ପାଟଣା,୩ା୫(ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ବ୍ଲକ୍ ଡିଆନାଳି ଚତୁରିସାହିର ଜିତୁ ମୁଣ୍ଡା ଭଊଣୀ କାଲାରା ମୁଣ୍ଡାଙ୍କ କଙ୍କଳା ନେଇ ମଲ୍ଲିପୋଷି ଓଡ଼ିଶା ଗ୍ରାମୀଣ ବ୍ୟାଙ୍କୁ ନେବା ଘଟଣା ପରେ ଚର୍ଚ୍ଚା ଧମିବାରେ ନା ଧରୁନି। କଙ୍କାଳ ଖୋଳି ନେବା ଘଟଣାରେ ସାହିବାହି ଜିତୁ ମୁଣ୍ଡାକୁ ପୁଣି ଶୁଦ୍ଧି ହେବାକୁ କହିଛନ୍ତି। ଏହି କ୍ରମରେ ଜିତୁ ଆସନ୍ତା ବୁଧବାର ଶୁଦ୍ଧି ହେବେ ବୋଲି ସୂଚନା ମିଳିଛି।
ପ୍ରକାଶ ଯେ, ଭଉଣୀ କାଲାରାଙ୍କ ମୃତ୍ୟୁ ପରେ ଜିତୁ ଶୁଦ୍ଧି ହୋଇଥିଲେ। ହେଳେ ପୁଣି ମଶାଣିରୁ କଙ୍କାଳ ଖୋଳିଥିବାରୁ ଗାଁର ହୋ ସମାଜର ଲୋକମାନେ ତାଙ୍କୁ ଏକ ଘରକିଆ ଭଳି ରଖିଛନ୍ତି। ଶୁଦ୍ଧି ନ ହେଲେ ତାଙ୍କୁ ଜାତି ଭାଇ ବାସନ୍ଦ କରିବା ସହ ସାଧାରଣ ଚଳଣିରେ ଅଂଶଗ୍ରହଣ କରାଇବେ ନାହିଁ। କଙ୍କାଳ ଖୋଳି ବୋହିଥିବାରୁ ତାଙ୍କୁ ପ୍ରାୟଶ୍ଚିତ ଓ ଜାତି ହେବାକୁ ହୋ ସମାଜ ନିର୍ଦ୍ଦେଶ ଜାରି କରିଛି। ରବିବାର ବିନା କୁକୁଡ଼ା ଓ ଛେଳି ଯୋଗାଡ଼ରେ ସ୍ୱଳ୍ପ ଜାତି ଭାଇଙ୍କୁ ନେଇ ଜିତୁ ଶୁଦ୍ଧିକ୍ରିୟା ଆୟୋଜନ କରୁଥିବା ବେଳେ ଜାତି ଭାଇମାନେ ଅଡିବସି ଏହାକୁ ବନ୍ଦ କରିଥିଲେ।
ଘର ସମ୍ମୁଖରେ ୨ ନମ୍ୱର, ୩ ନମ୍ୱର୍ ୱାର୍ଡ଼ର ହୋ ସମାଜର ମୁରବୀ କାଣ୍ଡେ ମୁଣ୍ଡା, ଶୁକ୍ରା ମୁଣ୍ଡା, ମୁନିଆ ମୁଣ୍ଡା, ମକୁରୁ ମୁଣ୍ଡାଙ୍କ ସହ ଗ୍ରାମର ୨୫ଜଣ ମୂରବୀବସି ନିଶାପ କରିଥିଲେ। ବୁଧବାର ପରିବାର ଲୋକେ ମୁଣ୍ଡନ ହୋଇ ପ୍ରାୟଶ୍ଚିତ ହେବେ, ନୁଆ ଲୁଗା ପିନ୍ଧିବେ, ଗୁଣିଆ ହାଣ୍ଡିଆରେ କୁକୁଡ଼ା ରକ୍ତ ପକାଈ ପୂଜା କରିଥିବା ହାଣ୍ଡିକୁ ଅଶୌଚ ଥିବା ପରିବାରକୁ ପିଆଇବେ। ପରେ ଗାଁ, ଆତ୍ମୀୟ ସ୍ୱଜନଙ୍କୁ ମାଂସ, ଭାତ ଓ ହାଣ୍ଡିଆ ଦେଈ ଜିତୁ ଆପ୍ୟାୟିତ କରି ଜାତିରେ ମିଶିବେ ବୋଲି ନିଷ୍ପତ୍ତି ହୋଇଛି। ଜିତୁ ପ୍ରାୟ ୩ଶହ ଲୋକଙ୍କୁ ଖାସି, କୁକୁଡ଼ା, ଭାତ ଓ ହାଣ୍ଡିଆ ଖାଇବାକୁ ଦେବେ ବୋଲି କହିଛନ୍ତି। ଏଥି ପାଈଁ ଜିତୁଙ୍କ ପରିବାର ତରଫରୁ ଛେଳି କୁକୁଡ଼ା ଯୋଗାଡ଼ ଆରମ୍ଭ ହୋଇଛି।
