାପାଖି ଅଧଘଣ୍ଟା ସମୟ ଲାଗିଥାଏ । ସବୁଠାରୁ ବଡକଥା ହେଲା ଏମାନଙ୍କୁ ଆନାସ୍ଥେସିଆ ଦେବାକୁ ପଡି ନ ଥାଏ । ତେବେ ଯେଉଁଠାରେ ପଶୁ ବା ପ୍ରାଣୀଙ୍କ ପାଇଁ ବ୍ଲଡ ବ୍ୟାଙ୍କ ନାହିଁ ସେଠାରେ ରକ୍ତଦାନ ଓ ପ୍ଲାଜମା ଦାନ ସମ୍ପର୍କିତ କାର୍ଯ୍ୟକ୍ରମମାନ ଆୟୋଜିତ କରାଯାଉଛି । ଏକ ରିପୋର୍ଟ ଅନୁଯାୟୀ, ବ୍ରିଟେନ ଓ ଆମେରିକାରେ ଲୋକେ ପଶୁଙ୍କ ରକ୍ତଦାନ ପାଇଁ ଖୁବ୍ ସଚେତନ । ତେବେ ଭାରତରେ ବି ପଶୁଙ୍କ ପାଇଁ ରହିଛି ବ୍ଲଡ ବ୍ୟାଙ୍କ । ଏହାର ନାମ ‘ତନୁବାସ ପଶୁ ବ୍ଲଡ ବ୍ୟାଙ୍କ’ । ଏହା ତାମିଲନାଡୁ ପଶୁ ଚିକିତ୍ସା ଏବଂ ପଶୁ ବିଜ୍ଞାନ ବିଶ୍ୱବିଦ୍ୟାଳୟ ଅଧିନରେ ରହିଛି ଓ ଚେନ୍ନାଇର ମାଡ୍ରାସ ପଶୁଚିକିତ୍ସା କଲେଜ କଲେଜ ପ୍ରଶିକ୍ଷଣ ହସ୍ପିଟାଲର କ୍ଲିନିକାଲ ବିଭାଗ ଭାବେ କାର୍ଯ୍ୟ କରୁଛି ।
