ସ୍କୁଲ, କଲେଜ ଓ ଅନ୍ୟ ସଂସ୍ଥାରେ ବିଭିନ୍ନ କାର୍ଯ୍ୟରେ ପାଣି ବ୍ୟବହାର ପରେ ନଷ୍ଟ ହେଉଥିବା ପାଣି(ଗ୍ରେ ଓ୍ବାଟର)ର ରିସାଇକେଲ କରୁଛନ୍ତି ପ୍ରଶାନ୍ତ ଶର୍ମା। ଆଗାମୀ ଜଳ ସଙ୍କଟ ଦୂର କରିବାକୁ ସେ ଏଭଳି ଚେଷ୍ଟା ଜାରି ରଖିଛନ୍ତି । ଲଣ୍ଡନରୁ ଚାକିରି ଛାଡ଼ି ସେ ଏହିି କାର୍ଯ୍ୟ କରୁଛନ୍ତି। ପ୍ରଶାନ୍ତ ୨୦୨୨ରେ ‘ପଜିଟିଭ ଆକ୍ସନ ଫର୍ ଚାଇଲ୍ଡ ଆଣ୍ଡ୍ ଆର୍ଥ ଫାଉଣ୍ଡେଶନ’ ନାମକ ଏନ୍ଜିଓ ଗଠନ କରି ତା’ମାଧ୍ୟମରେ ସମସ୍ତ କାର୍ଯ୍ୟ ପରିଚାଳନା କରୁଛନ୍ତି। ମୁଖ୍ୟତଃ ଦିଲ୍ଲୀ ଓ ଉତ୍ତରାଖଣ୍ଡର ଅନେକ ସ୍କୁଲ, ସୁନ୍ଦରଗଡ଼ର ସବୁ ସରକାରୀ କଲେଜ ଏବଂ ନୈନତାଲର ଅରବିନ୍ଦ ଆଶ୍ରମରେ ବର୍ଷକୁ ୬ ଲକ୍ଷ ଲିଟର ଗ୍ରେ ଓ୍ବାଟର ରିସାଇକେଲ କରାଯାଉଛି। ୧୦୦ ଲିଟର ପାଣି ରିଲିଜ ହେଲେ ସେଥିରୁ ୭୦ ଲିଟର ଗ୍ରେ ଓ୍ବାଟର ହେଉଛି ଏବଂ ଭାରତରେ ପ୍ରତିଦିନ ୩୧ ବିଲିୟନ ଲିଟର ଗ୍ରେ ଓ୍ବାଟର ବାହାରୁଛି। ଏଣୁ ଏହା ନିଶ୍ଚିତ ଯେ ପ୍ରଶାନ୍ତଙ୍କ ରିସାଇକେଲ ଉପାୟ ଆଗାମୀ ଦିନରେ ବହୁ ଉପଯୋଗୀ ହୋଇପାରିବ। ଗ୍ରେ ଓ୍ବାଟର ରିସାଇକେଲ ପରେ ତାହା ଭୂତଳ ଜଳସ୍ତର ବୃଦ୍ଧି ହେବା ସହ ଗଛରେ ପାଣି ଦେବା, ସଫା କରିବା ଏବଂ ବଗିଚାରେ ବ୍ୟବହାର କରାଯାଉଛି।
