ଦିଗପହଣ୍ଡି,୩ା୫(ଅଶେଷ ନାଥ ମିଶ୍ର): ସାପ କାମୁଡାରେ ଯୁବତୀଙ୍କର ମୃତ୍ୟୁ ହୋଇଛି । ଏଭଳି ଅଭାବନୀୟ ଘଟଣା ଗଞ୍ଜାମ ଜିଲା ଦିଗପହଣ୍ଡି ବ୍ଳକ କଇଠଖଣ୍ଡି ପଞ୍ଚାୟତ ଅନ୍ତର୍ଗତ ତଲାସିଙ୍ଗି ଗ୍ରାମରୁ ସାମ୍ନାକୁ ଆସିଛି । ଯୁବତୀଙ୍କୁ ଏକ ବିଷଧର ଚିତି ସାପ କାମୁଡିବାରୁ ତାଙ୍କର ମୃତ୍ୟୁ ହୋଇଛି । ମୃତ ଯୁବତୀ ଜଣକ ହେଲେ ତଲାସିଙ୍ଗି ଗ୍ରାମର ନିଳାଞ୍ଚଳ ଗୈାଡଙ୍କ ଝିଅ ଶ୍ରୁତି ଗୈାଡ (୧୮) ।
ସୂଚନା ଅନୁସାରେ, ଶ୍ରୁତି ସବୁଦିନ ଭଳି ଶନିବାର ରାତିରେ ଖାଇସାରି ପରିବାର ଲୋକଙ୍କ ସହ ଶୋଇଥିଲେ । ତେବେ ରାତି ପ୍ରାୟ ସାଢ଼େ ୧୨ ଟାରେ ପରିସ୍ରା ଲାଗିବାରୁ ସେ ଘର ବାହାରକୁ ଯାଇଥିଲେ । ଏହି ସମୟରେ ଏକ ବିଷାକ୍ତ ଚିତି ସାପଟି ତାଙ୍କ ଡାହାଣ ହାତକୁ କାମୁଡ଼ି ଦେଇଥିଲା । ସେଠାରୁ ସେ ଆସି ପରିବାର ଲୋକଙ୍କୁ ଉଠାଇ ଘଟଣା ସମ୍ପର୍କରେ ଜଣାଇବା ପରେ ଅଚେତ ହୋଇ ପଡିଥିଲେ । ପରିବାର ଲୋକେ ସାପଟିକୁ ଦେଖିବା ପରେ ଶ୍ରୁତିଙ୍କୁ ଗୁରୁତର ଅବସ୍ଥାରେ ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଆଣିଥିଲେ। ସେଠାରେ ପ୍ରାଥମିକ ଚିକିତ୍ସା ପରେ ସଙ୍କଟାପନ୍ନ ଅବସ୍ଥାରେ ଆମ୍ବୁଲାନ୍ସ ଯୋଗେ ବ୍ରହ୍ମପୁର ବଡ଼ ଡାକ୍ତରଖାନାକୁ ନିଆଯାଇଥିଲା ।
ସେଠାରେ ଚିକିତ୍ସାଧୀନ ଅବସ୍ଥାରେ ରବିବାର ଭୋରରେ ତାଙ୍କ ମୃତ୍ୟୁ ଘଟିଥିଲା। ପୋଲିସ ମୃତଦେହ ଜବତ କରି ଅପମୃତ୍ୟୁ ମାମଲା ରୁଜୁ କରିବା ସହ ବ୍ୟବଚ୍ଛେଦ କରାଇ ପରିବାର ଲୋକଙ୍କୁ ହସ୍ତାନ୍ତର କରିଥିଲେ । ଅପରାହ୍ନରେ ତାଙ୍କ ମୃତଦେହ ଗ୍ରାମରେ ପହଞ୍ଚିବା ପରେ ଶୋକାକୁଳ ପରିବେଶରେ ଗ୍ରାମ ଶ୍ମଶାନରେ ତାଙ୍କ ଅନ୍ତିମ ସଂସ୍କାର କରାଯାଇଥିଲା ।
