ଅଭିନେତା ଥଲାପତି ବିଜୟ ତାମିଲ ରାଜନୀତିରେ ହିରୋ ଭଳି ପ୍ରବେଶ କରିଛନ୍ତି। ତାମିଲନାଡୁ ବିଧାନସଭା ନିର୍ବାଚନରେ ତାଙ୍କ ଦଳ ଟିଭିକେ ୧୦୦ରୁ ଅଧିକ ଆସନରେ ଆଗୁଆ ରହିଛି। ଏହା ସୂଚାଇ ଦେଉଛି ଯେ ବିଜୟଙ୍କ ମୁଖ୍ୟମନ୍ତ୍ରୀ ହେବା ପ୍ରାୟ ନିଶ୍ଚିତ।
ଟିଭିକେର ବିଜୟରେ ବିଜୟଙ୍କ ‘ଲେଡି ଲକ୍’ ଏକ ଗୁରୁତ୍ୱପୂର୍ଣ୍ଣ କାରଣ ଭାବରେ ବିବେଚନା କରାଯାଉଛି। ଆଜି ସେହି ‘ଲେଡି ଲକ୍’ ଅଭିନେତ୍ରୀ ତ୍ରିଶା କ୍ରିଷ୍ଣନଙ୍କ ଜନ୍ମଦିନ। ତାଙ୍କ ନାମ ବିଜୟଙ୍କ ସହିତ ପ୍ରାୟତଃ ଯୋଡା ଯାଇଛି। ତାମିଲନାଡୁ ନିର୍ବାଚନର ଫଳାଫଳ ଘୋଷଣା ହେବା ପୂର୍ବରୁ ତ୍ରିଶା ପ୍ରାର୍ଥନା କରିବାକୁ ତିରୁମାଲା ମନ୍ଦିର ଯାଇଥିଲେ ଏବଂ ପରବର୍ତ୍ତୀ ସମୟରେ ବିଜୟଙ୍କ ବାସଭବନରେ ପହଞ୍ଚିଥିଲେ। ଏହାସହ ସେ ବିଜୟଙ୍କ ବାପା-ମା’ଙ୍କ ସହ ହ୍ବିସ୍ଲ୍ ବଜୋଇବା କାର୍ଯ୍ୟକ୍ରମରେ ଯୋଗ ଦେଇଥିଲେ।
୫୧ ବର୍ଷୀୟ ବିଜୟ ବର୍ତ୍ତମାନ ତାମିଲ ସିନେମାର ସବୁଠାରୁ ବଡ଼ ଷ୍ଟାର ଭାବରେ ରାଜତ୍ୱ କରୁଥିବା ବେଳେ ତ୍ରିଶା କ୍ରିଷ୍ଣନଙ୍କୁ ‘ଦକ୍ଷିଣ ଭାରତର କୁଇନ୍’ ଭାବରେ ପ୍ରଶଂସା କରାଯାଏ। ଏହି ଯୋଡ଼ି ପ୍ରାୟ ୫ଟି ଚଳଚ୍ଚିତ୍ରରେ ଏକାଠି ନଜର ଆସିଛନ୍ତି। ଏଥିରେ ୨୦୨୩ ବ୍ଲକବଷ୍ଟର ‘ଲିଓ’ ସାମିଲ ଅଛି। ଏହି ସମୟରେ ବିଜୟଙ୍କ ପତ୍ନୀ ସଙ୍ଗୀତା ସୋର୍ନାଲିଙ୍ଗମ କୋର୍ଟରେ ଛାଡପତ୍ର ମାମଲା ଆବେଦନ କରିଥିଲେ।
ସଙ୍ଗୀତା ସୋର୍ନାଲିଙ୍ଗମ ତାଙ୍କ ଛାଡପତ୍ର ଆବେଦନରେ ଅଭିଯୋଗ କରିଛନ୍ତି ଯେ, ତାଙ୍କ ସ୍ବାମୀ ବିଜୟ ଏକ ଅବୈଧ ସମ୍ପର୍କରେ ଜଡିତ ଥିଲେ। ସେ ସ୍ପଷ୍ଟ ଭାବରେ କାହାର ନାମ ନେଇ ନ ଥିଲେ। ବିଜୟ ଏବଂ ସଙ୍ଗୀତା ୧୯୯୯ ମସିହାରେ ବିବାହ ବନ୍ଧନରେ ଆବଦ୍ଧ ହୋଇଥିଲେ ଏବଂ ସେମାନଙ୍କର ଦୁଇଟି ସନ୍ତାନ ଅଛି। ସମ୍ପ୍ରତି ତାଙ୍କ ଛାଡପତ୍ର ଘୋଷଣା ପରେ ବିଜୟ ତ୍ରିଶାଙ୍କ ସହିତ ସାର୍ବଜନୀନ ଦୃଶ୍ୟମାନ ହୋଇଥିଲେ।
Dharitri – Odisha’s No.1 Odia Daily
