ଅନୁଗୋଳ ଅଫିସ, ୧୫।୯ – ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟ କର୍ମଚାରୀଙ୍କୁ ଶନିବାର ଅଗ୍ନି ନିରାପତ୍ତା ପାଠ ପଢ଼ାଯାଇଛି। କୌଣସି ସ୍ଥାନରେ ଅଗ୍ନି ସଂଯୋଗ ହେଲେ କିପରି ତୁରନ୍ତ ରୋକାଯାଇ ପାରିବ ସେ ସମ୍ପର୍କରେ ସକାଳ ୯ଟାରୁ ସାଢ଼େ ୧୧ଟା ପର୍ଯ୍ୟନ୍ତ ଏହି ପାଠ ପଢ଼ାଯାଇଥିଲା। ଜିଲା ମୁଖ୍ୟ ଚିକିତ୍ସାଳୟ ୫ ମହଲା ଅଟ୍ଟାଳିକା ନିକଟରେ ୩ଶହ କର୍ମଚାରୀଙ୍କୁ ଏହି ତାଲିମ ପ୍ରଦାନ କରାଯାଇଥିଲା। ଅନୁଗୋଳ ଅଗ୍ନିଶମ ଅଧିକାରୀ ସର୍ବେଶ୍ୱର ବରାଳଙ୍କ ସମେତ ଅନ୍ୟମାନେ ମେଡିକାଲ ପରିସରରେ ମକ୍୍ ଡ୍ରିଲ କରି ଅଗ୍ନି ନିରାପତ୍ତା ସମ୍ପର୍କରେ କର୍ମଚାରୀଙ୍କୁ ଅବଗତ କରାଇଥିଲେ। ଏହି କାର୍ଯ୍ୟକ୍ରମରେ ଏଡିଏମ୍ଓ ମେଡିକାଲ ଲକ୍ଷ୍ମୀନାରାୟଣ ବିଶୋଇଙ୍କ ସହ ମ୍ୟାନେଜର ଉପସ୍ଥିତ ଥିଲେ।
ମେଡିକାଲ କାନ୍ଥରେ ଝୁଲୁଥିବା ଅଗ୍ନି ନିରାପତ୍ତା ସିଲିଣ୍ଡରକୁ କିପରି ବ୍ୟବହାର କରାଯିବ ସେ ନେଇ କର୍ମଚାରୀଙ୍କୁ ଅଗ୍ନିଶମ ବିଭାଗ ପକ୍ଷରୁ ବୁଝାଯାଇଥିଲା। ସେହିପରି ବିଦ୍ୟୁତ୍ ଶଟସର୍କିଟକୁ କିପରି ଆୟତ୍ତ କରାଯିବ ଓ ଲୋକଙ୍କୁ ସୁରକ୍ଷିତ ରଖାଯିବ ସେ ସମ୍ପର୍କରେ ତାଲିମ ଦିଆଯାଇଥିଲା। ମେଡିକାଲ କର୍ମଚାରୀ, ନର୍ସ, ସୁରକ୍ଷା କର୍ମଚାରୀ ଓ ଅନ୍ୟମାନେ ଏହି ତାଲିମ ନେଇଥିଲେ। ଅଗ୍ନିଶମ ଅଧିକାରୀ ବରାଳଙ୍କ ସମେତ ରବୀନ୍ଦ୍ର କୁମାର ନାୟକ, ରାଜେନ୍ଦ୍ର କୁମାର ଦେଓ, କ୍ଷୀରୋଦ ପ୍ରସାଦ ସାହୁ, ରଶ୍ମିରଞ୍ଜନ ଲେଙ୍କାଙ୍କ ସହ ଅନ୍ୟ କର୍ମଚାରୀମାନେ ଉପସ୍ଥିତ ଥିଲେ। ସୂଚନାଯୋଗ୍ୟ ଯେ, ଜିଲା ମୁଖ୍ୟ ଚିକିତ୍ସାଳୟରେ ଅଦ୍ୟାବଧି ଅଗ୍ନି ନିରାପତ୍ତା ନେଇ ସମ୍ପୂର୍ଣ୍ଣ ବ୍ୟବସ୍ଥା କରାଯାଇନାହିଁ। ୨୦୧୬ ପୂର୍ବରୁ ମିଳିଥିବା ପ୍ରମାଣପତ୍ରକୁ ଧରି କର୍ତ୍ତୃପକ୍ଷ ଚିକିତ୍ସାଳୟ ପରିଚାଳନା କରୁଛନ୍ତି। ତେବେ ୨୦୧୭ ନଭେମ୍ବରରୁ ନୂଆ ନିୟମ ଆସିଥିଲେ ମଧ୍ୟ କର୍ତ୍ତୃପକ୍ଷ ଅଗ୍ନିନିରାପତ୍ତା ପାଇଁ ଆବେଦନ କରିନାହାନ୍ତି। ଏ ନେଇ ଅଗ୍ନିଶମ ଅଧିକାରୀ ଏଡିଏମ୍ଓ ମେଡିକାଲ ବିଶୋଇଙ୍କୁ ଜଣାଇବା ସହ ତୁରନ୍ତ ଫର୍ମ ୩ରେ ଆବେଦନ କରିବାକୁ ପରାମର୍ଶ ଦେଇଥିଲେ। ଆସନ୍ତା ୪ ଦିନ ମଧ୍ୟରେ ମେଡିକାଲର ଅଗ୍ନି ନିରାପତ୍ତା ପାଇଁ ଆବେଦନ କରାଯିବ ବୋଲି ଏଡିଏମ୍ଓ ମେଡିକାଲ ବିଶୋଇ ପ୍ରକାଶ କରିଛନ୍ତି।
